Biyyoonni Lixaa yoo Raashiyaa kabajan waraanni hin jiraatu- Vilaadmir Puutin

Haguuggii Tamsaasa Kallattii

1. 20 Muddee 2025Daandii Xiyyaaraa Itoophiyaa sababa haala qilleensaan balalii dhaabe jedhe

   Yeroo ammaa haala qilleensaa balaliif mijataa hintaane kan Itoophiyaa naannoo gara garaatti mul'ataa jira irraa kan ka'e balalii biyya keessaa muraasa addaan kutuuf dirqamu daandiin qileensichaa ib seera.

   Dhaabbatichi "raaga haala qilleensaa arganneen haalli kun guyyoota muraasaaf akkasumatti kan turudha jedhe.

   Halli kun ammoo balaliiwwan gara naannolee biyyattii muraasatti taasisuuf kan isa rakkisu ta'uu ibse.

   Haa ta'u malee dhaabbatichi balaliiwwan biyya keessaa adda kute isaan kamfaa akka ta'an adda hin baasne.

   Haqamuu balalii kun haga haalli qilleensaa kun fooyya'utti kan turu ta'uu hubachiisee, namootni filannoo biraa akka fayyadaman akeekera.

   Battala haalli qilleensaa fooyya'e deebi'ee balalli isaa kan itti fufu ta'uu mammiltoota isaa akka beeksisu ibseera.

2. 20 Muddee 2025Niwkaasil 2-0 Cheelsii- Boqonnaa bahaniiru

   Istaadiyeemii St Jeemsi Paark irratti mo'achuuf kan rakkatu Cheelsiin har'as haga boqonnaatti galchii 2-0 dursamaa jira.

   Niik Woltimood deeggartoota Niwkaasiliin haala gaariin dhiifama gaafate.

   Torban darbe karra isaanii irratti galchuun masaanuu isaanii Sanderlaandiin kan mo'aman Niwkaasil har'a garuu galchii lamaa Cheelsii irratti lakkoofsise.

3. 20 Muddee 2025Itoophiyaafi Keeniyaan maal irratti waliigalan?

   Biyyootni lamaan tibbana waliigaltee daldala naannawa daangaa mallatteessaniiru.

   Waliigaltichis qaama waliigaltee daldalaa biyyota lamaanii Ebla darbe Mombaasaatti taasifamee yoo ta'u, Gama Itoophiyaan ministira daldalaafi walitti hidhaminsa Naannoo Kaasaahun Goofee fi gama Keeniyaan ammoo barreessaan Kaabinee Keeniyaa kan damee Invastimantiif daldalaatu mallatteesse.

   Biyyotni laman danqaawwan daldalaa isaan gidduu jiru hiri'isuun, daldala xixiqqaa daangaa ce'u irratti akka wal tumsan walii galaniiru.

   Adeemsa gumurukaa salphisuu, sanadoota walsimsiisuu, seera qabessummaa daldalaa fi itti fufiinsa qabu mijeessuuf qaama wali galtee isaaniti.

   Kunis keessumaa dubartootaafi dargaggootaa cimsuuf kan gargaaruu ta'u eeraniru.

   Wal ta'iinsa mootummootaafi dameewwan dhuunfaa biyyoota lamaanii gidduutti qindoomina cimaa kan uumu akka ta'e odeeffannoon ministeericharraa argame ni mul'isa.

4. 20 Muddee 2025Ameerikaan Waraana Sudaan nan dhaaba jette.

   Ameerikaan walwaraansi Sudaan keessatti dhiiga dhangalaasaa jiru bara haaraa Faranjoota irraa eegalee akka dhaabbatu ibsite.

   Ministeerri Dhimma Alaa Ameerikaa Maarkoo Ruubiyoon Jimaata kaleessaa akka jedhanitti, kaayyoon Ameerikaa Sudaan keessatti waraanni dhaabatee dhaabbileen namoomaa akka gargaarsa qaaqabsiisanidha jedhan.

   Ruubiyoon "biyyoottan hedduun lola wal waraansaa Sudaan keessatti deemaa jiruuf meeshaa waraanaa dhiyeessa jiru jedhan. Keessumaayyuu meeshaan waraanaa biyyoota hedduu qaxxaamuree harka humna Dafee Qaqqabaa Sudaan (RFS) gahaa jiraa jedhan.

