Archifau Medi 2010

Oes yna sefyllfa unigryw yn bodoli yn y gororau ble mae tîm pêl-droed pentref Morda (yn Sir Amwythig, ychydig dros y ffin) yn chwarae eu pêl-droed mewn cynghreiriau yn Lloegr ac yng Nghymru?

Mae tîm cyntaf Morda yn chwarae ym mhrif gynghrair Sir Amwythig tra bod eu hail dîm yn chwarae yn ail adran cynghrair JT Hughes, sef cynghrair ar gyfer timau yng nghanolbarth Cymru.

Hwyrach fod eu sefyllfa yn unigryw, er bod yna nifer o esiamplau o dimau sydd wedi eu lleoli mewn un wlad, ond yn chwarae mewn cynghrair o fewn gwlad wahanol.

Mae Berwick Rangers o Swydd Northumberland yn Lloegr yn chwarae yn nhrydedd adran cynghrair yr Alban gyda'r ail dîm yn chwarae mewn cynghrair rhanbarthol, hefyd yn yr Alban, er eu bod yn aelodau llawn o gymdeithas bêl-droed Northumberland.

Mae tri thîm wedi ennill cynghrair mewn 'gwlad alltud' sef Monaco yn ennill cynghrair Ffrainc, Derry City o Ogledd Iwerddon yn cipio pencampwriaeth y Weriniaeth ac yn ôl yn 1941 (yng nghanol yr ail ryfel byd) Rapid Vienna o Awstria yn bencampwyr ar gynghrair yr Almaen yn 1941!

Draw yn y Swistir, mae clwb Vaduz o wlad Liechtenstein, yn talu ffi flynyddol i Gymdeithas Bêl Droed y Swistir am gael yr hawl i chwarae yn ail adran eu cynghrair cenedlaethol gan nad oes cynghrair cenedlaethol wedi ei sefydlu yn Liechtenstein.

Mae chwe thîm arall yn bodoli yn y wlad fach yma gyda phob un ohonynt yn chwarae o fewn gyfundrefn y Swistir, a hynny mewn safon isel iawn.

Tra bod Morda yn unigryw yn rhoi dau dîm ar y cae mewn dwy wlad, hwyrach fod timau Liechtenstein hefyd yn creu rhyw fath o sefyllfa unigryw, ble maent yn cystadlu mewn gemau cynghrair mewn un wlad, ond yn chwarae gemau cwpan cenedlaethol o fewn eu gwlad eu hunain.

A dyna sydd yn rhoi'r hawl i Liechtenstein anfon tîm i Gwpan Europa - fel rheol Vaduz - yn flynyddol.

Os ydych yn gwybod am sefyllfa yna diddorol fyddai cael clywed gennych. Tebyg mai Bae Colwyn sydd yn chwarae yng nghynghrair Evo-Stick yn Lloegr, ond yn cystadlu yng nghwpan arfordir Gogledd Cymru ydi'r unig sefyllfa debyg yng Nghymru.

• Llyfrnodi gyda
• del.icio.us |
• Digg |
• Newsvine |
• NowPublic |
• Reddit
• - Beth yw hwn?

Sut mae mesur llwyddiant?

Yn y byd sy'n llawn materoliaeth y dyddiau yma, yna drwy roi gwerth ariannol ar bopeth mae mesur gwerth os ydym am wrando ar nifer fawr o bobl o'n cwmpas.

Ond beth petai'r hyn sydd gennych yn unigryw, fel medal enillwr Cwpan y Byd?
Yr wythnos yma, mae Nobby Stiles gynt o Manchester United ac aelod o dîm llwyddiannus Lloegr yng Nghwpan y Byd yn 1966 wedi rhoi'r fedal a enillodd yn Wembley ynghyd â nifer o drysorau eraill ar werth er mwyn sicrhau rhywbeth i'w deulu ar gyfer y dyfodol.

Nobby Stiles ym 1966

Nid Stiles ydi'r unig un i werthu'r hyn a chwysodd amdano ar bnawn cynnes yn Wembley bron hanner can mlynedd yn ôl.

Mae Gordon Banks, George Cohen, Ray Wilson, Alan Ball a Geoff Hurst hefyd wedi gwneud yr un peth!

£150 yr wythnos mewn cyflog oedd y mwyaf y derbyniodd Stiles am chwarae i Manchester United, ac fe gafodd £1000 fel bonws gan Loegr am ennill Cwpan y Byd - ond dim ond £600 ar ôl talu treth!

Mae John Terry, amddiffynnwr Chelsea, yn derbyn tua £170,000 yr wythnos, ac fe roedd y Gymdeithas Bêl Droed yn cynnig bonws o £300,000 yr un i aelodau tîm Lloegr pe bydde nhw wedi ennill Cwpan y Byd yr haf diwethaf.

Os gall clybiau a hefyd Cymdeithasau Pêl Droed, megis Lloegr, gynnig cymaint i chwaraewyr cyfoes, pam nad oes 'na gynllun ar gael i gefnogi gwir gewri'r gêm y dyddiau yma?

