XİN-in həbs edilmiş vəzifəli şəxsləri apellyasiya məhkəməsinə müraciət edib, Azərbaycan ÜST-ə 10 milyon dollar ianə edib, Bakı-London-Bakı reysi açılır
Şəklin mənbəyi, PRESIDENT.AZ
XİN-in həbs edilmiş vəzifəli şəxsləri apellyasiya məhkəməsinə müraciət edib, Azərbaycan ÜST-ə 10 milyon dollar ianə edib və 30-dan çox ölkəyə yardım ayırıb, AZAL Bakı-İstanbul arasında uçuşları 4 reysədək artırır, həftədə bir dəfə isə Bakı-London-Bakı reysini həyata keçirəcək, ABŞ 2021-ci ilin iyulunda ÜST-dən çıxacağını rəsmən elan edib - bu və digər xəbərlər BBC News Azərbaycanın icmalında.
Şəklin mənbəyi, bakuappealcourt.gov.az
XİN-in həbs edilmiş vəzifəli şəxsləri apellyasiya məhkəməsinə müraciət edib
Dövlət Təhlükəsizliyi Xidmətinin iyulun 3-də Xarici İşlər Nazirliyində keçirdiyi əməliyyat nəticəsində qurumun həbs olunmuş vəzifəli şəxsləri apellyasiya məhkəməsinə müraciət edib.
DTX-nın yaydığı məlumata görə, iyulun 3-də XİN-in İşlər idarəsinin müdiri, Nazirliyin Tender Komissiyasının sədri Fərhad Molla-zadə, İşlər İdarəsinin Təsərrüfat şöbəsinin müdiri Səlim Əlizadə "vəzifə səlahiyyətlərindən sui-istifadə etmə, mənimsəmə", Konsulluq idarəsinin Konsulluq-hüquq şöbəsinin rəisi Nurupaşa Abdullayev isə "rüşvət alma faktlarına" görə həbs edilib.
DTX onların "çoxsaylı qanunsuz əməllərə yol vermələrinə əsaslı şübhələr müəyyən edildiyini" açıqlayıb.
Azərbaycan Respublikasının vahid məhkəmə portalında Fərhad Molla-zadə və Nurpaşa Abdullayevin məhkəmə işləri qeyd olunub.
Onların hər ikisinin işinə Bakı Apellyasiya Məhkəməsində hakim İlqar Murquzov baxacaq.
Məsələ ilə bağlı Xarici İşlər Nazirliyindən şərh almaq mümkün olmayıb.
ÜST-ə 10 milyon dollarlıq ianə, 30-dan çox ölkəyə isə yardım
Azərbaycan ÜST-ə 10 milyon dollar ianə edib və 30-dan çox ölkəyə humanitar və maliyyə yardımı ayırıb, Prezident İlham Əliyev bunu BMT Baş katibi Antonio Guterreslə çərşənbə günü baş tutan telefon söhbətində deyib.
AzərTac agentliyi xəbər verir ki, cənab Əliyev telefon söhbətində Azərbaycan COVID-19 pandemiyasına qarşı mübarizədə Baş katibin və BMT-nin səylərini, o cümlədən çoxtərəfli əməkdaşlığı dəstəklədiyini bəyan edib.
"Prezident İlham Əliyev Qoşulmama Hərəkatının sədri statusunda üzv dövlətlər adından BMT Baş Assambleyasının COVID-19-a həsr olunmuş xüsusi sessiyasının çağırılması barədə müraciətinə qısa müddətdə cavab verdiyinə görə Baş katibə təşəkkürünü çatdırıb," - agentlik yazır.
Bakı-İstanbul arasında uçuşların sayı artırılır
Şəklin mənbəyi, AZAL.az
AZAL gələn həftədən etibarən Bakı və İstanbul arasında yerinə yetirilən aviareyslərin tezliyini artıracaq.