   Kanaaf US biyyootan waraana kana keessa harka qaban jette waliin wal dubbataa jirti jedhaniiru.

   Kana malees humnoota wa;l waraanaa jiran lamaan waliinuu marii taasisuu eran.

   Pireezidaanti Tiraampi, waraanni kun akka dhaabatu yaalii taasisaa akka turan ni yaadatam.

   Humnoonni alaa waraana Sudaan keessatti hirmaatan eenyu fa'i?

5. 20 Muddee 2025'Yoo isin nan tuqne anis isin hin tuqu'-Puutiin

   Pirezdaantiin Raashiyaa Vilaadmiir Puutiin biyyoota dhiyaa akeekkachiisan.

   ''Yoo biyyoonni dhihaa Raashiyaa kabajaan ilaalan Raashiyaanillee isaan kabajji'' jedhan.

   Yoo sun ta'e ,Yukireen keessatti waraana akka itti hin fufne waadaa galan

   Pirezidaantichi gaaffii Moskoon biyyoota Awurooppaa tokko tokkoon haleeluuf karoorfattee jirti jedhus ''waan hin taane'' jechuun kuffiseera.

   Puutiin kana kan dubbatan haasaa sa'aatii dheeraaf taasisan akkasums gaaffii gaazexeessitootaa fi ummataarraa wayita deebii kennaniitti ture

   Gaaffiin miidiyaalee Raashiyaa fi ummanni irraa dhiyaate Puutiin dura qore ta'uu baatus NBC fi BBC'n miidiyaalee biyya alaa irraa gaaffii akka gaafatan hayyamameef.

   Putiin gaaffii gaazexeessitootaarraa waa'ee biyyota Awurooppaa ilaalchisee ka'eef wayiata deebii kennan "Yoo nu kabajan akkuma yeroo hunda nutis isaan kabajna''jedhan.

   Jalqaba baatii kanaa Puutiin, ''Raashiyaan Awurooppaa waliin waraana keessa galuuf hin karoorfanne yoo warri Awurooppaa barbaadan garuu ''qophaa'oo'' ta'uu ibsan.

6. 19 Muddee 2025Qondaalli mana sirreessaa TikTokiirratti 'siyaasa dubbate' hojiirraa ari'ame

   Qondaalli Mana Amala Sirreessaa Ugaandaa sababa TikTookiirratti mootummaa qeeqeef aangoorraa kaafame.

   Aangawoonni Ugaandaa wanti raawwate ''naamusa guddaa cabsuun'' qixxaata jedhan.

   Namni Laawireens Ampee jedhamu miidiyaa hawaasummaa gubbaa qondaalonni olaanoo malaammaltummaa raawwatu akkasumas sarbama mirgaa keessa qooda fudhatu himate.

   Qondaalota gadii irrattis dararaa raawwatu jechuun himate.

   Dubbii himaan mana amala sirreessaa loltuun ajaja fudhatu siyaasa keessa akka qooda fudhatu hin eeyyamamu jechuun BBC'tti himan.

   Paartileen mormituu murtee kana ''hacuuccaadha'' jechuun mormaniiru.

   Qondaalli kuni xalayaa hojiirra itti ari'ame TikTokii gubbaa qoodeera. ''Dhugaa deeggaruuf bilisa baheera,'' jedhe.

   Viidiyoo biraarratti miindaa malee jiraachuu kiyyaan hin yaadda'iinaa jedhee lammiilee Ugaandaaf dhaame.

   ''Wanti amma dalagaa jirru waa'ee maallaqaa miti, garuu waa'ee biyya bilisa baasuudha,'' jedhe.

   Kana dura duula filannoo qondaala paartii mormituu beeksisuuf miidiyaa hawaasummaa isaa itti dhimma baheera.

   Dabalata: Poolisiin Itoophiyaa waa'ee namoota miseensummaa Illuminaatiif nama afeeranii maal jedhe?

7. 19 Muddee 2025Baankiin Daldala Itoophiyaa du'a hojjetaa isaa Aadde Adaanachin gadda ibsate

   Baankiin Daldalaa Itoophiyaa 'du'a tasaa' hojjetaa isaanii Aadde Adaanach Kumsaan gadda ibsate.

