Uhandan gətirilən azərbaycanlılar Ankarada xəstəxanaya yerləşdirilib

Koronavirusun yayıldığı Çindən təxliyə edilən altı Azərbaycan vətəndaşı da daxil olmaqla 42 nəfər Türkiyədə xəstəxanaya yerləşdirilib.

Anadolu xəbər agentliyinin məlumatına görə, onlar 14 gün karantin müddətində Türkiyə paytaxtı Ankaradakı Zekai Tahir Burak xəstəxanasında saxlanılacaqlar.

Məlumata görə, xəstəxana bu müddət ərzində xəstə qəbul etməyəcək, ancaq Çindən təxliyə olunanlara xidmət göstərəcək.

Türkiyə rəsmiləri bildiriblər ki, xəstəxanada müşahidə olunan 42 nəfərin heç birində xəstəlik əlamətləri yoxdur. Hər üç gündən bir onlardan nümunələr götürüləcək.

Türkiyə Səhiyyə naziri Fahrettin Koca bildirib ki, xəstəxanada müşahidə olunanların hər biri fərdi otaqlarda qalacaq və onların istifadə etdikləri qida və ləvazimatlar birdəfəlik istifadə üçün nəzərdə tutulmuş məhsullar olacaq.

Koronavirusun yayıldığı Çinin Uhan şəhərindən Türkiyə, Azərbaycan, Gürcüstan və Albaniya vətəndaşlarını təxliyə edən Türkiyə təyyarəsi Ankaraya şənbə günü gətirilib.

Türkiyə Silahlı qüvvələrinə (TSK) məxsus A400M Atlas təyyarəsinin göyərtəsində 42 sərnişin olub, Türkiyənin Anadolu xəbər agentliyi bildirib.

Məlumata əsasən, təxliyə olunanların bədən temperaturu da daxil, tibbi göstəriciləri normal olub.

Azərbaycan Xarici İşlər Nazirliyi də azərbaycanlıların iki həftəyə yaxın Türkiyədə karantində qalacağı barədə məlumat yayıb.

"Vətəndaşlarımız könüllü əsasda 2 həftəlik müddətdə Türkiyə ərazisində karantin vəziyyətində saxlanılacaqlar, daha sonra Azərbaycana qayıdacaqlar"- XİN-nin bəyanatında deyilib.

Rəsmi məlumatlara görə, hazırda Çində 500-ə yaxın tələbə oxuyur. Bildirilir ki, yanvarın 29-da Bakıya dörd tələbə gətirilib.

Ancaq bəzi iddialara görə, onları Azərbaycan hökuməti gətirməyib, şəxsi hesablarına gəliblər. Bunu BBC News Azərbaycancaya danışan və Çində yaşayan digər tələbələr deyib. Onların sözlərinə görə, Bakıya gələnlər Uhan şəhərindən daha əvvəl çıxanlardır.

Çində koronavirusdan azı 259 nəfər ölüb, 12 minə yaxın adam isə bu virusa yoluxub.

Lakin bəzi məlumatlara görə, həqiqi rəqəmlər rəsmi göstəriciləri üstələyə bilər. Riyazi modellərə əsaslanan hesablamalardan birinə əsasən, yalnız Çinin Uhan şəhərində yoluxma hallarının sayı 75 mindən artıq ola bilər.

Ümumdünya Səhiyyə Təşkilatı (ÜST) Çindən yayılmağa başlayan yeni koronavirusun digər ölkələrə keçməsi ilə bağlı "səhiyyədə qlobal fövqəladə hal" elan edib.

ÜST bildirib ki, 18 ölkədə 98 yoluxma halı müəyyən edilsə də, ölüm qeydə alınmayıb. Bu ölkələrdə yoluxanların çoxu Çinin virusun yayılmağa başladığı Wuhan şəhərinə səyahət etmiş insanlardır.

Ümumdünya Səhiyyə Təşkilatı, "xəstəliyi digər ölkələrə yayma riski daşıyan fövqəladə bir hadisə olduqda" ictimai səhiyyədə beynəlxalq səviyyəli fövqəladə hal elan edir.

Bundan əvvəl beş belə fövqəladə hal elanı olmuşdu: