Oana Lungescu BBC, Bruksel

	Kryeministri Thaçi tha se Kosova do të jetë shtëpia e të gjitha shtetasve

Pjesëtarët e këtij misioni të Bashkimit Evropian do të dislokohen duke filluar me javën e ardhshme.

Vendosja e misionit

BE priti nga ana diplomatike deri sa të bënte betimin presidenti pro-perëndimor serb, Boris Tadiç, për t'i dhënë dritën jeshile dislokimit të misionit policor dhe juridik, që është misioni më i madh i ndërmarrë ndonjëherë.

Detyra e 2000 policëve, gjykatësve dhe prokurorëve do të jetë një sfidë e vështirë.

Ata do të ndihmojnë për të parandaluar dhunimin e të drejtave të njeriut dhe për të siguruar se institucionet e brishta të Kosovës janë larg ndërhyrjes së politikës.

Gjëja shumë e rëndësishme është fakti që ky mision do të jetë në gjendje të ndërhyjë në sektorë delikatë si lufta kundër korrupsionit, krimit të organizuar, kapja dhe paditja e kriminelëve të luftës.

Gjermania dhe Italia janë kontribuesit më të mëdhenj, por të gjitha vendet e BE-së, përveç Maltës do të marrin pjesë në mision, bashkë me jo vendet evropiane si SHBA-ja, Turqia dhe Kroacia.

Është një sinjal i qartë për Serbinë dhe Rusinë, që e kundërshtojnë me forcë pavarësinë e Kosovës dhe këmbëngulin se prania e BE-së në Kosovë është e paligjshme.

Diplomatët evropianë thonë se Sekretari i Përgjithshëm, Ban Ki-Moon e mbajti shënim misionin e planifikuar në fillim të muajit Janar.

Kjo gjë mund të mos jetë dritë jeshile, tha një diplomat, por nuk është as dritë e kuqe.

Me dislokimin përgjatë 120 ditëve, misioni me emrin EULEX, pritet të zëvendësojë plotësisht OKB-në në fillim të qershorit.

Shefi i misionit është Yves de Kermabon, një gjeneral francez në pension dhe ish komandanti i forcave të Nato-s në Kosovë.