Archifau Hydref 2012

Pwy sydd eisiau bod yn ddyfarnwr dyddiau yma?!

Gem hyll oedd hi'r bythefnos yn ôl , a gem hyll oedd hi dros y penwythnos diwethaf hefyd.

Ond tydw i ddim am rygnu mlaen am benderfyniadau Mark Clattenburg ( y dyfarnwr yn y gêm rhwng Chelsea a Manchester united bnawn Sul), na 'chwaith am yr hyn a ddywedodd, neu'r hyn na ddywedodd, amser a ddengys.

Tydw i ddim chwaith am rygnu mlaen am benderfyniad Andre Marriner, y dyfarnwr, wrthododd gôl i Lerpwl yn erbyn Everton ym munudau olaf y gêm, heblaw gwneud y sylw fod y peniad gan Sebastian Coates wrth iddo ddringo ar ben Phil Jagielka, ac a roddodd y bel ar blât i Luis Suarez, heb os nac oni bai yn drosedd.

Mae ymchwiliad a fydd yn debygol o gymryd oesoedd am gael ei gynnal i'r honiadau am natur iaith Mark Clattenburg yn Stamford Bridge, a cyn yr wythnos diwethaf d'oedd fawr o neb yn y byd peldroed wedi clywed am Peter Herbert.

Heddiw, mae ei enw yn dod yn fwy a mwy cyfarwydd fel cyfreithiwr o Lundain sydd yn ymddangos fel petae'n gefnogol i'r syniad o ddatblygu undeb amgen i chwaraewyr peldroed i'r un sydd eisoes yn bodoli ,sef Cymdeithas Peldroedwyr Proffesiynol.

Ymysg yr holl stwr, fodd bynnag, cefais un achos i wenu yn dilyn gemau'r penwythnos.
Cychwynnodd Manchester United eu gem yn Stamford Bridge gyda dau asgellwr, Antonio Valencia ar y dde, ac Ashley Young ar y chwith.

Ymddengys fod Syr Alex Ferguson wedi cyfaddef ei fod wedi dewis chwarae gyda dau asgellwr ar ôl clywed nain, wythdeg oed o'r enw Margaret, yn ei feirniadu ar deledu clwb Manchester United, am ddefnyddio dull patrwm chwarae diemwnt yn nhrefn y tîm (dull sydd yn canolbwyntio fwy ar symudiadau drwy ganol y cae yn hytrach na defnyddio'r esgyll).

Anhygoel - tybed pwy sydd yn dylanwadu ar bwy yn Old Trafford?

Mae gen i gyfaill yn gweithio i Manhcester United, ond tydio heb ofyn fy marn eto ar sut y gall United wella eu dull o chware, er iddo wybod fy mod yn derbyn pensiwn erbyn heddiw!

Ond hwyrach mai Syr Alex a wnaiff hynny, fel sgwrs rhwng un pensiynwr a'r llall - pobol o'n hoes a'n hamser ein hunain!

• Llyfrnodi gyda
• del.icio.us |
• Digg |
• Newsvine |
• NowPublic |
• Reddit
• - Beth yw hwn?

Mae’r penwythnos diwethaf wedi dangos efallai mai’r ffordd orau o wneud protest, ydi peidio â gwneud un!

Gosodiad dryslyd?

Mae’n eithaf tebyg. Ond drwy wrthod a gwisgo crysau T mudiad 'Kick It Out', mae rhai o beldroedwyr mwyaf amlwg Uwchgynghrair Lloegr wedi tynnu sylw pawb, eu bod o'r farn nad ydi'r mudiad gwrth hiliaeth yma , yn eu tyb hwy, wedi gwneud digon i ddileu hiliaeth yn y byd peldroed. Roedd cred gyffredinol bod angen mwy na dim ond ymgyrch i dynnu sylw drwy wisgo crys T yn unig, gyda llawer yn galw am rhywbeth amgenach i atal sylwadau ac ymddygiad hiliol gan chwaraewyr.

Tybed faint o effaith gafodd gwahardd John Terry rhag chwarae pedrair gem yn dilyn y ffrwgwd gydag Anton Ferdinand ? Efallai ichi gofio fod Luis Suarez o Lerpwl wedi cael ei wahardd am wyth gem y llynedd am ddigwyddiad eithaf tebyg.

