Cyfrwng dramaSymudiad

Symudiad ydy:

• yr actorion yn symud ar y llwyfan, yr hyn mae hynny'n ei gyfleu i'r gynulleidfa ac effaith hyn ar y ddrama
• y dulliau corfforol mae actorion yn eu defnyddio i helpu i greu cymeriadau, ee symud yn gyflym, yn ysgafn neu'n araf
• y ffordd mae actorion yn defnyddio pwysau a gofod i gyfleu cymeriad
• sut mae actorion yn symud mewn perthynas â chymeriadau eraill ar y llwyfan, ee yn ofnus, yn fygythiol neu mewn ffordd gyfeillgar

Mae'r clip Saesneg hwn yn dangos actorion yn y Soho Theatre yn Llundain yn arbrofi gyda symudiad ac iaith y corff. Ydy'r ffordd mae'r actorion yn rhoi cynnig ar ddulliau gwahanol o gusanu yn newid y ffordd rydyn ni'n darllen perthynas y cymeriadau?

Symudiad a chymhelliad

Wrth ddewis symudiad rhaid ystyried teimladau cymeriad ar unrhyw adeg yn ystod y ddrama, a’r hyn sy'n fwyaf effeithiol yn weledol. Er enghraifft, gallai sefyll yn llonydd mewn ymson emosiynol fod yn bwerus ond gallai fod angen rhagor o gyflymder ac amrywiaeth o symudiadau mewn golygfeydd eraill i gadw sylw'r gynulleidfa.

Ceisia gysylltu symudiad â chymhelliad y cymeriad. Gallai syniad newydd ysbrydoli cymeriad i godi o gadair. Galli di hefyd ystyried sut mae emosiynau'n ysbrydoli symudiad. Gallai gwneud penderfyniad anodd achosi i gymeriad gerdded yn ôl ac ymlaen ar draws y llwyfan. Mae'n bosib cyfleu panig drwy ailadrodd symudiadau nerfus sy'n cyflymu wrth i ofn a thensiwn gynyddu.