Michoonni Yukireen karoora nagaa Waayit Haawus irratti mari'achuuf

Haguuggii Tamsaasa Kallattii

1. 22 Sadaasa 2025MM Abiy Ahmad pirezidaantii Afrikaa Kibbaa Ramaafoosaa waliin maal mariyatan?

   

   Madda suuraa, Abiy Ahmad Ali

   MM Itoopihyaa Abiy Ahmad Yaa'iin Biyyoota Garee 20 osoo Afrikaa Kibbaatti hin gaggeeffamiin dura pirezidaantii Afrikaa Kibbaa Siiriil Ramaafoosaa wajjin wal-arginee mariyanne jedhan.

   Yaa'ii gaggeessitoonni biyyoota dureeyyii irratti argaman kun Afrikaatti qophaa'uusaatiin sagaleen Afrikaa akkaataa itti dhagahamuu qaburrattis mariyachuu himan.

   Ergaa fuula miidiyaa hawaasaa isaanirratti barreessaniin: "Jalabultii Yaa'ii Hooggantootaa Biyyoota Garee 20 dura Pirezdaantii biyya keessumsiiftuu [Afrikaa Kibbaa] Siriil Raamaafoosaa waliin walargineerra" jedhan MM Abiy Ahmad.

   Dabaluunis, "Yaa'iin seena qabeessi kun Afrikaa keessatti qophaa'uusaatiin, Yaa'icharratti dhimmoonni sagalee waloo Afrikaafi fedhiin waliinii haala irratti dhiyyaatu ilaalchisee marii'anneerra," jedhan.

   Garuu dhimmoota biroo irratti Ramaafoosaa waliin mariyachuufi dhiisuu homaa hin ibsine.

   Afrikaan Kibbaa Yaa'iin Biyyoota Garee 20 jedhamuun beekamuu qopheessaa jirti. Walgahii kanarratti gaggeessitoonni biyyoota dureeyyii ni hirmaatu.

   Haata'u malee, pirezidaantiin Amerikaa Donaald Tiraamp Afrikaan Kibbaa warra adiirratti "ajjeechaa raawwatti" jechuun wal-gahii kanarratti akka hin hirmaanne ibsee ture.

   Afrikaan Kibbaa ammoo Tiraamp hafuusaatiin wal-gahichi waan itti hir'atu homaa hin qabu jechuun deebii kenniteefii ture.

   

   Madda suuraa, Abiy Ahmad Ali

2. 22 Sadaasa 2025Shamarreen waltajjii dorgommii dhiistee baate akkamiin Miis Yunivars mo'atte?

   

   Madda suuraa, Getty Images

   Faatimaa Boosh Magaalaa guddoo Taayilaand, Baankoogitti dorgommii Miis Yuunivars adeemsifamaa ture mo'achuun Jimaata kaleessaa gonfoo fudhatte.

   Dorgommiin giiftii yuniivars filachuun miilanaa dheekkamsa kaasee tures xumurameera.

   Dorgommii kana lammiin Taayilaand Piraaviinaar Saayi, lammaaffaa, Isteefaanii Abaasaalii Veenizuweelaa irraa sadaffaa, Maa Ahaatisaa Maanaaloo Filiippinsa irraa arfaffaa akkasumas Oliiviyaa Yaasee Koot di'vuwaar irraa shanaffaa tahuun dorgommii kana xumuraniiru.

   Dorgomtuun ganna 25 lammii Meeksikoo jalqaba baatii Sadaasaa kana, qondaalli Taayilaand tokko dorgomtoota baayyee fuulduratti aariin ishee qeequun dabalataan, warra ishee deeggaran morkii keessaa akka baasuu dhaadachuun booda waltajjicha itti dhiistee baate.

   Taateen kun madatee torbee ittaanu daanyaan lama dorgomichi haqa hin qabu jechuun keessaa bahan.

   Dorgommiin akka addunyaatti waggootii dheeraaf adeemsifamaa jiru barbaachisummaan isaa gaaffii keessa kan seenaa dhufe yoo tahu,daawwataas dhabaa jira.

   Taatee kanaafi Miis Meeksikoon dorgommicha mo'achuun ammoo ittuu falmisiisaa akka tahu godheera.

   Diraamaa Baankoog

3. 22 Sadaasa 2025Maanchester Yunaayitid Buruunoo Fernaadeez gurguruu danda'a

   

   Madda suuraa, Getty Images

   Maanchester Yunaayitid maallaqa sassaabbatee ganna dhufu keessa taphattoota biroo fidachuuf Buruunoo Fernaadeez gurguruu yaada ajira.

   Ruben Amoorim taphataa lammii Poorchugaal umuriin isaa waggaa 31 kana gurguree sarara gidduurratti Adaam Waarton, 21, Eliyoot Andersan, 23, Kaarloos Baaleba, 21, keessaa kan danda'ame fudhachuuf yaadaa jira.

   Kana malees, maanchester Yunaayitid ganna dhufu keessa taphataa lammii Biraazil umuriin isaa waggaa 33 Kaemiiroo fi taphataa sarara cinaa lammii Ingilaand Jaadon Saanchoo akka gadhiisan hayyamuuf jira. Kana gochuun ammoo miindaa Paawondii miliyoona 31 kaffalu akka oolfatu isa gargaara.

   Baarseloonaan ammoo jijjiirraa ganna dhuftuurratti jifataa Baayer Muniik fi Ingilaand umuriin isaa waggaa 32 ta'e Harii Keen, akkasumas taphataa Atileetikoo Maadiriid lammii Arjentiinaa umuriin isaa waggaa 25 ta'e Juuliyaan Alvaarez fudhachuuf yaadaa jira.

   Arsenaal taphataa Juuventuus lammii Turkii ta'e umuriin isaa waggaa 20 Kenaan Yildiiz fudhachuuf dallaalaa isaa kan ta'e Joorj Mendeez waliin mariyateera.

4. 22 Sadaasa 2025Ijoollee dahuun umurii gabaabsuu danda'aa? Seenaan maal hima?

   

   Madda suuraa, Getty Images

   Ijoolleen yeroo waan harkatti qabatan darbatan, hin nyaannu yeroo jedhan ykn rafuudhaaf yeroo rakkisan haadholiin 'na gubdan, umurii koo malee na dulloomsitan' jechuun baayyee aaruu danda'u ta'a.

   Qorannoowwan haaraa bahanis kan agarsiisan qormaanni ijoollee guddisuu keessa jiru dubartoota keessa darbaniif kun dhugaa ta'uu danda'a.

   Ragaaleen seenaa akka agarsiisanitti, haadhotiin tokkoo tokkoo daa'ima dahaniitiin umurii isaaniirraa ji'a ja'a akka hir'achuu danda'u dubbatu. Dubartoota haala baayyee rakkisaa ta'e keessa jiranirratti ammoo dhiibbaan kun akka caalaa hammaatu eeru.

   Qorattoonni jijjiirama tirataa ammoo galmeewwan odeeffanno dhalootaa du'aa manneen amantaa sakatta'aniiru. Galmeen kun bara 1866 hanga 1868 bara beela hamaa Finlaand dubartoota lubbuun turan 4,684 walitti qabeera.

   Neezerlaandis Yunivarsiitii Girooniinganitti gaggeessaan garee qorannoo kanaa Dr. Iiyun Yaang Tii kun "seenaa Awurooppaa dhiyoo keessatti beela hamaafi rifaasisaa mul'ate keessaa tokkodha," jedha.

   Haadhotiin yeroo beelaa dahan umuriin isaanii tokkoo tokkoo ijoollee dahaniif ji'a ja'aan hir'achuu Dr. Yaang fi waahellan isaa arganiiru.

   Dahumsi umurii irratti maaliif dhiibbaa fida?

5. 22 Sadaasa 2025Arsenaaliif bakka Gabreel Moskeeraa moo Hinkaappii wayya?

   

   Madda suuraa, Getty Images

   Taphataan sarara ittisaa Arsenaal irratti murteessaa ta’e Gabreel Magaalesh sababa miidhama irra gaheen torbanootaaf tapha keessaa hafuusaati.