Mae Cymdeithas y Pêl-droedwyr Proffesiynol - y PFA - yn honni eu bod yn gwneud popeth ar gyfer sicrhau tegwch i'w aelodau.

Ond pan aethant ati i wario £1.9miliwn ar ddarlun 'Going to the Match' gan L.S.Lowry a'i brynu ar ran ei gymdeithas fel rhan o gelfyddyd y gêm, faint o ystyriaeth a roddwyd i sefyllfa'r chwaraewyr hynny a ddaeth a chlod a bri i Loegr, ac i Gymdeithas y Chwarewyr, yn ôl yn 1966?

Mae hynny o bosib wedi sefydlu'r llwybr sydd wedi arwain at weld sêr cyfoes y byd pêl-droed yn derbyn llawer mwy na mae eu safon yn ei haeddu?

Ac os am sôn am gelfyddyd, be ydi gwir werth y gelfyddyd a welwyd yn ôl yn 1966 ar borfa las tesog Wembley?

Ie, mi roeddwn innau yno, ac fel Nobby Stiles, mae'r atgofion o'r cyfnod yna mor fyw ac erioed ac yn amhrisiadwy.

Ar y llaw arall oes yna unrhyw un o chwaraewyr presennol Manchester United yn barod i gyfrannu'r bunt gyntaf i gronfa a fyddai yn sicrhau fod y rhai dyma'n paratoi'r llwybr ar gyfer mawredd ariannol y rhai presennol?

Hwyrach nad oedd ein harwyr yn ddigon ffodus o fod yn chwarae mewn cyfnod pan oedd arian yn llifo fel llaeth a mêl, ond oes yna unrhyw beth yn rhwystro arweinwyr a chwaraewyr cyfoes y byd pêl-droed rhag sefydlu cronfa all sicrhau fod y rhai a sefydlodd y ffordd ar gyfer cyfoeth y presennol yn cael eu cydnabod o fewn ysbryd yr hyn a fyddai rhywun yn ei disgwyl gan fudiad cynorthwyol megis undeb y PFA?

• Llyfrnodi gyda
• del.icio.us |
• Digg |
• Newsvine |
• NowPublic |
• Reddit
• - Beth yw hwn?

Doedd hi 'n fawr o syndod a dweud y gwir.

Roedd John Toshack eisoes wedi cyhoeddi mai dyma fyddai ymgais olaf i geisio dod â llwyddiant i Gymru.

Ond i mi, sefydlu Brian Flynn fel rheolwr y tîm dan21 a'r gwelliant a fu yn eu canlyniadau hwy oedd ei lwyddiant pennaf.

Ydi hyn yn golygu mai Flynn fydd y rheolwr newydd?

Mae yna ddigon i'w ystyried, a phetai hynny am ddigwydd rhaid hefyd sicrhau na fyddai safonau datblygu chwaraewyr ifanc dim yn gostwng, heb ddylanwad cyson Brian Flynn.

John Toshack yn gadael

Rhaid hefyd, yn fy marn i, sicrhau fod yna agweddau o hyfforddiant cyfoes o fewn y tîm rheoli.

Gyda Dean Saunders eisoes yn rhan o'r tîm hyfforddi presennol, rwyf o'r farn y dylid cadw Saunders am y tro o leiaf - o dan arweiniad y rheolwr newydd (petai'r rheolwr yn dymuno hynny).

Mae yna ddigon o gefnogwyr yn mynd i ddweud nad ydi Saunders wedi cyflawni dim gyda Wrecsam. Ond roedd yn ddigon dewr a digon o Gymro i ddod i helpu'r clwb.

Ac er bod llawer o gefnogwyr Wrecsam yn parhau i gredu mai tîm a ddylai chwarae yn adrannau uwch pêl-droed Lloegr ydi tîm y Cae Ras, hwyrach mai llwyddiant mwyaf Saunders, o ystyried sefyllfa Wrecsam oddi ar y cae, ydi cadw'r tîm yng Nghyngres y Blue Square!

Hwyrach mai rheolwr dros dro - am ddwy gêm o bosib - fydd yr ateb gorau ar hyn o bryd a dod a Brian Flynn ynghyd â David Williams sydd yn adnabod y garfan ac sydd wedi ennill parch y chwaraewyr ac i gadw pethau'n drefnus gan gadw Dean Saunders fel rhan o'r tîm hyfforddi.

Yn sgil hyn, gellir dod â gwaed ifanc a syniadau newydd a chyfoes i mewn i'r gyfundrefn hyfforddi a hwyrach gweld sut y gall John Hartson gyfrannu at barhau llwyddiant y tîm dan21, cyn wedyn mynd ati i asesu eu cyfraniadau a phenodi rheolwr newydd, dros gyfnod hir.

• Llyfrnodi gyda
• del.icio.us |
• Digg |
• Newsvine |
• NowPublic |
• Reddit
• - Beth yw hwn?