တိုက်ရိုက်ထုတ်လွှင့်မှု, ရွေးကောက်ပွဲကျင်းပရုံနဲ့ မြန်မာ့အကျပ်အတည်းဖြေရှင်းနိုင်မှာမဟုတ်လို့ ထိုင်းနိုင်ငံခြားရေးဝန်ကြီးပြော

တိုက်ရိုက် ထုတ်လွှင့်ချက်

1. လွန်ခဲ့သော ၃၄ မိနစ် ကနေပြည်တာ်(ပျဉ်းမနား)က အာဟာရသုခစျေးက ဆိုင်ခန်း ၂၄၀ နီးပါး မီးလောင်

   

   ဓာတ်ပုံ ရင်းမြစ်, မိုးစေတနာ လူမှုကူညီရေးအသင်း

   နေပြည်တော်ကောင်စီနယ်မြေ၊ ပျဉ်းမနားမြို့နယ်၊ ကင်ပွန်းတန်းရွာက အာဟာရသုခစျေး မီးလောင်မှုမှာ ဆိုင်ခန်း ၂၄၀ နီးပါး မီးထဲပါသွားခဲ့တယ်လို့ စစ်ကော်မရှင်က သတင်းထုတ်လာပါတယ်။

   မနေ့ ဖေဖော်ဝါရီလ ၂၅ ရက် ည ၉ နာရီခန့်မှာ အဲဒီစျေး မီးလောင်ခဲ့တာကြောင့် ၁ နာရီနီးပါး မီးငြှိမ်းသတ်ခဲ့ရတယ်လို့ မြန်မာနိုင်ငံမီးသတ်တပ်ဖွဲ့ကလည်း အစောပိုင်းမှာ ပြောထားပါတယ်။

   စစ်ကော်မရှင်ကတော့ ဒီစျေးမီးလောင်မှုမှာ လူထိခိုက်သေဆုံးမှုမရှိပေမဲ့ ပျဉ်းမနားမြို့နယ်ထဲ အဓိက ကျတဲ့စျေးဖြစ်တာကြောင့် ဒီစျေး မီးလောင်ရတဲ့အကြောင်းရင်းကို တိတိကျကျသိရအောင်စုံစမ်းမယ်လို့ သတင်းထုတ်ပါတယ်။

   မီးသတ်ယာဉ် ၈ စင်းနဲ့ငြှိမ်းသတ်ခဲ့ရတဲ့ ဒီမီးလောင်မှုမှာ ပျက်စီးဆုံးရှုံးမှုတန်ဖိုး ဘယ်လောက်ရှိတယ်ဆိုတာကို စုံစမ်းနေတုန်းလို့ စစ်ကော်မရှင်က ပြောပါတယ်။

2. လွန်ခဲ့သော တစ်နာရီ ကကိုးကန့်က မြီအိမ်၊ ပယ်အိမ်တို့နဲ့ ဆက်စပ်တဲ့အမှုတွေ ပြီးပြီလို့ တရုတ်ပြော

   

   ဓာတ်ပုံ ရင်းမြစ်, CCTV

   ကိုးကန့်ရဲ့ထင်ရှားတဲ့ မိသားစုကြီး လေးစုထဲက မြီနဲ့ ပယ် မိသားစုဝင်တွေနဲ့ သူတို့ရဲ့ဆက်စပ်သူတွေရဲ့အမှုတွေကို တရုတ်တရားရုံးတွေမှာ တရားစွဲဆိုထားတာတွေ ပြီးဆုံးပြီလို့ အမြင့်ဆုံးတရားရုံးဖြစ်တဲ့ ပြည်သူ့တရား ရုံးချုပ်က ဆိုပါတယ်။

   ကိုးကန့် မြီနဲ့ ပယ်မိသားစုဝင်တွေအပါအဝင် လူပေါင်း ၁၆ ဦးကို သေဒဏ်ပေးပြီးတဲ့နောက်မှာ ဒီမိသားစုနဲ့ဆက်နွှယ်တဲ့အမှုတွေ ပြီးပြတ်ပြီလို့ တရုတ်ဘက်က ဒီနေ့မှာ ကြေညာလာတာဖြစ်ပါတယ်။

