Eurovision 2018: LGBT bayrağına senzura qoyan Çinə yayım qadağası
Şəklin mənbəyi, MANGO TV
Avropa Yayım Birliyi (AYB) Çinin məşhur televiziya kanallarından birini LGBT bayraqlarına senzura tətbiq etdiyinə görə Eurovision mahnı müsabiqəsini yayımlamağı qadağan edib.
Mango TV-nin yarışmanın yarımfinalında göy qurşağı bayraqlarını və tatuları "bulanlıq" göstərməsi sosial mediada tənqid olunub.
Kanal həm də İrlandiya və Albaniya iştirakçılarının çıxışlarını yayımlamayıb.
Avropa Yayım Birliyi senzuraların onların müxtəliflik dəyərlərinə uyğun gəlmədiyini bildirib.
Qurum sözügedən kanalla əməkdaşlığını ləğv edəcəyini və yayım haqlarının alınacağını deyib.
Çinli sosial media istifadəçilərindən bəziləri senzura tətbiq edən kanalları boykot etməyə çağırıb, bəziləri isə artıq bu kanalları izləməyəcəyini söyləyib.
Şəklin mənbəyi, EPA
İrlandiya təmsilçisi Ryan O'Shaughnessy AYB-nin qərarını alqışlayıb.
"Biz əvvəldən demişdik ki, sevgi-sevgidir, fərqi yoxdur bu iki oğlan, iki qız və ya oğlan və qız arasındadır. Düşünürəm ki, bu həqiqətən önəmli qərardır", - o deyib.
Çin televiziya kanalının senzura tətbiq etdiyi çıxışında irlandiyalı təmsilçi iki oğlan rəqqasla müşayiət olunurdu.