   Manaajeriin Arsenaal Mikeel Arteettaan ibsa tapha darbii Dilbata Tootenhaam waliin qabu ilaalchisuun ibsa yeroo kennetti, Gabreel “tobanootaaf akka taphachuu hin dandeenye” mikaneesseera.

   Sarara ittisaa keenyarraa taphataa murtessaa dhabne kan jedhe Arteettaan, hanqina guddaa akka uumu dubbateera.

   “Isa dhabuun waan gaarii miti, garuu wanti gaariin amma taphattoota bakka isaa bu’anii hojjetan ni qabna,”jedhe Arteettaan.

   Akkuma inni jedhes, namoonni Arsenaal bakka isaa kan bu’an qaba jechuun Moskeeraafi Hinkaappii keessaa eenyu wayya jechuunis dorgomsiisa ajiru.

   Isin eenyu wayya jettu?

6. 22 Sadaasa 2025Waa'ee karoora US waraana Yukireen dhaabuuf qopheessite dhoksaan bahe kan beeknu

   

   Madda suuraa, Marharyta Fal/Frontliner/Getty Images

   Wixineen karoora nagaa US-Raashiyaa bal’inaan miliqee kan ba’e yoo ta’u, naannoowwan industirii Yukireen baha Donbaas ammallee to’annoo Yukireen jala jiran Raashiyaaf dabarfamee akka kennamu yaadni dhiyaateera.

   Qabxiileen ijoo maali?

   Wixineen karoora nagaa kun qabxilee ijoo 28 kan qabu yoo ta’u, irra isaa yeroo ilaalan qabxiiwwan Yukireen fudhachuu dandeessu hedduu qaba. Kaan garuu dhimmoota ifa hin taaneefi sirrii ta’uu dhabuu malanitu keessa jiru.

   Walabummaan biyyummaa Yukireen "kan mirkanaa’e ta’a" ,akkasumas " waliigalteen Raashiyaa, Yukireen fi Awurooppaa gidduutti walirratti waraana banuu dhorku ni jiraata. Kiiviif "wabii nageenyaa" cimaa ykn amanamaa ta'ee fi guyyoota 100 booda filannoo ariifachiisaa akka gaggeeffamuuf gaaffiin ni jiraata.

   Yoo Raashiyaan Yukireen weerarte ammoo qoqqobbii irratti deebisuufi waliigaltee kana cabsinaan ammoo "waraanaa qindaa'aa cimaan deebiin" akka kennamu yaadameera.

   Yukireen keessatti seera waraanaa waan bulaa jirtuuf filannoon hin danda’amu ta’us, yaadaan yoo waliigaltee nagaa mallatteeffame gaggeeffamuu danda’a.

   Garuu wabii nageenyaa irratti eenyu akka isheef kennuufi hangam cimaa ta'uu akka danda'an bal'inaan hin jiru.

   Kun ammoo haleellaa Yukireen irratti raawwatamu akka haleellaa hunda irratti raawwatameetti ilaaluuf waadaa akkaataa NATO keewwata Shanaffaa irraa baay’ee gadi bu’a.

   Lafa Yukireen dabarsee kennuu fi humna waraanaa hir’isuu

   Yaadota baay’ee falmisiisaa ta’an keessaa tokko Yukireen lafashee to’attee jiru keessaa dabarsitee kennuufi humna waraanashee hir’isuudha.

   "Humnoonni Yukireen kutaa Doonetsik Oblaast amma to'atan irraa ni ba'u.

   Lafa yoo xiqqaate lammiileen Yukireen miliyoona afurtamaa keessa jiraatan - magaalota Doonetsik "fortress belt" Slovyansk, Kramatorsk fi Druzhkivka - dabarsuu - irra caalaan lammiilee Yukireen fudhatama hin qabaatu. Raashiyaan magaalaa Pokrovsk qabachuuf yaaluun waggaa tokkoo ol dabarsiteetti - Yukireen lola malee wiirtuuwwan tarsiimoo barbaachisoo akkasii dabarsitee kennuun ishee hin oolu.

   "Baayyinni Raayyaa Ittisa Biyyaa Yukireenis loltoota kuma 600 qofaan daangeffama."

   Waraanni Yukireen Amajji darbe loltoota 880,000 iiraa akka gahe tilmaamameera, kunis yeroo weerarri kun guutuutti jalqabame bara 2022 keessa 250,000 ture.

