Treshja do të caktojë axhendën e takimit të rradhës ndërmjet dy palëve.

Takimi i ndërmjetësuesve ndërkombëtare bëhet në ditën kur Ekipi Negociator i prishtinës pritet të diskutojë në Prishtinë një dokument të ndërmjetësuesve për rezultate e deritanishme të procesit.

I dërguari amerikan për statusin, Frank Wisner, ai evropian, Wolfgang Ischinger dhe përfaqësuesi rus, Alexander Botsan Kharchenko pritet të caktojnë axhendën e takimit të rradhës ndërmjet Prishtinës dhe Beogradit.

Ky takim do të mbahet më 5 nëntor në kryeqytetin austriak.

Pak ditë më parë, treshja amerikano-evropiano-ruse i dorëzoi Prishtinës dhe Beogradit dokumentin prej 14 pikash.

Ky dokument nuk paragjykon statusin e Kosovës, por ofron disa parime që mund të çojnë në zgjidhjen e statusit.

Dokumenti

Serbia e ka kundërshtuar dokumentin e treshes në të cilin thuhet se Beogradi nuk do ta qeverisë Kosovën dhe nuk do të jenë i pranishëm fizikisht atje.

Udhëheqësit kosovarë kanë deklaruar se dokumenti i treshes ndërmjetësuese ndërkombëtare nuk mund të përjashtojë planin e Ahtisaarit, i cili sugjeron pavarësi të mbikqyrur.

Sipas Prishtinës zyrtare, pakoja e Ahtisaarit nuk mund të ndryshohet.

Ndërkohë i dërguari evropian për statusin, Wolfgang Ischinger, ka lënë të hapur mundësinë që dokumenti 14 pikësh i treshes të zgjerohet dhe t'iu paraqitet Prishtinës dhe Beogradit në takimin e 5 nëntorit në Vjenë.

Ekipi Negociator në Prishtinë mblidhet për të shqyrtuar një dokument 14 pikësh, të cilin negociatorët ndërkombëtarë ua dorëzuan Prishtinës dhe Beogradit në takimin e fundit në Vjenë.