Yukireen karoora Waayit Haawus waraana dhaabuuf dhiyeessiteen walqabatee michummaa US dhabuu dandeessi - Zeleniskii

Haguuggii Tamsaasa Kallattii

1. 21 Sadaasa 2025Kirkira lafaa Baangilaadishitti mudateen yoo xiqqaate namoonni shan du'an

   

   Madda suuraa, Reuters

   Baangilaadishitti kirkirri lafaa humni isaa rektari iskeelii 5.5 ta'e mudateen daa'ima tokko dabalatee namoonni shan du'anii, 450 ol kan ta'an madaa'an.

   Bakki kirkirri lafaa kun itti mudate magaalaa guddoo biyyattii Daakaa irraa kiiloomeetira 30 fagaattee kan argamtuufi yeroo baayyee kirkirri lafaa itti hammaatu konyaa narsingidiittidha.

   Yeroo gamoon raafamutti namoonni gamoo keessaa baqachaa kan turan yoo ta'u, dunkaanawwaniifi manneen yeroof ijaaraman garuu ni jijjigan.

   Barattoonni Yunivarsitii Daakaara ammoo yeroo kirkirri lafaa kun mudatu osoo gamoo keessaa bahaa jiranii walirra ejjechuun yoo xiqqaate 10 madaa'aniiru.

2. 21 Sadaasa 2025Yukireen karoora Waayit Haawus waraana dhaabuuf dhiyeessiteen walqabatee michummaa US dhabuu dandeessi - Zeleniskii

   

   Madda suuraa, AFP / EPA / Reuters

   Pirezidantiin Yukireen Voloodmiir Zeleniskiin biyya isaa akka hin ganne dubbate. Pirezidant Zeleniskiin kana kan jedhe yeroo US waraana dhaabsisuun Raashiyaa waliin nagaan akka bu’uuf dhiibbaa gochuu itti fuftee jirtuttidha.

   Ergaa biyyaaf dabarseen, gaggeessaan Yukireen kun yaada furmaataa US dhiyeessite irratti haala gaarii ta’een hojjechaa jiraachuu dubbate.

   Haata’u malee, Kiiv filannoo lama keessaa tokko – “michuushee jabduu” dhabuu ykn kabajashee dhabuuti ishee eeggata.

   Karoora kana ilaalchisee hanga ammaatti Raashiyaan waan ifatti ishee qaqqabe akka hin jiraanne Kireemiliin ibsiteetti.

   Karoorri US dhoksaan bahe yaada furmaataa kanaan dura Kiiv didde kana akka naannoo biyyattii gama bahaan jiru Doontesk akka dabarsitee kennituufi NATO’tti akka hin makamne waadaa akka galtu kan gaafatu dabalata.

3. 21 Sadaasa 2025Paayiletiin jeettii waraanaa Indiyaa Dubaayitti caccabe keessatti du'e

   

   Madda suuraa, Dubai Media Office

   Paayiletiin jeettii waraanaa Indiyaa, Dubaayitti osoo agarsiisa qilleensaarra jiruu kufee caccabeen du'uu aanga'oonni himan.

   Humni Qilleensaa Indiyaa ibsa baaseen: "IAF lubbuu badeef gadda itti dhaga'ame ibsuun yeroo gaddaa kanatti maatii gaddi seene cinaa akka dhaabbatu himeera.

   "Balaa kanaaf ka'umsi maal akka ta'e qorachuudhaaf gareen qorannoo hundeeffameera."

   Aanga'aan Miidiyaa Dubaayiifi Ministeerri Ittisaa UAE hojjettoonni ittisa balaa ibiddaafi tajaajilli yeroo muddamaa bakkka balaan kun itti mudate battalatti qaqqabanii waan bakka sana jiruu "deebii hatattamaa kennaniiru".

   Jeettiin kun kufuu booda aarri gur'aachi mul'achuu viidiyoon agarsiisu mul'ateera.

4. 21 Sadaasa 2025Xiyyaaroonni waraanaa US afur Veenezuweelaatti dhiyoo osoo balalii'anii mul'atan

   

   Madda suuraa, Getty Images

   Yoo xinnaate xiyyaaroonni waraanaa US afur Veenezuweelaatti dhiyoo osoo balalii'anii mul'atan.

   BBC Verify gabaasaalee jeettiiwwan waraanaa US halkan kaleessaa qarqara galaanaa Venezuweelaatti dhiyoo balali'aa turan jedhu adda baasuuf odeeffannoo hordoffii balaliinsaa fayydameera.