   Loltoonni Yukireen gara 600,000 gadi akka xiqqatu kana Raashiyaan fudhachuu dhiisuu dandeessi. Isheen kana caalaa akka hir’ifamu barbaaddi.

   Wixineen kun " Kiriimiyaa, Luhansk fi Donetsk akka qaama Raashiyaatti beekamtii ni argatu" jechuun yaada dhiyeessa.

   Egeree Yukireen - Gamtaa Awurooppaa waliin malee Naatoo waliin ta'uu akka hin dandeenye kaa'a.

   Raashiyaan moggeeffama kanaan dura irra ture jalaa akka baatus yaada dhiyeessa karoorri kun.

   Raashiyaan dinagdee addunyaa keessatti deebitee akka makamtu" waliin adda baafamuu irraa deebiftee garee humnoota G8tti deebitee affeeramuu ishee eera.

   Haata'u malee. wixineen kun qabxiiwwan biroo murtessoo ta'an hin kaasiin hafes ni qaba.

7. 22 Sadaasa 2025Magaala Itoophiyaa haftee Pilaastikaa too'achuun badhaasa idi-addunyaa argatte

   

   Madda suuraa, Bulchiinsa magaalaa Harar

   Magaalli Harar A.L.A. bara 2024 irraa eegaluuni hafteewwan Pilaastikaa too'achuu fi gara omisha bu'a qabeessa ta'eetti jijjiiruuf tattaaffii taasisuu kan eegalte.

   Hoji-gaggeessaan magaala Harar Obbo Yaayaa Abdurashiim BBCtti akka himanitti, magaalattiin dhaabbata Kiyuubik Itoophiyaa jedhamu waliin ta'uun Harar balfa pilaastikaarraa bilisa gochuuf hojii hojjetaniin bu'aan argamuu himu.

   Hojii waggaa tokko keessatti hojjetameenis magalattiin yaa'ii ce'umsa magaalotaa Fooramii Diinagdee Addunyaa Ameerikaatti taa'amerratti beekamtii argatteetti.

   Obbo Yaayaan akka jedhanitti, pirojektiin magaala Harar balfa pilaastikaarraa bilisa gochuu kuni kan eegale rakkoo balfi pilaastikaa geessisaa jirurraa ka'uuni jedhu.

   Milkaa'inni kun akkamiin argame?

8. 22 Sadaasa 2025Michoonni Yukireen karoora nagaa Waayit Haawus irratti mari'achuuf

   

   Madda suuraa, Reuters

   Michoonni Yukireen yaa’ii G20 Afrikaa Kibbaatti gaggeeffamurratti yeroo wal argan karoora Ameerikaan waraana Raashiyaa waliin dhaabuuf bastterratti mariyachuuf qabdu ''cimsuuf'' akka yaalan MM UK Siir Kiir Istaarmer hime.

   Walgahiin kun kan jalqabu erga pirezidaant Voloodmiir Zeleniskiin Yukireen karoora kana fudhachuuf dhiibbaa uumuun ''yeroowwan seenaa keenya keessatti rakkisaa ta'an keessaa tokko'' akka mudate akeekkachiisanii guyyaa tokko boodadha.

   Karoorri nagaa Waayits Hawus qopheessite bahe akka agariisutti Mooskoof mijataa akka ta'etti ilaalameera.

   Zeleniskiin Jimaata darbe Sir Kiir fi hoggantoota Faransaayiifi Jarmanii waliin bilbilaan mari'ateera.

   Pirezidaantiin Ameerikaa Doonaald Tiraampis ta’e prezidaantiin Raashiyaa Vilaadmiir Puutin G20 irratti hin hirmaatan.

9. 22 Sadaasa 2025ASHAMAA!

   Akkam jirtu? Toora tamsaasa kallattiin odeeffannoo biyya keessaa, Afrikaafi guutumaa addunyaarraa isiniif dhiyeessinu jalqabneerra.

   Odeeffannoo wayitaawaa argachuuf: Marsariitii, Whatasapp, Facebook, fi YouTube nu hordofaa.

   Nu hordofaa.