Y sgil yr adwaith ymddengys fod yna symudiad ar droed i sefydlu Cymdeithas Beldroed i Chwaraewyr Croenddu .

Boed o’n adwaith, yn ffordd o symud ymlaen, yntau ydi hyn yn gallu achosi rhwyg a all amharu ar undod a chryfder Cymdeithas Beldroed Chwaraewyr Proffesiynol sydd wedi bodoli ers dyddiau Billy Meredith?
Ers y penwythnos diwethaf, mae Cymdeithas Beldroed Chwaraewyr Proffesiynol wedi gosod canllawiau pendant iawn yn erbyn unrhyw chwaraewr sy’n ymddwyn yn amhriodol o ran hiliaeth.

Un o’r canllawiau pendant yw y gall chwaraewr sydd wedi ymddwyn yn hiliol wynebu newid pendant yn eu cytundeb gyda’r clwb, ac mewn rhai achosion gael eu diswyddo’n gyfangwbl.

Gweler mwy am y canllawiau wrth ddilyn y ddolen ymahttps://www.bbc.co.uk/sport/0/football/20054166

Ond nid hiliaeth ydi' r unig beth gododd i ben mewn gemau peldroed yn ddiweddar.

Pwy all amddiffyn y digwyddiad yn Hillsborough pan redodd gwr o ganol cefnogwyr Leeds ar y cae, a tharo golwr Sheffield Wednesday i'r llawr?

Y diwrnod wedyn roedd yna gyhoeddiad ar y radio fod yr heddlu yn ceisio adnabod y gŵr yma - ond ar y teledu fe redodd y gŵr heibio stiwardiaid, a oedd o fewn dwy lathen iddo, gan wneud dim ! Roedd y cefnogwyr yma, fel nifer o rai eraill, yn cael yr hawl i ganu a sarhau unigolion o fewn y gêm - gan weld dim yn cael ei wneud ynglŷn â'u hymddygiad cyhoeddus.

Siom hefyd oedd gweld mai sefyll oedd cefnogwyr Leeds, a hyn mewn rhan o stadiwm a welodd un o’r trychinebau mwyaf yn y byd peldroed, ac a arweiniodd at sicrhau ( yn dilyn Adroddiad Taylor yn 1989) fod meysydd peldroed yn dod yn rhai sydd â seddau ar gyfer pawb.

Dywedodd Leroy Rosenior ar raglen 'The Football League Show' nos Sadwrn diwethaf - petae'r stiwardiaid yn sicrhau fod pawb yn eistedd yn eu seddau yn ôl y rhif ar y ticed, yna byddai’n hawdd adnabod unrhyw unigolyn.

Yn sicr mae digwyddiadau diweddar yn y byd peldroed yn brawf pendant nad ydi hi’n gem brydferth wedi’r cwbl.

• Llyfrnodi gyda
• del.icio.us |
• Digg |
• Newsvine |
• NowPublic |
• Reddit
• - Beth yw hwn?

Yn 1966 mi es i weld pob gem yng Nghwpan y Byd yn Wembley - deg gem - a chyfanswm pris y ticedi oedd £7 a pymtheng swllt ( £7-75), gan dalu £1 - 75 am diced i'r ffeinal yn Wembley! Roedd fy Mam yn credu fy mod yn hollol hurt yn talu cymaint am fynd i weld gem beldroed!

Heddiw rhaid talu £8 i weld Bangor yn chwarae yn Uwchgynghrair Cymru, ond tydi hyn yn ddim i'w gymharu â faint mae rhaid talu i weld gem yn Uwchgynghrair Lloegr.

Mae’r BBC wedi cynnal ymchwil i bris ticedi cyfoes gan nodi fod costau i weld gemau ar draws cynghreiriau Lloegr wedi codi bron12% dros y flwyddyn ddiwethaf.

Newcastle sydd yn cynnig y ticed rhataf i un rhan o'r stadiwm - £15 a hyn ond punt yn fwy na’r ticed rhataf i weld Wrecsam ar y Cae Ras. Ond gyda thiced mwyaf costus Wrecsam yn costio £18, rhaid talu £50 yn Newcastle.