   Maatii, firaafi waahila hojii isheef jajjabina akka hawwu ibsa baasen beeksiseera.

   Aadde Adaanach jalqaba torban kana Finfinneetti osoo leenjii baankii horodofaa ooltee gara mana jireenyaa ishee Sandaafaatti deebitu ajjeefamte.

   BBC'n poolisiifi maatiirraa akka odeeffateetti, konkolaataa keessa erga ajjeefamte booda reeffi ishee bineensa nyaate jedhame.

   Dabalata: Waa'ee ajjeechaa Aadde Adaanach maal beekna?

   Poolisiin nama ajjeechaa kanaan shakke barbaadaa akka jiru beeksiseera.

   Ajjeechaa haadha ijoollee lamaa kanarratti raawwate mufii kaaseera.

   Aadde Adaanach nama ajjeechaa isheen shakkame waliin hariiroo jaalalaa akka qabdu poolisiin ibseera.

   Shakkamaan ishee fuudhu malee rakkisaa ture jedhu kanneen dhimmicha beekna jedhaniifi BBC'n dubbise.

   Obboleessi Aadde Adaanach garuu dhimma kana akka quba hin qabne himu.

8. 19 Muddee 2025MM Abiy fi Pirezidantiin Somaaliyaa maal mari'atan?

   Ministirri Muummee Itoophiyaa Abiy Ahimad Pirezidantii Somaaliyaa Hasan Sheek Mohaammud Finfinneetti simachuun waliin mari'atan.

   Daawwannaa guyyaa tokkoof kan taasisan Pirezidant Hasan waliin maal mari'atuu malu?

   Itoophiyaafi Somaaliyaan muddama waggaaf adeeme booda waggaa darbe yoona kana ture jaarsummaa Pirezidantii Turkiin araara kan buusan.

   Yeroos gaaffii ulaa galaanaa Itoophiyaa deebisuufi kaan irrattis waliigalanii turan.

   Wantoota irratti waliigalan keessaa tokko akkana jedha;

   ''Tokkummaa daangaa Somaaliyaa haala kabajeen Itoophiyaan ulaa galaanaa amansiisaa argachuun ishee faayidaa garaagaraa qabu biyyoonni lamaan beekamtii kennu''.

   Ministirri Muummee Abiy ''waggaa tokko darbe marii hariiroo waloo itti fufuun marii bu'a qabeessa taasisneerra,'' jedhan.

   Somaaliyaan gaaffii ulaa galaanaa Itoophiyaaf deebii kennuu dandeessii?

   Marii kuni hariiroo cimsuu, naannicha tasgabbeessuufi misoomaaf kutannoo qabnu kan mirkaneessedha jedhan.

   Itoophiyaan bulchiinsa Somaalilaand Itoophiyaan qaama kiyya jettu waliin waliigalteen ulaa galaanaa taasiste Somaaliyaa waliin walitti ishee buusee ture.

   Gaanfa Afrikaatti walitti bu'iinsi ka'uu mala sodaa jedhus uumee ture.

   Erga jaarsummaa Turkiin araara buusan booda biyyoonni kuni marii gaggeessaa turani. Itti bahi marii kanaa garuu aammatti ifa miti.

   Waajjirri Ministeera Muummee Somaaliyaa gama isaan dureewwan lamaan hariiroo cimsuu, dhimma nageenyaa, siyaaasa, fi dhimma naannichaarratti harriiroo cimsuuf waliigaluu ibseera.

   Torban kana guyyaa Roobii Somaaliyaatti ambaasaaddarri Itoophiyaa Suleemaan Daddafoo Ministeera Dhimma Alaa Somaaliyaa Abdisalaam Abdii waliin hariiroo biyyoota lamaanii cimsuuf mari'achuu gabaafameera.

   Itoophiyaan ulaa galaanatti na baasu na barbaachisa jechuun Ertiraa waliinis muddama ishee galcheeti jira.

   Dabalata: Qabxiileen ijoo Itoophiyaafi Somaaliyaan irratti waliigalan maal jedha?