   Naannichatti muddamni Ameerikaafi Veenezuweelaa jidduutti itti fufuunsaa ni yaadatama.

   Haaluma kanaanis namoonni odeeffannoo FlightRadar24 miidiyaa hawaasaarratti qoodan irraa jeettiiwwan waraanaa fi xiyyaara basaasaaf oolan kan akka RC-135 dabalatee, xiyyaaroonni naannoo kibba Galaana Kaaribiyaan irratti ni mul'atu.

   Ammatti xiyyaarri gosa kamii naannoo qarqara galaana Veenezuweelaa irra socho'aa akka jiran odeeffannoo hordoffii balaliinsaa ifa ta'e irraa qoratamaa jira.

   Yeroo bulchiinsi Tiraamp mootummaa Veenezuweelaa irratti dhiibbaa taasisaa jiru kanatti torbanoota dhiheenya keessa Ameerikaan dooniiwwan waraanaa gara kibba Kaaribiyaaniitti bobbaasuun ishee gabaafameera.

5. 21 Sadaasa 2025'Badhaasa Noobeeliishee yoo fudhatte akka baqattuu siyaasaa adamfamtuutti ilaalamti' - Abbaa Alangaa Veenzuweelaa

   

   Madda suuraa, Getty Images

   Hoggantuun mormituu Veenizuweelaa, Noorweey deemtee yoo badhaasa Noobeelii Nagaa fudhatte akka nama to'atamuurraa ''baqataa'' jirtutti ilaalamtee adamfamti jedhan abbaan alangaa waliigalaa biyyattii.

   Taariik Wiiliyaam AFP'tti yoo himan Maariyaa Koorinaa Makaadoon - to'annoo jala akka hin oolleef jecha baqachaafi dhokataa jirti- biyyattii keessatti ''gochaa shira xaxuu, jibba facaasuufi shororkeessummaan,'' himatamteetti.

   Dubartiin ganna 58 kuni badhaasa Noobeelii nagaa Onkololeessa darbe kan argatte ''bulchiinsa abbaa irrummaa irraa gara demokiraasiitti haa ce'amu,'' jechuun tattaaffii taasisteeni.

   Mootummaa Pireezidant Nikolaas Maaduroo ''yakkamaa'' jechuun balaaleffattee uummati Veenizuweelaa tokkomee aangorraa akka isa kaasu waamicha dhiyeessiti.

   Bulchiinsi nama kanaa biyyoota baayyee bira fudhatama hin qabu.

6. 21 Sadaasa 2025Barattuu PhD ganna sadii otoo hin guutiin waraqaalee qorannoo 12 maxxansiisuun, hojii kalaqaa 2tti milkoofte

   

   Madda suuraa, Tsiyoon Amsaalu

   Dubartiin kun waggaa sadii otoo hin gahiin namoota wajjiin barnoota eegalan hunda dursuun PhDn eebbifamte.

   Laabiraatorii itti yaalii hojjettu keessa buluun halkaniif guyyaa hojjechaa turte. Dhumarrattis waan irraa eegamuu ol milkeessuun badhaafamtuu taateetti.

   Dubartiin kun eenyu?

   Dubartiin barnoota Herreegaa fi Fiiziksiitiif jaalala addaa qabdi. Muummee isheerraa PhD kan argate yoo taatu, kolleejjii ishee irraa ammoo dubartii jalqabaa PhD argattedha. Dr Tsiyoon Amsaaluu jedhamti.

   Qorattuun kun bu'aa bayii keessa dabartee milkooftee fi xiyyeeffannoo qorannooshee irratti BBC waliin turtii taasisteetti.

   Dr Tsiyoon Amsaaluu eenyu?

7. 21 Sadaasa 2025Manni murtii Baahir Daar nama Dr. Andu'aalam Daanyee ajjeeesetti hidhaa cimaa waggaa 25 murteesse

   

   Manni murtii olaanaa Baahir Daariifi nananooshee nama hakiima Xibaba Gihin Ispeeshaalaayizid Hospitaal ture Dr. Andu'aalam Daanyee ajjeeesetti hidhaa cimaa waggaa 25 murteesse.

   Miidiyaaleen biyya keessaa akka gabaasanitti, manni murtichaa dhaddacha har'a ooleen ajjeechaa doktora Andu'aalam Daanyee ilalchisee ragaa dhiyaaterratti hundaa'uun murtee kenneera.