Ond diolchwch nad ydych yn mynych Stadiwm Emirates i weld Arsenal yn rhy aml - £26 am y rhataf, ond £126 am y sedd orau. Wrth gwrs fe geir gostyngiad pris i'r rhai ohonom sydd yn hyn - es i weld Everton yn ddiweddar a thalu £23 yn lle £34 oherwydd fy oed!

Tra mae costau ar gyfartaledd yn Lloegr wedi codi 11.7%, ar 22% yn Uwchgynghrair Lloegr tra mae codiad chwyddiant ar brisiau yn gyffredinol yn y Deyrnas Gyfunol yn ddim mwy na 2.2%. Sut felly mae peldroed yn gallu cyfiawnhau’r chwyddiant mewn prisiau ticedi, o’i gymharu â chwyddiant, a hynny ar bob lefel o beldroed proffesiynol?

Ond, gyda dros 92% o seddau yn yr Uwchgynghrair wedi eu gwerthu'r llynedd, anodd ydi honni fod y prisiau yma yn rhwystro cefnogwyr rhag mynd i'r gemau.

Mae Cymdeithas Cefnogwyr Peldroed eisiau’r Gymdeithas Beldroed ddefnyddio rhan o’r £3 biliwn y caiff am ddarlledu gemau, ei ddefnyddio i wneud gemau yn rhatach. Ond os yw’r caeau yn llawn, pwy sydd am geisio cyflawni hyn yn sydyn?

Yn y cyfamser, £20 ydi pris ticed i weld Borrussia Dortmund yn y Bundesliga yn yr Almaen, gyda thyrfaoedd ar gyfartaledd yn cyrraedd 40,000,mewn cynghrair gystadleuol gyda siawns go dda i unrhyw un o nifer o dimau ddod yn bencampwyr.

Tybed beth ydi cost awyren rad i’r Almaen ar ddydd Sadwrn?

• Llyfrnodi gyda
• del.icio.us |
• Digg |
• Newsvine |
• NowPublic |
• Reddit
• - Beth yw hwn?

Mae'r timau Cymreig yn gosod safon uchel o fewn eu cynghreiriau yn Lloegr - Casnewydd a Wrecsam yn y Gyngres, Caerdydd yn y Bencampwriaeth ac Abertawe, er yn dangos anghysondeb ar hyn o bryd, yn cadw eu pennau uwch y dŵr yn yr Uwchgynghrair - ond mae pryderon yn codi ynglŷn â dyfodol ein tîm cenedlaethol.

Gyda dyfodol Craig Bellamy fel chwaraewr rhyngwladol yn dod yn fwy a mwy ansicr, ydi'n wir dweud nad oes cymaint o chwaraewyr rhyngwladol Cymreig yng ngharfannau y timau dwi newydd gyfeirio atynt?

Tybed a ydi'r ymdrech am lwyddiant yn golygu nad oes cymaint o le i beldroedwyr ifanc o Gymru mwyach yn eu timau lleol a bod rhaid chwilio am chwaraewr o safon (beth bynnag y gynghrair) o'r tu allan i Gymru?

Gellir ddadlau, i gyfeiriad Wrecsam a Chasnewydd fod yna ddigon o chwaraewr galluog a allai fod wedi cael eu hystyried, ond sydd wedi cael eu hanwybyddu - ac wedi ymuno a thimau eraill. Esiampl o hyn ydi Craig Jones a symudodd o'r Seintiau Newydd i Bury; Nathan Craig a aeth i Torquay; Rhys Griffiths a ymunodd a Plymouth; a Jake Cassidy a aeth o Gyffordd Llandudno i Airbus, ac yna i Wolverhampton Wanderers - cyn mynd ar fenthyg i Tranmere Rovers.

Faint o sylw mae ein timau Cymreig megis Casnewydd a Wrecsam, er gwaethaf eu llwyddiant hyd yn hyn, yn ei roi i ddatblygiad chwaraewyr ifanc o fewn Cymru heddiw?
Does dim dadlau fod Joe Allen wedi cyrraedd safon uchel - enillydd gwobr chwaraewr gorau Cymru'r wythnos diwethaf, a bod y diolch i Abertawe am hyn, cyn gweld Allen yn symud i Lerpwl.

