Bin Ladenin oğlu adından "əl-Qaidə tərəfdarlarına çağırış"
Şəklin mənbəyi, AFP
Əl-Qaidə təşkilatı özünün sabiq lideri Üsamə Bin Ladenin oğlu, Həmzə Bin Ladenə aid olduğu deyilən səs müraciətini yayıb.
İlk dəfədir ki, təşkilat təbliğatında Həmzə Bin Laden əl-Qaidənin rəsmi üzvü kimi təqdim edilir.
Əl-Qaidə tərəfdarlarının Twitter şəbəkəsində paylaşdığı müraciətdə Həmzə Bin Laden ABŞ və onun müttəfiqləri üzərinə hücumlara səsləyir.
Üsamə Bin Laden 2011-ci ildə ABŞ qüvvələrinin Pakistanın Abbotabad şəhərində həyata keçirilən xüsusi əməliyyat nəticəsində qətlə yetirilib.
Onun ölümündən sonra əl-Qaidə təşkilatın ikinci şəxsi olmuş Ayman əl-Zəvahiri tərəfindən idarə olunur.
Həmzə Bin Ladenin harada olduğu məlum deyil. Hazırda onun 25 yaşlarında olduğu təxmin edilir.
2001-ci ildə ABŞ qüvvələrinin Əfqanıstana müdaxiləsi vaxtı Al-Jazeera kanalının yayımladığı görüntülərdə onun Taliban döyüşçüləri arasında nəzərə çarpdığı güman edilir.
Onun əl-Qaidə saytındakı audiomüraciətində Kabul, Bağdad və Qəzzadakı təşkilat tərəfdarları Vaşinqton, London, Paris və Tel-Əviv üzərinə cihada çağırılır.