9. 19 Muddee 2025Baqataan Ertiraa wiirtuu godaantota aria'aman keessa tursiisan keessatti lubbuun isaa darbe

   Baqataan Ertiraa Fu'aad Sa'id Abdulkadir jedhamu sanada hin qabne mana-hidhaa Ameerikaa, Pensilveeniyaa keessa osoo jiruu du'uu isaa Waajirri Godaantotaafi Gumurukii Ameerikaa (ICE) beeksise.

   Lammiin Ertiraa umuriin isaa waggaa 46 ta'e kun yakka irratti hirmaatee mana-hidhaa seenuu hordofee akka biyyaa ari'amu murtaa'uu isaatiin wiirtuu baqattoota keessa tursiisan Movaanon Vaalii Fiiliipsibarg keessatti argamu keessatti hidhamee ture.

   Baqataan Ertiraa kun lubbuun isaa kan darbe A L I Mudde 5, 2018 akka du'e kan ibsame yoo ta'u, sababa du'a isaa kanarratti qorannoon gaggeeffamaa akka jiru ibsameera.

   Fu'aad wiirtuu sana keessa osoo jiruu qoma isaarra dhukkubbiin isa mudachuu ibsamee ture.

   Ogeessonni fayyaa wiirtuu sana keessa jiran gargaarsa taasisuufiin gara hospitaalaa geessanillee, lubbuun isaa ooluu hin dandeenye.

   Poolisiin bulchiinsa Pensilveeniyaa fi Kaawontiin kaliirfiild sababa du'a isaarratti qorannoo gaggeessaa jiraachuun himameera.

   Fu'aad lammii Ertiraa Sa'ud Arabiyaa keessatti dhalate yoo ta''u, Ebla bara 2018 ture Ameerikaatti hayyama jireenyaa dhaabbataa kan argate.

   Hanga ammaatti lammummaa Ameerikaa gaafachuu isaa ragaan agarsiisan hin jiran.

   Ebla bara 2024 manni-murtii naannawaa Ohaayoo Kaabaa Fu'aad yakka waliin dhahuufi hannaan balleessaa raawwachuu mirkaneessuun hidhaa ji'oota 21 itti muteessee ture.

   Fu'aad yakkawwan raawwate kanaan kasaaraa dolaara kuma 10 balleesseera.

   Adoolessa bara 2024 hojjetaan dhaabbata baqattoota seeraan alaa biyyaa ari'u ICE gara mana-hidhaa Fu'aad itti hidhame deemuun erga argeen booda akka biyyaa ari'amu murteessuun gara Wiirtuu baqattoota keessa tursiisan Movaanon Vaaliitti dabarse.

10. 19 Muddee 2025Moodeliingiitii hanga Giifti-duree Waayit Haawusitti: Meelaaniyaa Tiraamp eenyu?

    ''Bilbilako siif hin kennu. Ati kan kee naaf kenni. Siifan bilbila'' jetteenii adda bahan.

    Guyyaa milkiin ishee tokko jedhee qajeeleefii, guyyaa biqilli biqile ykn milkiin toleef tahuu isaati.

    Modelii beekamtuudha. Faashiniitti ija banatte. Ammoo abjuu ijoollummaashee tahe. Isumatuu Waayit Haawusiin ishee gahee Giifti-duree ishee taasise. Meelaaniyaa Tiraamp haadha warraa Doonaald Tiraamp.

    Islooveeniyaa hanga Waayit Haawus akka geessu kan godhe abjuu ijoollummaa isheetti qabduu fi abjuu ishee hordofuun murtoo daftee fudhattedha.

    Bara 1998 Doonaald Tiraamp tujaara taheera. Surraa nama harkisu qaba. Isa irratti ammoo dubbatee amansiisuun hojii isaati. Waliigaltee daldalaa hedduu taasisaa waan tureef.

    Bara 1998 halkan tokko magaalaa Niw Yoorkitti garuu akka yaade hin milkoofne. Garuu muuxannoon isaa isa fayyaduu hin oolle. Callisee biraa hin deemne.

    Agarsiisa faashinii guddaatu gaggeeffamaa ture. Achi irratti ammoo modeloonni addunyaa kanaa filamanii jiru warri jedhaman argamaniiru.

    Namoonni bebbekamoo fi qabeenya qaban hedduunis achi turan. Isaan keessaa meelaaniyaa Naavis ishee tokko turte.