   ကျားဖြန့်နှိမ်နင်းရေးနဲ့ဆက်စပ်ပြီး ဒီမိသားစုကြီး ၂ စုရဲ့ မိသားစုဝင်တွေ အပါအဝင် လူပေါင်း ၃၉ ဦးကို ထောင်တစ်သက်၊ သေဒဏ်စီရင်တာအပြင် ပြင်းထန်တဲ့ပြစ်ဒဏ်တွေအသီးသီးချမှတ်ခဲ့တာလို့ တရုတ်နိုင်ငံပိုင် ဆုင်ဟွာက သတင်းဖော်ပြပါတယ်။

   တရုတ်ဟာ ကိုးကန့် မိသားစုကြီး ၂ စုက လူတွေအပါအဝင် လူ ၁၆ ဦးကို တရုတ်နှစ်သစ်ကူးမတိုင်ခင်မှာပဲ သေဒဏ်စီရင်ခဲ့တာလို့ တရုတ်ဘက်က သတင်းထုတ်ပြန်ချက်တွေအရ သိရပါတယ်။

   တဖက်မှာလည်း ဒါဟာ မြန်မာနိုင်ငံမှာအခြေစိုက်နေထိုင်သူတွေကို တရုတ် တရားစီရင်ရေးအောက်မှာ အရေအတွက်အများဆုံး သေဒဏ်ပေးမှုဖြစ်ပါတယ်။

   နယ်စပ်ဖြတ်ကျော်ရာဇဝတ်ဂိုဏ်းကြီးနှစ်ခုကို အပြီးတိုင် ဖျက်သိမ်းလိုက်တာကြောင့် ဒါဟာ ပြည်တွင်းပြည်ပက ရာဇဝတ်ဂိုဏ်းတွေအတွက် ထိုးနှက်ချက်တစ်ခုဖြစ်တယ်လို့ ဆင်ဟွာသတင်းက ဖော်ပြပါတယ်။

   ၂၀၂၅ ခုနှစ်၊ နှစ်ကုန်ပိုင်းအထိ တရုတ်တရားရုံးတွေမှာ မြန်မာနိုင်ငံမြောက်ပိုင်းက တယ်လီကွန်းလိမ်လည်မှုတွေနဲ့ ဆက်စပ်တဲ့ အမှုပေါင်း ၂၇,၀၀၀ ကို အပြီးသတ်အမိန့်ချခဲ့တယ်လို့ ပြည်သူ့တရားရုံးချုပ်ရဲ့သတင်းစာရှင်းလင်းပွဲတစ်ရပ်မှာ ကြေညာထားပါတယ်။

   ဒီအမှုတွေနဲ့ ဆက်စပ်တဲ့ မြန်မာက ပြန်လွှဲလာသူ ၄၁,၀၀၀ ဦးထက်မနည်းကို တရုတ်ဘက်က ပြစ်ဒဏ်တွေချမှတ်ခဲ့တာ ဖြစ်ပါတယ်။

3. လွန်ခဲ့သော ၃ နာရီ ကစစ်ကော်မရှင်နဲ့ အေအေက ဘင်္ဂလားဒေ့ရှ်ကို ဂုဏ်ပြုသဝဏ်လွှာ အပြိုင်ပို့

   

   ဓာတ်ပုံ ရင်းမြစ်, Getty Images

   စစ်ကော်မရှင်နိုင်ငံခြားရေးဝန်ကြီး ဦးသန်းဆွေနဲ့ အာရက္ခတပ်တော်(အေအေ) စစ်ဦးစီးချုပ် ဗိုလ်ချုပ်ထွန်းမြတ်နိုင်တို့က အသစ်တက်လာတဲ့ ဘင်္ဂလားဒေ့ရှ်နိုင်ငံခြားရေးဝန်ကြီး ဒေါက်တာ ခါလီလူ ရာမန်ကို ဂုဏ်ပြုသဝဏ်လွှာတွေ ပေးပို့ကြတယ်လို့ ဘင်္ဂလားဒေ့ရှ်သတင်းကနေ လာတဲ့သတင်းတွေမှာဖော်ပြပါတယ်။

   ဒါဟာ ULA/AA အနေနဲ့ ဘင်္ဂလားဒေ့ရှ်အစိုးရသစ်အဖွဲ့ဝင် ဝန်ကြီးတစ်ဦးကို ပထမဆုံးပေးပို့တဲ့သဝဏ်လွှာဖြစ်လာပါတယ်။

