Verhagen flet për opsionin e ndarjes se Kosovës po të aprovohet nga të dy palët.

Ai ka thënë se është e nevojshme që të dilet nga të menduarit brenda një rrethi që është i palëkundur te të dyja palët, qoftë edhe nëse kjo është edhe kundër parimeve të Grupit të Kontaktit.

“Unë kam thënë se deklarimi i përfaqësuesit të BE-së në Troikën për statusin nuk ka qenë një propozim i ri në tryezën e bisedimeve, por një shembull i nevojës se çdo propozim dhe të menduar kreativ është i domosdoshëm për suksesin e Vjenës”, tha ministri Verhagen.

Presidenti i Kosovës, Fatmir Sejdiu dhe kryeministri, Agim Çeku, ndërkaq kanë deklaruar se Prishtina as që e ka ndërmend ndarjen si opsion.

Presidenti Sejdiu ka thënë se është e drejtë e çdokujt të ketë mendimin e tij, porse Kosova është fort e përcaktuar për kompaktësinë dhe integritetin e vet.