   Doktor Andu'aalam irratti ajjeechaa kan raawwatame A L I Amajji 24 halkan magaalaa Baahir Daar keessa konkolaataa dhuunfaa isaa osoo oofaa jiruu namni Issuubaaloo Nabbaree jedhamu qophaa'ee rasaasa itti dhukaasuun ajjeeseesuu manni murtii mirkaneesseera.

   Halkanuma gaafa sanaa doktora fayyaa biraa irratti haaluma wal fakkaatuun itti dhukaasuun qaama konkolataa rukkutuun yaaliin ajjeechaa raawwatamuu manni muritichaa ilaaleera.

   Ajjeechaan Dr Andu'aalam Daanyee Baahirdaariitti attamiin raawwatame?

8. 21 Sadaasa 2025Naayijeeriyaatti hidhattoonni barattoota mana barumsaa irraa butanii fudhatan

   

   Madda suuraa, Google

   Nayijeeriyaatti torbee tokko keessatti yeroo lammataaf hidhattoonni mana barumsaa Kaatolikii irraa barattoota butan.

   Hidhattoonni miilana bulchiinsa Niijeer keessatti mana barumsaa Seent Meerii irratti xiyyeefatan, qondaaloti mana barumsichaa manneen barumsaa bultii hundi yeroof akka cufaman ajajaniiru.

   Lakkoofsi barattoota butamanii ifatti beekamuu baatus, barattoonni 100 tahan butamuu akka hin oolle jiraattonni sodaa qabu.

   Naayijeeriyaatti gareeleen hidhatan akka haaraatti gochaa kana raawwachaa kan jirna yoo tahu, Wiixata darbe bulchiins Kebbiitti barattoota dubaraa 20 mana barumsaa bultii irraa butaniiru.

9. 21 Sadaasa 2025Tigraay: Qorannoon yakkaa idil-addunyaa addaan cite akka eegaluuf waamichi dhiyaate

   

   Madda suuraa, IBAHRI

   Gabaasni idil-addunyaa waa'ee waraana Tigraay akka jedhetti, waligaltee Piritooriyaa booda waraanni dhaabatus sarbamni mirga namoomaa itti fufee jira.

   Ibsa Waldaan Ogeessota Seeraa Idil-addunyaa (IBAHRI) gamtaa dhaabbilee miti mootummaa waliin ta'uun baaseen, Tigraay keessatti gochoonni hammeenyaa namoota irratti raawwataman itti fufu eera.

   ''Yakkootni akka gareen gudeeduu, dirqiin ulfeessu, miidhaa saalaafi itti yaadanii beelessuu dabalatee yakkoonni raawwataman itti fufuu'' isaaniif yaaddoo gddaatu jira jedheera.

   Dhaabbileen mirga namoomaa kun hawaasni addunyaa haala jiru loogii tokko malee qorachuu akka itti fufuus waamicha taasise.

   ''Qaqqabummaa namoomaa mirkaneessuuf yakka sarbama dhala namaa fi yakka waraanaa raawwatamuuf itti gaafatamummaan jiraachuu qaba'' jedhe.

   Badii kana eenyutu raawwataa jira?

10. 21 Sadaasa 2025Namoota qondaalota baankii biyyaalessaa fakkaachuun doolaara 800,000 saaman

    

    Madda suuraa, Getty Images

    Indiyaatti namoonni hidhatan qondaalota baankii biyyaalessaa fakkaachuun ruppii miiliyoona 70(doolaara 800,000) konkolaataa gara bulchiinsa Kaalkaataa, kibba biyyattiitti deemaa ture saaman jedhe poolisiin

    Namoota magaalaa Baangilaaruu keessatti guyyaa saafaa qarshii kana saaman to'achuuf oppireeshiniin bal'aa jalqabameera.

    Saamichi kuni gaafa Roobii kan raawwate yoo tahu, namoonni jaha konkolaataa maallaqa geejibaa ture daandii dhiphatee jiru irratti qabachuun saaman jechuun koomishinariin poolisii Seemaant Kumaar Saayi.

    Konkolaaticha keessa konkolaachisaa, nama qarshii sanan itti gaafatamummaa tiksuufi eegdotadha.

11. 21 Sadaasa 2025Godina Guraagetti waa'ee taatee maatii tokko keessaa namoota torba galaafatee poolisiin maal jedhe?