   စစ်ကော်မရှင်ရဲ့နိုင်ငံခြားရေးဝန်ကြီး ဦးသန်းဆွေက နှစ်နိုင်ငံဆက်ဆံရေးနဲ့ နေပြည်တော်နဲ့ ဒါကာအကြား ပူးပေါင်းဆောင်ရွက်ရေး တိုးမြှင့်ဖို့ ခိုင်မာတဲ့ကတိကဝတ်ကို ရေးသားပေးပို့တယ်လို့ ဘင်္ဂလားဒေ့ရှ်သတင်းကဖော်ပြပါတယ်။

   ULA/AA ခေါင်းဆောင် ဗိုလ်ချုပ်ထွန်းမြတ်နိုင်က ပေးပို့တဲ့ ဂုဏ်ပြုသဝဏ်လွှာမှာတော့ ဘင်္ဂလားဒေ့ရှ်နဲ့ ရခိုင်ကြား ချစ်ကြည်မှု လမ်းကြောင်းသစ်တစ်ရပ် တည်ဆောက်ဖို့ အခွင့်အရေးလို့ ပြောတဲ့အကြောင်းသတင်းမှာ ဖော်ပြပါတယ်။

   ”ဘင်္ဂလားဒေ့ရှ်နိုင်ငံရဲ့ နိုင်ငံခြားရေးဝန်ကြီးအဖြစ် တာဝန်ယူချိန်မှာ လက်တွေ့ကျကာ ရေရှည်တည်တံ့တဲ့ စစ်မှန်တဲ့ ဖြေရှင်းနည်းတွေ ကျွန်တော်တို့နဲ့အတူတကွ ဆက်လက်ရှာဖွေမယ်လို့ မျှော်လင့်ပါတယ်” လို့ ဆိုထားပါတယ်။

   ဘင်္ဂလားဒေ့ရှ်နိုင်ငံခြားရေးဝန်ကြီးကလည်း ဘင်္ဂလားဒေ့ရှ်အစိုးရအနေနဲ့ မြန်မာအစိုးရသာမက အာရက္ခတပ်တော်နဲ့လည်း ထိတွေ့ဆက်ဆံနေတယ်လို့ ဆိုထားပါတယ်။

   စစ်ကော်မရှင်နဲ့ အေအေဘက်က ပို့လာတဲ့သဝဏ်လွှာတွေနဲ့ ပတ်သက်လို့ ဘင်္ဂလားဒေ့ရှ်သတင်းမှာတော့ ဒါဟာ ရိုဟင်ဂျာအရေးအတွက် နှစ်ဖက်စလုံးက ဘင်္ဂလားဒေ့ရှ်အစိုးရသစ်နဲ့ ပူး‌ပေါင်းဆောင် ရွက်လိုတဲ့ဘက် ဦးတည်တယ်လို့ သုံးသပ်ထားကြပါတယ်။

   ဘင်္ဂလားဒေ့ရှ်နဲ့နယ်နိမိတ်ချင်းထိစပ်နေတဲ့ ရခိုင်ပြည်နယ်၊ ဘူးသီးတောင်နဲ့ မောင်တောကို အေအေက မြေပြင်ရော၊ နတ်မြစ်ရေပြင်ကိုပါ ထိန်းချုပ်ထားပြီး မြန်မာရေပိုင်နက်ထဲ တရားမဝင် ငါးဝင်ဖမ်းတယ်ဆိုတဲ့ ဘင်္ဂလားဒေ့ရှ် ရေလုပ်သား ၇၀ ကျော်ကို မကြာသေးခင်တုန်းကပဲ အေအေက ဘင်္ဂလားဒေ့ရှ်ဘက်ကို ပြန်လွှဲပေးထားပါတယ်။

4. လွန်ခဲ့သော ၃ နာရီ ကကန့်ကွက်အော်ဟစ်သံတွေနဲ့ ၁ နာရီ၊ ၄၇ မိနစ်ကြာ ထရမ့်ရဲ့နိုင်ငံ့အခြေပြမိန့်ခွန်း

   

   ဓာတ်ပုံ ရင်းမြစ်, Reuters

   နိုင်ငံ့သမိုင်းတစ်လျှောက် အချိန်အကြာဆုံး နိုင်ငံအခြေပြမိန့်ခွန်းကို သမ္မတ ဒေါ်နယ်ထရမ့် တစ်ယောက် အမေရိကန်လွှတ်တော်မှာ ပြောသွားပါတယ်။ ဒီမိန့်ခွန်းထဲ အောင်နိုင်သူ တစ်ယောက်လို၊ တစ်ခါတလေမှာ တိုက်ပွဲဝင်နေသူတစ်ယောက်လို ပြောသွားတဲ့အချိန်ရှိခဲ့သလို သူ့ပါတီ ရီပတ်ဘလီကန်က အမတ်တွေရဲ့လုပ်ဆောင်ချက်ကို ချီးကျူးတာ၊ နောင် သူ ဘာဆက်လုပ်သွားဖို့ရှိတယ်ဆိုတာတွေကိုလည်း ပြောသွားပါတယ်။

