Arbër Vllahiu BBC, Nju Jork

Grupi i Kontaktit ka bërë me dije se përpjekja për të gjetur një zgjidhje të negociuar nuk duhet ta nënvlerësojë faktin se asnjëra palë nuk mundet në mënyrë të njëanshme ta bllokojë përparimin e procesit të zgjidhjes së statusit.

Grupi i Kontaktit u mblodh të mërkurën në Nju Jork, nën përkujdesjen e misionit amerikan, në një nivel ministror, ku morën pjesë edhe Sekretari i Përgjithshëm i NATO-s, përfaqësuesit e Bashkimit Evropian si dhe zyrtarë të OKB-së.

Në takim një raport për procesin e bisedimeve tetë muajshe, e ka paraqitur Martti Ahtisaari dhe ministrat i kanë dhënë atij një përkrahje të fuqishme në përpjekjet për të gjetur nje zgjidhje për statusin e Kosovës brenda vitit 2006.

Grupi i Kontaktit u ka bërë thirrje autoriteteve në Prishtinë dhe udhëheqësve të të gjitha komuniteteve që të përshpejtojnë zbatimin e standardeve, të promovojnë pajtimin dhe të krijojnë besimin mes bashkësive etnike.

Për Beogradin zyrtar ndërkaq Grupi i Kontaktit ka përsëritur kërkesën që të ndalë obstruksionet ndaj serbëve lokal të Kosovës dhe t'i lejojë ata të marrin pjesë në institucionet kosovare.

Mësohet ndërkaq se ministrat e jashtëm të vendeve anëtare të Grupit të Kontaktit i kanë hapur dritën e gjelbër zotit Ahtisaari që të përgatis dokumentin bazë me rekomandimin për zgjidhjen e statusit.

Ky dokument thuhet se do t'u paraqitet delegacioneve të nivelit të lartë të Prishtinës e Beogradit, kah gjysma e dytë e muajit tetor në Vjenë.

Po i njëjti do të paraqitet pastaj në një mbledhje të KS të OKB-së nga mesi i muajit nëntor.