Puutin loltoonni Yukireen Donbaas keessaa bahuu qabu ta'uu baanaan Raashiyaan humnaan fudhatti jedhe

Haguuggii Tamsaasa Kallattii

1. 5 Muddee 2025IMF waa'ee haaromsa dinagdee Itoophiyaa maal jedhe?

   Ministirri Faayinaansii Itoophiyaa Ahimed Shiidee Itti Aanaa Daariktera IMF waliin dhimma dinagdee Itoophiyaa irratti har'a Finfinneetti mari'ataniiru.

   Itti Aanaa Daariktera IMF, Naayijel Kilaark, "har'a jijjiirama haaromsi dinagdee Itoophiyaa fide ofumakoon arguuf carraa argadheera.

   Haaromsi Dinagdee biyya keessaa Itoophiyaan hojiirra oolchite nama raajeffachiisa'' jedhan Naayijel Kilaark.

   Bu'uurri haaromsa hojiirra oole kanaa dinagdee Itoophiyaa haaromsuu fi haalatti guddinni dinagdee yeroo dheeraa keessa uummata Itoophiyaa fayyadu galma ga'u mirkaneessuu'' ture jedhan.

   "Ministirri Faayinaansii Ahimed Shiidee erga sagantaa IMF deeggaru hojiirra oolchuu jalqabnee waggaa afur guunneerra jedhan.

   Sagantaan hojiirra oole Maayikiroo ikonoomii Itoophiyaa wal hin madaaliin ture furuun guddina dinagdee gabaa irratti hundaa'ee fi dandamataa hojiirra oolchuu ture jedhan ministirichi.

   Ahimed Shiidee haala liqaa dheerate irratti yeroo madaallii arfaffaa xumurreerra jedhanii waliigaltee wal deeggarsaa biraa mallatteessuuf qophii tahuu himan.

   Deeggarsa IMF, Baankii Addunyaa fi dhaabbilee liqaa kennaniin gama maayikiroo ikonoomiin bu'aa gaarii galmeessineerra jedhan.

2. 5 Muddee 2025Hanqaaquun diyaamandii doolaara 19,000’tti gurguramu namicha hatuuf liqimsee keessaa baafame

   Niwuu Ziilanditti namichi tokko faaya diyaamandii boca hanqaanquu qabu kan gatiinsaa doolaara 19,000 qabu hatuuf liqimse.

   Amma meeshan kun keessaa fuudhamuu poolisiin hime.

   Hanqaaquun dhaabbata faaya qananii (Fabergé) kan bara 1842 hundeeffameen hojjetame kun, opireeshinii malee baafamuu poolisiin ibse.

   Namichi umriinsaa waggaa 32 kun torbe darbe daqiiqaa muraasa erga liqimseen booda to’atame.

   Faayi inni liqimfame kun diyaamandii adii 60 fi dhagaa gatii jabeessa blue sapphires 15 fi warqee kaaraatii 18 qaba.

   Amma hannaan himatamee jira.

   Jalqaba torban kanaa poolisiin Niwuu Ziilaand namichi yaalsisaa akka turan himan.

   Namni kun to'annoo poolisii jala waan jiruuf, haala kamiinuu dirqama kunuunsuu qabna,'' jechuun poolisiin dubbateera.

3. 5 Muddee 2025Haadha ijoollee waliin daandiirra jiraachuu hanga saayintistii beekamtuu tahuu geesse

   Bara 1990 Ijeewoomaa Uchegibuu shaanxaa tokko qabattee Naayijeeriyaa irraa Landan galte.

   Kan dhalatte Landanitti ture. Waggaa 30 booda ijoolleeshee sadii qabatte Landanitti deebite.

   Landan galtee torbee muraasaa booda ijoolleeshee wajjin daandiitti bahan.

   Amma jireenya daandiirraa kaatee saayintistii naanoopaartiikil taatee jirti. Seenaan ishee seenaa qormaata injifachuufi gootummaati.

   Ijeewoomaan Landan akka turtuuf maatiinshee aarsaa kaffalanii jiru.

   ''Hiikti maqaa maatiin koo naa baasan 'karaa gaarii' jechuu dha. UK keessatti waan hundi qajeelaa akka tahuufi yaadaniiti maqaa kana naaf baasan,'' jetti.

   Haatishee yunivarsiitii 'London School of Economics' baratu ture. Abbaanishee ammoo injineera elektrikaal turan.

   Maatinshee barnootarra gatii turaniif isheen dhaabbata ijoollee guddisuutti kennamte.

