Adolygu: Sut i ddechrau arni

Cyhoeddwyd yr erthygl hon ar 4 Ebrill 2022.

Mae arholiadau ac adolygu’n gallu bod yn heriol mewn pob math o ffyrdd gwahanol - ond paid â phoeni, mae tîm Meddwl ar Waith yma i dy helpu! Yn y bennod hon, mae’r tîm yn trafod sut aethon nhw ati i ddechrau adolygu.

Sara “Os wyt ti'n cael trafferth ysgogi dy hun, gwna'r dasg gyntaf yn un o'r rhai mwyaf diddorol neu bleserus”.

Dr Rob “Mae’n medru helpu i gymryd 3 neu 4 munud cyn dechrau adolygu i drio gwagio’r meddwl o bethau eraill sydd wedi bod yn mynd ymlaen. Os oes pethau eraill ar dy feddwl di, gwna restr ohonyn nhw, a rho’r rhestr yn rhywle saff tan ar ôl yr adolygu. Compartmentalise ‘dan ni’n galw hyn.”

Angharad “Paid â chymharu dy hun ag eraill. Mae pawb yn dysgu ac yn gweithio mewn ffyrdd gwahanol. Gwna beth sy’n gweithio orau i ti.”

Cai “Os dwyt ti ddim yn siŵr beth i’w adolygu neu sut i ddechrau adolygu, gofynna wrth athro pwnc os oes modd cael sesiwn fer i fynd dros bwyntiau pwysicaf y cwrs.”

Jona “Mae trefn adolygu pawb yn wahanol. Dwi, yn bersonol, yn hoff o ddechrau gyda’r pwnc trymaf, fel mathemateg neu bwnc llawn traethodau. Wrth wneud hyn ar ddechrau’r dydd mae popeth arall sy’n dilyn yn teimlo gymaint yn haws.”

Lois “Mae’n anodd canolbwyntio pan mae pob dim yn flêr, felly dwi’n gwneud yn siŵr bod fy nesg i’n dwt, cael y ffeiliau cywir allan, digon o bensiliau lliw, a dwi’n barod i fynd.”

Jeia “Paid â meddwl bod angen gweithio drwy’r dydd! All neb ganolbwyntio am oriau diddiwedd. Rhaid cael toriad i ail-egnïo ac ail-baratoi. Mae’n bwysig cofio hefyd bod pynciau gwahanol angen trefn weithio gwahanol. Efo rhai pynciau, fel Saesneg, dwi ddim yn teimlo bod dau ddeg pump ymlaen, pum munud ffwrdd, yn ddigon – erbyn i mi ganolbwyntio a dechrau deall, mae’n amser stopio. Ond efo pwnc fel Almaeneg mae’r drefn 25/5 yn gweithio’n dda.”

Manon “Dwi’n hoffi cynllunio pethau hamddenol i gymryd fy meddwl o’r arholiadau, er enghraifft, mynd mas am bryd o fwyd neu fynd draw i dŷ ffrind - mae'n dda cael rhywbeth i edrych ymlaen ato.”

Jac “Os wyt ti wedi gadael hi’n rhy hwyr, paid â panicio, y peth gorau i’w wneud yw adolygu ar gyfer yr arholiad cyntaf, ac yna creu rhyw fath o gynllun sy’n cyd-fynd â trefn yr arholiadau wrth iddyn nhw ddod.”

Cyfres o ffilmiau i dy gefnogi di yn ystod cyfnod dy arholiadau TGAU yw Meddwl ar Waith. Mae’r bobl ifanc sy’n cyfrannu at y ffilmiau naill ai - fel ti - ar fin sefyll eu harholiadau neu wedi eu sefyll nhw’n barod. Mae’r tîm yn dod o bob rhan o Gymru ac er bod profiad pawb yn wahanol, mae un peth ganddyn nhw’n gyffredin - llwyth o gyngor da, tips a phrofiadau defnyddiol i’w rhannu gyda ti.

Yn y gyfres hon, byddwn hefyd yn clywed gan arbenigwyr, fel yr arbenigwr cof, Dr Rob Hughes fydd yn rhannu tips ar sut i gofio pethau. Bydd Dr Rob a gweddill y Criw Cynghori’n rhannu llwyth o gyngor gwych, gan gynnwys eu tips adolygu a chyngor ar sut i aros yn bositif.

Os wyt ti’n poeni am bethau, cofia ddweud wrth rywun. Siarada gyda ffrind, rhiant, gwarchodwr, athro neu oedolyn rwyt ti’n ymddiried ynddyn nhw. Os yw dy iechyd meddwl yn dioddef, mae mynd i weld dy feddyg teulu’n le da i ddechrau. Gall dy feddyg ddweud wrthot ti pa gefnogaeth sydd ar gael, rhoi cyngor ar driniaethau gwahanol a chynnig apwyntiadau rheolaidd i weld sut mae pethau’n mynd.

Os wyt ti angen cefnogaeth yn y fan a’r lle, cysyllta gyda Childline, ble cei di siarad gyda chwnselydd. Mae’r llinellau ffôn ar agor 24 awr y dydd, saith diwrnod yr wythnos.

Mae rhagor o wybodaeth ddefnyddiol ar BBC Action Line (Cynnwys Saesneg).