Bununla da, Bakı-İstanbul-Bakı istiqaməti üzrə yerinə yetirilən uçuşların ümumi sayı həftədə dörd reys artırılaraq səkkiz reysə çatdırılacaq. Uçuşlar çərşənbə axşamı, cümə axşamı, şənbə və bazar günləri həyata keçiriləcək.
"Tariflər avqustun sonunadək yerinə yetirilməsi planlaşdırılan xüsusi reyslərin satışı üçün tətbiq edilən tariflərilə analojidir," - aviaşirkət bildirib.
AZAL bildirib ki, tələbələr aviabilet alışı zamanı AZAL-ın reyslərində 30 faiz həcmində güzəştdən yararlana biləcəklər. Bunun üçün aviaşirkətin saytında təxsis rəsmiləşdirildikdən sonra immiqrasiya sənədinin və pasportun skan edilmiş surəti saytda geri əlaqə forması və ya WhatsApp mesenceri vasitəsilə aviaşirkətin çağırış mərkəzinə göndərilməlidir.
Yeni qaydalara əsasən, uçuşlara yalnız koronavirus (COVID-19) testindən son 48 saat ərzində keçən və nəticəsi neqativ çıxan sərnişinlər buraxılacaq.
Koronavirus testlərini isə sərnişinlər həkim göndərişi olmadan Tibbi Ərazi Bölmələrini İdarəetmə Birliyi (TƏBİB) tərəfindən akkreditə olunmuş aşağıdakı laboratoriyalarda verə bilərlər.
- Referans laboratoriyası;
- Leyla klinikası;
- Memorial klinikası;
- Bona Dea xəstəxanası;
- İnci laboratoriyası;
- Bakı Xüsusi Təhlükəli İnfeksiyalara Nəzarət Mərkəzi (XTİNM);
- Kaspian Hospital;
- UltraLab.
Həftədə bir dəfə Bakı-London-Bakı reysi
AZAL iyulun 16-dan Bakı-London-Bakı reyslərinə də başlayır. Aviaşirkət bu reysləri həftədə bir dəfə olmaqla avqustun 27-dək təşkil etməyi planlaşdırır. marşrut üzrə aviabilet satışı xüsusi şərtlərə riayət edilməklə həyata keçiriləcək.⠀
Aviaşirkət bildirir ki, Bakı-London reysi ilə Böyük Britaniyaya giriş hüququ olan sərnişinlər daşınacaq. Böyük Britaniyanın tətbiq etdiyi yeni qaydalara əsasən, uçuşdan 48 saat əvvəl gov.uk saytında onlayn qaydada anket doldurulması tələb olunur. Qeyd edilən müddətdə anket doldurulmadığı halda sərnişinlər Londonun "Hitrou" hava limanının miqrasiya orqanının əməkdaşları sərnişini 100 funt sterlinq məbləğində cərimə edə bilər.
London-Bakı reysinə Azərbaycan vətəndaşları və Azərbaycan Respublikasında daimi yaşayış üçün icazəsi olan digər dövlətlərin vətəndaşları buraxılacaq.
ABŞ BMT-yə ÜST-dən çıxacağını bildirib
Şəklin mənbəyi, EPA
ABŞ mediası Trump hökumətinin 2021-ci ildə Ümumdünya Səhiyyə Təşkilatından (ÜST) ayrılacağını Birləşmiş Millətlər Təşkilatına (BMT) rəsmi şəkildə bildirdiyini yazıb.
Razılaşmaya görə, ABŞ təşkilatdan ayrılacağını ən azı bir il öncədən xəbər verməlidir. Buna görə də ABŞ-ın üzvlüyünə 6 iyul 2021-ci ildə son veriləcək.
ABŞ-ın təşkilatdan çıxması ÜST-ün əsas maddi qaynağının kəsilməsi deməkdir.
İki illik büdcəsi 6 milyard dollar təşkil edən ÜST-ə bu ölkənin maddi dəstəyi 2019-cu ildə 553 milyon dollar olub.
Trump hökuməti koronavirusla mübarizədə səhv buraxmaqda günahlandırdığı ÜST-ü xeyli müddətdir ki, tənqid edirdi.