   Daandiirraa gara jaalalaa

4. 5 Muddee 2025Hogganaan milishaa Hamaas mormuu beekamaan Yaasser Abu Shabaab Gaazaa keessatti ajjeefame

   Hogganaan beekamaan milishaa Filisxeem keessatti Hamaas mormaa ture ajjeefame.

   Yaasser Abu Shabaab garee Humnoota Uummataa (Popular Forces) jedhamu kan naannoo Israa'el to'attu keessa socho'u hooggana ture.

   Akka gareensaa jedhutti, Abu Shabaab osoo miseensota maatii Abu Seneimaa gidduutti ''waldhabdee furuu'' rasaasaan rukutameera.

   Israa’el waliin hojjechuu isaaf Hamaas ajjeefte gabaasni jedhu ''dogongoraa'' jechuun kuffisan.

   Ibsi kanaan dura sabni Beedoon baasan, Abu Shabaab ummata Filisxeem ganuu isaaf “harka qabsaa'otaan” du’e jedha.

   Garee kana Israa’elitu hidhachiisaa himannaa jedhutu jira.

   Ji’a Adoolessaa keessa muummichi ministeeraa Israa’el Beeniyaamin Netaaniyaahuu Israa’el gosoota Filisxeem kanneen Gaazaa keessatti Hamaas morman hidhachiisaa akka jirtu mirkaneesse.

   Kunis erga miidiyaaleen Israa’el Netaaniyaahuu meeshaaleen waraanaa garee Abu Shabaabiif akka dhihaatu hayyame jedhee gabaasen booda.

   Haata’u malee, gareen kun Israa'el isaan hidhachiisuu haalanii turan.

5. 5 Muddee 2025Yaaddoon hongee Keeniyaatti akka 'balaa biyaalessaatti' labsamuuf gaafatame, Itoophiyaatti hoo?

   Miseensonni Paarlaamaa Keeniyaa mootummaan hongee 'balaa biyyaalessaa' jedhee akka labsu gaafataniiru.

   Marsabeet fi Maandeeraa dabalatee Kaaba Keeniyatti namoota miliyoona 2.1 ol hanqina nyaataa cimaa mudate.

   Uummata kana gargaarsa hatattamaatti barbaachiisaa jechuun miseensonni paarlamaa naannolee Kaaba Keeniyaa bakka bu'an mootummaan Keeniyaa hongee 'balaa biyyaalessaa' jedhee akka labsu gaafatame.

   Afrikaan Bahaa balaa hongee biraatiif akka saaxilamu raagni haala qilleensaa ni agarsiisa.

   Raaga kanaan hanga Amajjii 2026 dhufuutti roobni idilee gadii akka jiraatu kan eegamu yoo ta'u, kibba baha Itoophiyaa, baha Keenyaa fi kibba Somaaliyaatti gogiinsi uumamu jireenya miliyoonotaa balaarra buusuu akka danda'u agarsiisa.

   Gama Itoophiyaatiin yaaddoo hongee kanaf qophiin tasifamaa jiraa?

6. 5 Muddee 2025DRC fi Ruwaandaan UStti waliigaltee nagaa mallatteessan

   Pirezidantiin Ruwaandaa Pool Kaagaamee fi pirezidantiin Dimokiraatik Rippablik Koongoo (DRC) Feliips Tiishiiseekeedii waliigaltee nagaa walitti bu'iinsa biyyoota lamaan gidduutti dhalate dhaabsisa jedhameefi walitti dhufeenya dinagdee qaxanaa bal'aa ta'e Waashigiteen DC'tti mallatteessaniiru.

   Dabalataan Yunaayitid Isteetis fi DRCn "nageenya dinagdeefi qabeenyaa itti fufsiisuuf, akkasumas misooma yeroo dheeraa faayidaa biyyoota lamaaniif guddisuuf fedhii waloo akka qaban," waadaa galuun waliigaltee tarsiimawaa dheeraa waliif mallatteessaniiru.

   Waliigaltee nagaa bakka pirezidantiin Ameerikaa Doonaald Tiraamp argamutti mallatteffame kana pirezidantiin DRC Feliiks Tiishiiseekeedii fi pirezidantiin Ruwaandaa Pool Kagaamee dinqisiifataniiru.

   Waliigalteen nagaa kun erga mallatteeffameen booda Doonaald Tiraamp "Addunyaa, akkasumas Afrikaaf guyyaa addaadha, biyyoonni lamaan kunneen waan ittii boonuu qaban hedduu qabu," jedhan.

