ဒေတာကုန်ကျမှုလျှော့ချနိုင်ရန်အတွက် ယခုဝက်ဘ်ဆိုက်မှ စာမျက်နှာများကို ရုပ်ပုံမပါ စာသားဖြင့်သာတင်ဆက်ပေးထားပါသည်။ ရုပ်ပုံ ဗီဒီယိုများနှင့် ကြည့်လိုလျှင် မူလစာမျက်နှာတွင်ကြည့်နိုင်ပါသည်။
ပလက်ဝက ရွာတချို့မှာ တပ်မတော်က ရွာသားတွေကို ပေါ်တာဆွဲနေတာတွေ ရှိနေတယ်လို့ ရွာသားတွေပြော
ချင်းပြည်နယ် ပလက်ဝမြို့နယ် ကုလားတန်မြစ် အထက်ပိုင်းက မီးဇာ၊ သာယာကုန်း၊ ပြည်ထောင် အစရှိတဲ့ ရွာတွေနားမှာ စခန်းချခဲ့တဲ့ အစိုးရစစ်တပ်တွေကနေ ရွာသားတွေကို ငွေကြေး အနည်းငယ်ပေးပြီး ရိက္ခာတွေသယ်ယူဖို့ ပေါ်တာ ဆွဲတာတွေရှိနေတယ်လို့ အဲဒီဒေသက ရွာသားတွေက ပြောပါတယ်။
ရွာသားတွေကို ငွေပေးပြီး ထမ်းခိုင်းတာဖြစ်ပေမယ့် ရွာသားတွေအနေနဲ့ မိမိတို့ရွာတွေမှာ တောင်ယာအလုပ်တွေရှိပြီး တချို့နေရာတွေမှာ မိုင်းပေါက်တာတွေရှိတာကြောင့် အသက်အန္တရာယ်ကြောင့် မလိုက်လိုကြဘူးလို့ ပလက်ဝမြို့နယ်မြောက်ပိုင်း သာယာကုန်းကျေးရွာအုပ်ချုပ်ရေးမှူးက ဘီဘီစီကို ပြောပါတယ်။
စစ်တပ်က ရွာသားတွေကို ဆန် ၁ အိတ်ထမ်းရင် ငွေကျပ် ၈၀၀၀ ကျပ်ပေးပေမယ့် ဆန်တအိတ်ကို လူ ၂ ယောက် ထမ်းရကြောင်းနဲ့ ထမ်းနေကျ နှုန်းခထက် အင်မတန်နည်းပါးတာကြောင့် ရွာသားတွေက ငြင်းဆန်ကြပါတယ်။
ရွာအုပ်ချုပ်ရေးမှူးတွေက စစ်တပ်အတွက် လူလိုရင် လိုသလောက် ၁၀ ယောက်ကနေ ၁၅ ယောက်အထိ စုဆောင်းပေးရပြီး ရွာသားတွေက မလိုက်ချင်လို့ ငြင်းခဲ့ရင် စစ်တပ်က အုပ်ချုပ်ရေးမှူးကို ညံတယ်လို့ အပြစ်တင်တာတွေရှိတဲ့အတွက် လုပ်ကိုင်ပေးခဲ့ရတယ်လို့ ဒေသခံတွေက ပြောပါတယ်။
အခုလို စစ်တပ်က ခိုင်းစေမှုက အခကြေးငွေနဲ့ ပေးပေမယ့် အာဏာပါလာတာကြောင့် ရွာသားတွေအနေနဲ့ စိတ်မလုံခြုံမှုတွေကို ခံစားရနိုင်တယ်လို့ ချင်းလူ့အခွင့်အရေး စောင့်ကြည့်လေ့လာရေးအဖွဲ့က မိုင်သင်းယုမွန်က ပြောပါတယ်။
တိုက်ပွဲဖြစ်နေတဲ့ နေရာတွေမှာ အစိုးရတပ်က ဝင်ရောက်ပြီး ပေါ်တာဆွဲခိုင်းစေတာတွေရှိသလို ရက္ခိုင့်တပ်မတော် AA ဘက်ကလည်း ရွာတွေထဲ ဝင်ရောက်ပြီး ကြက်၊ ဝက် စတဲ့ ရိက္ခာအတွက် တောင်းယူတာတွေရှိတယ်လို့ ဒေသခံတွေက ပြောပါတယ်။
ဒီကိစ္စနဲ့ ပတ်သက်လို့ တပ်မတော်ကို ဆက်သွယ်မေးမြန်းပေမယ့် ဆက်သွယ်လို့ မရခဲ့ပါဘူး။
အခုလို လူ့အခွင့်အရေး ချိုးဖောက်ခံရတာတွေနဲ့ ပတ်သက်လို့ တာဝန်ရှိတဲ့ အစိုးရနဲ့ မြန်မာနိုင်ငံလူ့အခွင့်အရေးကော်မရှင်ကို အစီရင်ခံစာ ပေးပို့သွားမှာဖြစ်တယ်လို့ CHRO က မိုင်သင်းယုမွန်က ပြောပါတယ်။