    Islooveeniyaatii hanga Waayit Haawus

11. 19 Muddee 2025Dirooniin Raashiyaa 47 halkan darbe Yukireen haleeluu Humni Qilleensaa beeksise

    Humni Qilleensaa Yukireen diroonota Raashiyaa hakan darbe itti ergaman 160 keessaa 108 barbadeessuu hime.

    Diroononni 47 ta’an ammoo bakkeewwan gara garaa 23 rkkutaniiru jedhe Humni qilleensaa Yukireen.

    Akka Ministeerri dhimma biyya keessaa Yukireen jedhetti haleellaa Raashiyaan bu’uura misoomaa annisaafi geejjibaa naannoo Odeessaa jirurratti halkan darbe raawwatteen namni tokko madaa’eera.

    Haleellaan Yukireen gaggeessite ammoo Raashiyaa keessatti nannoo Oriiyol jedhamutti bu’uuraalee misoomaa barbadeessuu bulchaan naannichaa himeera.

    Gabaasni jalqabaa akka agarsiisutti namni haleellaa Ykireen Raashiyaa keessatti gaggeessiteen namni du’e hin jiru, garuu oolmaan daa;immanii fi manneen-barnootaa konyaa Sooveetiskii keessatti sababa hanqna humna ho’aatiif cufamanii oolu.

12. 19 Muddee 2025Jilli Itoophiyaa Jibuutiitii maal gochuutti jira?

    Jilli olaanaa aangawoota mootummaa Itoophiyaan hoogganamu Pirezidantii Jibuutii dabalatee aangawoota Jibuutii kaan waliin hariiroo cimsuuf mari'ate.

    Daawwannaan jila Itoophiyaa kuni yeroo muddamni Itoophiyaafi Ertiraa waliin cimee jiruufi Masriinis Jibuutiitti buufata doonii akka ijaartu erga gabaafame booda kan tahedha.

    Jilli kun jila lammataa mootummaa Itoophiyaarraa torban muraasa gidduutti gara Jibuutii imaledha.

    Jibuutiin biyya Itoophiyaan al ergiifi oomisha biyyatti galchuuf ulaa tokkittiii itti dhimma baatudha.

    Sochiin Itoophiyaa maal akeeka?

13. 19 Muddee 2025EUn qabeenya Raashiyaa uggurame Yukireeniif kennuuf ture dhiisee Yuuroo bln. 90 liqeessuufiif

    Hoggantoonni Gamtaa Awurooppaa (EU) Yukireeniin gargaaruuf Paawondii biliyoona 90 liqiin kennuufiif waliigalan. Haata’u malee, hoggantoonni kunneen qabeenya Raashiyaa uggurame Yukireen gargaaruuf oolchina kan jechaa turanirratti garuu osoo waliin hin galiin hafaniiru.

    Waliigaltee hoggantoonni kunneen waggaa lamaan dhufan keessa fedii humna waraanaafi dinagdee Yukireen guuta jedhan kun marii guyyaa tokkooo oliif Biraaselsitti taasifameen booda kan irra gahamedha.

    Pirezidantiin Yukireen Volodmiir Zeleniskiin hoggantoonni kunneen qabeenya Raashiyaa Yuroo biliyooona 200 uggurame akka fayyadamaniif gaafateera. Biyyi bakka qabeenyi calaa Raashiyaa guddaan keessa jiru Beejiyeem garuu idaa jiraachuu malus waliin qooddachuun haala danda'amurratti wabii barbaaddi.

14. 19 Muddee 2025ASHAMAA

    Akkam jirtu hordoftoota BBC Afaan Oromoo?

    Oduu oora tamsaasa kallattiiraan isiniif dhiyeessinu jalqabneerra.

    Shakkamaan hojjettuu baankii rasaasaan ajjeesee 'bineensa nyaachise' barbaadamaa jira.

    Oduu biyya keessaa fi guutmmaa addunyaarraa akka filannoo keessaniitti Marsariitii, Facebook, Whatsapp fi YouTube keenyarraan argattu.

    Odeefannoo kallattiin duraan darbaa ture asiin argattu.

    Moodeliingiitii hanga Giifti-duree Waayit Haawusitti: Meelaaniyaa Tiraamp eenyu?

    Kanneen biroos ni argattu.

    Dhiyaadhaa!