   သူ ဒုတိယအကြိမ် တာဝန်ထမ်းတဲ့သမ္မတသက်တမ်း တစ်နှစ်ပြည့်အဖြစ်ပြောတဲ့ ဒီမိန့်ခွန်းကို ကွန်ဂရက်လွှတ်တော်အမတ်တွေ၊ သူ့အစိုးရအဖွဲ့ဝင်တွေ၊ တရားရုံးချုပ်တရားသူကြီးတွေ၊ သူ့ မိသားစုအပြင် ဧည့်သည်တော်တွေလည်း တက်နားထောင်ခဲ့ကြပါတယ်။

   အီရန်မှာ တင်းမာမှုဖြစ်နေချိန်၊ သမ္မတထရမ့် အခွန်တိုးကောက်တာကို နိုင်ငံ့တရားရုံးချုပ်က ကန့်သတ်လိုက်ပြီးချိန်၊ ကုန်ကျစရိတ်ကြီးနေလို့ အမေရိကန်လူထုကြား နေရေးစားရေး ပူပင်နေကြချိန်မှာ သမ္မတထရမ့်တစ်ယောက် လွှတ်တော်မှာ အခြေပြမိန့်ခွန်း တက်ပြောရတာပါ။

   သန်းဆယ်ချီတဲ့အမေရိကန် လူထု စောင့်ကြည့်ခဲ့တဲ့အပြင် အမြင်မတူလို့ သဘောထားကွဲလွဲမှုတွေဖြစ်နေတဲ့ လွှတ်တော်ရှေ့မှောက်မှာ သမ္မတ ထရမ့် ပြောခဲ့တဲ့ ၁ နာရီ ၄၇ မိနစ်ကြာ မိန့်ခွန်းက ထူးခြားချက်တွေကို ဒီလင့်ခ် မှာ ဆက်လက်ဖတ်ရှုနိုင်ပါတယ်။

5. လွန်ခဲ့သော ၄ နာရီ ကရွေးကောက်ပွဲကျင်းပရုံနဲ့ မြန်မာ့အကျပ်အတည်းဖြေရှင်းနိုင်မှာမဟုတ်လို့ ထိုင်းနိုင်ငံခြားရေးဝန်ကြီးပြော

   

   ဓာတ်ပုံ ရင်းမြစ်, Thai MFA

   မြန်မာမှာဖြစ်ပေါ်နေတဲ့ အကျပ်အတည်းကို ရွေးကောက်ပွဲကျင်းပရုံနဲ့ ဖြေရှင်းနိုင်မှာမဟုတ်ဘဲ အားလုံးပါဝင်တဲ့ တွေ့ဆုံ‌ ဆွေးနွေးရေးနဲ့ စစ်မှန်တဲ့ငြိမ်းချမ်ရေးဖြစ်စဥ်တွေ ဖြစ်ပေါ်လာဖို့ လိုအပ်တယ်လို့ ထိုင်းနိုင်ငံခြား‌ရေးဝန်ကြီး ဆီဟာဆတ် ဖုန်ကတ်ကောင်းက မှတ်ချက်ပေး ပြောလာပါတယ်။

   မြန်မာ့အရေးကို စိတ်ဝင်စားတဲ့ ပြင်သစ်နိုင်ငံရဲ့ ဥရောပနဲ့ နိုင်ငံခြားရေးဝန်ကြီးနဲ့တွေ့ဆုံချိန် ပြောဖြစ်ခဲ့တဲ့ အကြောင်းအရာကို ဖေဖော်ဝါရီ ၂၅ ရက်တုန်းက ဂျီနီဗာမြို့မှာ သတင်းထောက်တွေနဲ့ တွေ့ဆုံချိန် ပြန်လည်ထုတ်နုတ်ပြီး သူက ပြောခဲ့တာပါ။

   ပြင်သစ်နဲ့ ထိုင်းနှစ်နိုင်ငံ နိုင်ငံခြားရေးဝန်ကြီးတွေ တွေ့ဆုံချိန်မှာ မြန်မာ့အရေးကလည်း အဓိက အကြောင်းအရာတစ်ခုအနေနဲ့ ဆွေးနွေးခဲ့တယ်လို့ ထိုင်းသတင်းတွေက ဖော်ပြပါတယ်။