   Pirezidant kaagaamee kama isaatiin, Pirezidant Tiraampiin, gaggeessaa "nama kamiifillee kan hin loogne" jechuun nagaa buusuudhaaf carraa jirutti "ammuma" kan fayyadamanidha jedheera.

   Wagga darbe ji'a Waxbajjii keessa ministiroota dhimma alaa lamaan gidduutti waliigalteen mallattaa'ee ture.

   haata'u malee, waliigalteen sun yeroodhuma sana kan diigame yoo ta'u, kanaf ammoo biyyoonni lamaan tokko isaan himachaa turan.

   Waliigaltee kana dura baha Koongoo bakka albuudaan badhaadha ta'etti mootummaafi finciltoota Ruwaandaatiin deeggaramu jedhaman gidduutti waraanni cimee itti fufee ture.

   Hidhattoonni M23 sabumman isaanii Tuutsii yoo ta’an afaan Kiniyarwanda dubbatu.

   DR Koongon ammoo hidhattoota kana kan deeggaru Ruwaandadha jetti. Ruwaandan garuu kana irra deddeebin haalti.

7. 5 Muddee 2025Tarkaanfiin Tiraamp godaantotarratti fudhachaa jiru Itoophiyaanota miidhaa? Maal gochuu qabu?

   Pirezidantiin Ameerikaa Doonaald Tiraamp godaantota dhalattoota Sumaalee ta'an Ameerikaa seenan akka biyyaa ari'an dhaadachuun isaa yaaddoo uumeera.

   Keessumaa bulchiinsa Ameerikaa dhalattoonni Sumaalee itti heddummaatan Mineesotaa keessatti Sumaalotarrayyu darbee hawaasni Itoophiyaa yaaddoo kanarraa bilisa waan ta'an hin fakkaatu.

   Sababiin isaa ammoo dhalattoota Sumaalee Ameerikaatii ar'iuu dhaadachuu qofa osoo hin taane, bulchiinsi Doonaald Tiraamp imaammata bal'aa godaantotaaf yaaddoo ta'an diriisuun hojiirra oolchaa jira.

   Dhuma ji'a Sadaasaa kana bulchiinsi Tiraamp namoota biyyoota 19 irraa gara Ameerikaa deemuun 'giriin kaardii' argatan deebisee ilaaluuf tahuu ibsee ture.

   Tiraamp Giriin Kaardiin namoota biyyoota 'nu yaaddeessu' jedhamanirraa godaananii bal'inaan irra deebiin ilaalamuu qaba jechuun hogganaan Tajaajila Lammummaafi Godaansaa ajajeera.

   Tarkaanfiin hawaasa Sumaalee irratti fudhatamu kun Oromoo dabalatee ummata Itoophiyaa achi godaananiif hangam yaaddoodha?

8. 5 Muddee 2025Puutin loltoonni Yukireen Donbaas keessaa bahuu qabu ta'uu baanaan Raashiyaan humnaan fudhatti jedhe

   Pirezidantiin Raashiyaa Vilaadmiir Putin loltoonni Yukireen baha Yukireen naannoo Donbas keessaa bahu qabu, ta’uu baannaan Raashiyaan humnaan fudhatti jechuun akeekkachiise. Puutin waraana Yukireen keessaa dhabuudhaaf wanti ‘haa hafu’ jedhan akka hin jirre dubbate.

   "Loltoonni Yukireen daanga kana keessaa bahuu qabu ta'uu bannaan nuti daangaa kana humnaan bilisoomsina," jechuun dubbate India Today irratti.

   Mooskoon Donbaas %85 toa'ttee jirti.

   Pirezidantiin Yukireen Volodmiir Zeleniskiin ammoo daangaa isaanii dabarsanii kennuun hin ta'u jedheera.

   Yaadni Puutin ammaa erga marii Mooskootti Kibxata tureen booda hogganaan Raashiyaa kun "waraanaa na dhaabuu ni fedha" jedhee amanuun Tiraamp namoonni jaarsummaaf inni ramade waa'ee karoora nagaarratti mariyachaa jiraachuu himeeti.

   Mooskoo kan ture ergamaan Tiraamp Istiiv Wikoof garee Yukreen Filaariidaatti arguuf jira.

9. 5 Muddee 2025ASHAMAA!

   Akkam jirtu hordoftoota BBC Afaan Oromoo? Toora tamsaasa kallattiin odeeffannoo isiniif dhiyeessinu jalqabneerra.

   Nu hordofaa!