Bleith cladaich
Na ceithir pròiseasan ann am bleith
Bidh forsa na mara ag atharrachadh dealbh-tìre a' chladaich. Bidh tuinn a' faighinn lùth bhon ghaoith. Mar as làidire a bhios an tonn, 's ann as motha a nì e de bhleith.
Tha ceithir pròiseasan ann am bleith:
Obair haidreolaig
'S e forsa nan tonn a' bualadh air a' chladach agus air bearraidhean a th' ann an obair haidreolaig. Bidh neart nan tonn a' forsadh èadhar a-steach do sgoltaidhean, ga dhlùthadh agus a' briseadh na creige às a chèile nuair a thèid am bruthadh mu sgaoil.
Bleith
Bidh bleith a' tachairt nuair a bhios clachan agus molagan a tha air an giùlan leis na tuinn a' bualadh na chèile, agus mean air mhean, bidh iad a' fàs nas lugha, nas cruinne agus nas mìne.
Sgrìobadh
Canar sgrìobadh ris a' phròiseas sa bheil clachan agus molagan, a tha air an giùlan leis na tuinn, a' bleith nan creagan nuair a tha iad air an sadail ris na bearraidhean.
Leaghadh
Bidh leaghadh (no caitheamh ceimigeach) a' tachairt nuair a leaghas ceimigich san t-sàl na mèinnirean anns na creagan, agus a bheir sin orra briseadh.