    

    Madda suuraa, ADDIS STADARD

    Taatee maatii tokko keessaa lubbuu namoota torbaa galaafate kana gareen qorannoo hundaa'ee qoratamaa akka jiru poolisiin BBCtti himeera.

    Taateen poolisiin 'gaddisiisaa' jechuun ibse kun Naannoo Naannoo Giddugaleessa Itoophiyaa, Godina Guraagee Bahaa Aanaa Masqaan keessatti ALI Sadaasa 6, 2018 uumame.

    Guyyichatti galgala keessaa naannoo sa'aa 1:00 yemmuu ta'u Obbo Haayilee Abarraa, haati warraa isaaniifi ijoolleensaanii jaha waliin ta'uun irbaata sooratan.

    Haa ta'u malee irbaata erga sooratanii booda miseensonni maatii kanaa hundisaanii dhukkubsachuu eegalan.

    "Irbaata akka nyaataniin battalatti dhukkuba cimaaf saaxilaman. Jiraattonni naannoos walgargaaranii gara mana yaalaa geessan" jedhan Komishinii Poolisii Naannoo Giddugaleessa Itoophiyaatti Hogganaa Kutaa Miidiyaa kan ta'an Komaandar Taajuu Nagaash.

    Shakkamtoonnni to'ataman jiruu?

12. 21 Sadaasa 2025Ergaa Dimokiraatonni waraana Ameerikaaf dabarsan "...du'aan kan adbasiisudha" -Tiraamp

    

    Madda suuraa, Getty Images

    Seera baastonni Dimokiratota ta'an ja'a viidiyoo waraanni ajajoota seeraan alaa akka mormaniif hubachiisu gadiisaniin booda Pirezidant Donaald Tiraamp "hokkaraan kan guutameefi amala du'aan adbsiisudha" jechuun himate.

    "Kun waan badaadha, biyya keenyaafis hamddha. Dubbii isaanii kana obsaan darbuu hin barbaachisu. Amala gantummaa hokkaraan guutamedha!! Isaan hidhaa??" jechuun Tiraamp miidiyaa hawaasaasaarratti barreesse.

    Seera baastonni ja'an loltummaa ykn dhaabbata basaasaa keessa hojjetan yaada Tiraamp balaadha jechuurra darbanii aanga'oota ummatan filalamanirratti doorsisa raawwatame akka ta'e dubbatan.

    "Doorsifn ykn waamichi hokkaraa gosa kamiyyu itti-gaafatamummaa keenyarraa nu hin dhorku," jedhan ibsa waloon baasaniin.

    Viidiyoon Dimokiraatotaan qophaa'e kun Senaatara Michigaan kan ta'e Eeliisaa Silootkiniin kan qoodame yoo ta'u, Senaatarri Ariizonaa maark Keelii, Kan Peensiliveeniyaa Kiriis Deeluuziiyoo fi Kiriisis Hulahaan, , kan Niiw Amishaayer Maagii Gudlaandar, akkasumas kan Koloraadoo Jeeseen Kiroowun kan dabalatedha.

    Humna galaanaa keessa kan tajaajileefi qorataan duraanii hawaa Senaatar Keelii "seerawwan keenya ifadha". Ajajoota seeraan alaa mormuu ni hayyamu," jedhe.

    "Ajajoota seeraa fi Heera mootummaa keenya cabsan eenyuyyu raawwachuu hin qabu," jechuun seera baastonni kunneen viidiyoorratti dubbatan.

    "Bulchiisni kun loltoota fi ogeessota basaasaa keenya uffata danbii uffatan lammilee Ameeerikaa waliin walitti buusaa jira. Akkuma keenya hundi keessan heera mootummaa eeguufi waan itti dhufu irraa ittisuuf waadaa galleerra. Yeroo ammaa kana yaaddoowwan heera mootummaa keenyarratti ka'an kan alaa dhufan qofa osoo hin taane kan keessaas dhufan dabalata," jedhan.

    Miseensonni mana maree akka du'aan adabaman Tiraamp gaafatan maal jedhan?

13. 21 Sadaasa 2025Morkii jabaa Arsenaal vs Tootanhaamiifi taphoota Pirimeerligii Ingiliz Sambattan kana eegaman

    

    Tapha intarnaashanilaaf torbee lamaaf adda citee kan ture Pirimeerliigiin Ingiliz deebi'ee eegaleera.

    Morkiin Arsenaalifi Tootaenhaam- masaasun Kaaba Landan morkiin isaan taasisan akkaan eegama.