   ထိုင်းနိုင်ငံခြားရေးဝန်ကြီးဟာ ဂျီနီဗာကို မသွားခင်ရက်ပိုင်းမှာပဲ မြန်မာနိုင်ငံခြားရေးဝန်ကြီးဦးသန်းဆွေနဲ့ ဖူးခက်မြို့မှာ တွေ့ဆုံခဲ့ပါသေးတယ်။

   ဒီတွေ့ဆုံမှုအပြီး ထိုင်းနိုင်ငံရဲ့အမြင်ကို ပြင်သစ်ဘက်က မေးမြန်းခဲ့တဲ့အပေါ် အထက်မှာပြောခဲ့သလို ရွေးကောက်ပွဲ ကျင်းပရုံနဲ့ မလုံလောက်သေးဘူးဆိုတဲ့ အခြေအနေကို ပြောခဲ့တာပါ။

   ထိုင်းနဲ့မြန်မာဟာ နယ်နိမိတ်ချင်းထိစပ်နေတာကြောင့် ထိုင်းပိုင်နက်အတွင်း မတည်ငြိမ်မှုတွေ တိုက်ရိုက်သက်ရောက်နိုင်တဲ့အတွက် ထိုင်းနိုင်ငံအနေနဲ့ မြန်မာစစ်တပ်၊ တိုင်းရင်းသားအစုအဖွဲ့တွေနဲ့ တွေ့ဆုံဆွေးနွေးမှုကို ရှောင်ရှားလို့မရနိုင်ဘူးလို့လည်း ထိုင်းနိုင်ငံခြား ရေးဝန်ကြီးက ဆိုပါတယ်။

   နယ်စပ်တကြောမှာ အွန်လိုင်းလိမ်လည်မှုလုပ်ငန်းတွေ၊ မူးယစ်ဆေးဝါးတရားမဝင်ရောင်းဝယ်ဖောက်ကားတာတွေ၊ နယ်စပ်ဖြတ်ကျော် မြစ်ချောင်းညစ်ညမ်းမှုတွေ ကြုံနေရတယ်လို့ ထောက်ပြပါတယ်။

   ထိုင်းနိုင်ငံက မြန်မာ့ငြိမ်းချမ်းရေးနဲ့ တည်ငြိမ်ရေးကိုလိုလားတယ်လို့လည်း ဆိုပါတယ်။

   ထိုင်းနိုင်ငံက မြန်မာစစ်တပ်နဲ့ ပူးပေါင်းတယ်ဆိုတာနဲ့ အာဆီယံဘုံသဘောတူညီချက်ကို လျစ်လျူရှုတယ်ဆိုတဲ့ အချက်ကိုတော့ ငြင်းဆိုထားပါတယ်။

   ဒီဘုံသဘောတူညီချက်တွေအတွက် ထိုင်းဘက်က မြန်မာကို ဆက်လက်ချဥ်းကပ်ဆောင်ရွက်သွားမှာဖြစ်ပေမဲ့ တိုးတက်မှုမြင်ရဖို့ကတော့ နှစ်ဦးနှစ်ဖက်အပေါ် မူတည်တယ်လို့ ထိုင်းနိုင်ငံခြားရေးဝန်ကြီးက ဆိုပါတယ်။

   မနေ့တုန်းက မြန်မာစစ်ခေါင်းဆောင်နဲ့ ထိုင်းဘုရင့်လေတပ်ဦးစီးချုပ်တို့ တွေ့ဆုံခဲ့ပြီး ရွေးကောက်ပွဲကို ကြီးမားတဲ့ကန့်ကွက်မှုမရှိတာကြောင့် အောင်မြင်တဲ့ရွေးကောက်ပွဲလို့ စစ်ခေါင်းဆောင်က ပြောပါတယ်။

6. လွန်ခဲ့သော ၄ နာရီ က

   မင်္ဂလာပါ။ ဖေဖော်ဝါရီ ၂၆ ရက် ဘီဘီစီသတင်းများ တိုက်ရိုက်တင်ဆက်မှု စတင်ပြီဖြစ်ပါတယ်။ နိုင်ငံတဝန်းနောက်ဆုံးရ သတင်းများကို တိုက်ရိုက်ထုတ်လွှင့်ချက်မှာ အချိန်နဲ့ တပြေးညီ ဖတ်ရှုနိုင်ပါတယ်။