Cafodd Aaron Ramsey ei ddatblygu gan Gaerdydd cyn symud i Arsenal, felly hefyd Joe Ledley ac Adam Matthews cyn mynd i Celtic.

Ond, ai timau ble fydd chwaraewyr yn cael ei datblygu yn hytrach na thimau all gadw eu doniau ifanc gorau ydi Abertawe a Chaerdydd erbyn heddiw?

Yn sgil hyn, a fyddwn yn gweld y chwaraewyr o Gymru (sydd yn chwarae i dimau yn Lloegr) yn tynnu allan o gemau rhyngwladol cyfeillgar (ac hefyd o gemau cystadleuol sydd ddim yn allweddol ) o dan orchymyn clybiau sydd heb unrhyw ddiddordeb mewn canlyniadau timau rhyngwladol?

Fel capten Cymru, mae'n debyg fod Arsenal wedi ei weld yn ddyletswydd arnynt i ryddhau Aaron Ramsey i chwarae dros Gymru. Tybed a fyddant lawn mor gefnogol, nawr fod Ashley Williams wedi ei benodi yn gapten yn ei le, ac Aaron yn ddim mwy nac aelod arall o'r garfan genedlaethol - ac a fydd Joe Allen yn cael ei ryddhau gan Lerpwl yn yr un modd ag a wnaeth gan Abertawe?

• Llyfrnodi gyda
• del.icio.us |
• Digg |
• Newsvine |
• NowPublic |
• Reddit
• - Beth yw hwn?

Hwyrach i chi gofio imi gyfeirio yn y blog yn ystod y Gemau Olympaidd at y ferch a gafodd ei magu ym Mro Morgannwg, ond sydd yn chwarae peldroed dros Ganada, sef Rhian Wilkinson.

Cefais ei chyfarfod ar ddiwedd y gêm rhwng Canada a Thîm GB pan drechodd Rhian a'i thîm ferched Prydain - a Rhian yn derbyn y Ddraig Goch gennyf yn sgil y llwyddiant.

Yr wythnos olynol, roedd Canada yn wynebu'r Unol Daleithiau yn Old Trafford, gyda'r Ddraig Goch yn cwhwfan yn y gwynt gan fam Rhian (sy'n hanu o Fro Morgannwg)

Cefais neges e-bost gan Rhian yr wythnos yma, a dyma'n fras ei gynnwys:

"Diolch yn fawr am anfon copïau o'r erthyglau a ysgrifennoch amdanaf. Rwyf erbyn hyn wedi dychwelyd i chwarae gyda fy nghlwb yn Norwy.

Roedd y Gemau Olympaidd yn brofiad anghredadwy, a rhywbeth y byddaf yn ei gofio am weddill fy mywyd.

Roedd ennill y Fedal Efydd wedi gwireddu fy mreuddwydion, ac fel geneth ifanc, roedd ennill medal yn rhywbeth yr oeddwn wedi breuddwydio amdano.

Hoffwn ddiolch i chi, a'ch gwraig, am fod yn rhan o'r profiad.

Mae fy etifeddiaeth Gymreig yn bwysig iawn i mi, cymaint felly nes iddo fod y lle cyntaf imi ymweld unwaith roedd y Gemau wedi dod i ben, ac roedd gweld y Ddraig Goch yn hedfan i mi yn y gemau peldroed yn ARBENNIG iawn.

Diolch i chi am eich cefnogaeth gobeithio y cawn gyfarfod eto."

Ie, y Gymraes nas gwyddai lawer ohonom amdani, ac a gipiodd y Fedal Efydd gyda thîm peldroed Canada.

Bydd tîm peldroed Cymru yn brwydro am eu heinioes mewn gem allweddol yn erbyn yr Alban yr wythnos nesaf. Allai wneud dim gwell na dweud wrthynt am efelychu'r balchder mae Rhian yn ei ddangos yn ei chefndir Cymreig - a rhoi, fel Rhian y gorau i mewn i'r gêm.

Does ond gobeithio fod ein peldroedwyr hefyd yn gallu dangos eu bod yn wladgarwyr tra mad.

Cym on Cymru - mae'r esiampl wedi ei osod.

• Llyfrnodi gyda
• del.icio.us |
• Digg |
• Newsvine |
• NowPublic |
• Reddit
• - Beth yw hwn?