    "Haala Tootenhaam irra jiruun yoo wal-bira qabamu Arsenaal garee caalmaa qabuudha; garuu leenjisaan [Tootenhaam] Toomaas Firaank qophii taasisuunsaa waan eegamuudha," jechuun dubbate xiinxalaan kubbaa miilaa BBC Kiriis Saatan.

    Dabaluunis, "Warri Tootenhaam masaanuusaanii dhaabuuf falmiin taasisan kan eegamu ta'us, Arsenaal karaa ittiin galchii lakkoofsisu hin dhabu" jedhe.

    Kiriis Saatan morkii Arsenaalifi Tootenhaam dabalatee taphota kaanis tilmaamera.

    Tilmaama taphoota hudaa kana keessaa argattu.

14. 21 Sadaasa 2025'Oromiyaatti dargaggoonni hedduu dirqiin leenjii loltummaatti geeffamaa jiru'- maatiifi jiraattota

    

    Madda suuraa, Getty Images

    Yeroo dhiyoo as dargaggoota karaafi geejjiba irraa humnaan fuudhuun gara leenjii loltummaatti geeffamaa jiru kan jedhu komiin heddu dhagahamaa jira.

    Hojjattoota mootummaa dabalatee dargaggoonni karaa irraa humnaan qabamanii gara bakka leenjii waraanaa geeffamuuf man-kuusaa ykn magaazana garaa garaa keessa kaa'amanii akka jiran BBC'n maatii namoota qabamaniifi namoota dhimmicha sirriitti keessa beekan irraa odeeffateera.

    Mootummaan Ameerikaas gabaasa baasen Itoophiyaan dargaggoota umuriin hin geenye humnaan qabuun loltummaaf ykn gargaarsa loltummaaf itti dhimma bahuu akka hin qabne gaafatee jira.

    Ministiirri Dhimma Alaa US, Itoophiyaatti humnaan nama bakka biraa geessuu ilalchisee gabaasa bara 2025 baaseen, "Mootummaan Itoophiyaa daa'imman seeran ala leenjii loltummaaf ykn deeggarsa loltummaa akka kennaniif leenjisuu dhaabuu qaba," jechuun waamicha dhiyeesse.

    Naannolee Itoophiyaa keessaa Oromiyaatti dargaggoonni hedduu humnaan bakkee garaa garaa irraa qabamuun Raayyaa Ittisa Biyyaatti akka dabalaman yeroo garaa garaatti ni dhagahama.

    Badhaasaan [maqaansaa kan jijjiirame] Godiina Arsii Lixaatti hojjataa mootummaati- hakima loonii.

    Dargaggoota hedduu 'magaazanatti' naqanii poolisiifi milishaan marsee eega

15. 21 Sadaasa 2025Zeleniskiin karoora US waraana Yukireen xumuruuf qopheessite irratti bulchiinsa Tiraamp waliin hojjachuuf qophii ta'uu ibse

    

    Madda suuraa, Getty Images

    Pirezidaantiin Yukireen Voloodmiir Zeleniskii karoora bulchiinsi Tiraamp waraana Yukireenifi Raashiyaatti xumuruuf qopheesserratti US waliin hojjachuuf qophii akka ta'e beeksise.

    Karoorri US qopheessiteefi miliqee bahe jedhamu akka ibsutti Yukireen naannoo Doneetisk harka caalu Raashiyaaf ni dhiisti.

    Yukireen lafa amma Raashiyaan jalaa qabatteen alattis naannoo Donbaas jedhamu kan loltoonni Yukireen qabatanii jiran keessaa loltootashee akka baastu ni godhamti.

    Dabalataanis Yukireen abjuu NATOtti dabalamuu guutummaan akka dhaabdu ibsa karoorri waraana dhaabuuf qophaa'e jedhamu kun.

    Karoora kana qopheessuu keessatti Yukireen hin hirmaanne jedhame. Ergamaa addaa US kan ta'e Istiiv wiitkoof fi kan Raashiyaa Kiriil Dimiitiriiv wal-arguun mariyataa turan.

    Karoorri qophaa'e kun Raashiyaaf waan heddu kan kenneedha jedhamee qeeqamaa kan jiru yoo ta'u, Yukireen waraana Raashiyaa waliin gaggeessaa jirtuuf deggarsa waraanaa US irratti harka caalu hirkachuunshee dhiibbaa UStiif akka saaxilamtu taasiseera jedhama.

    Karoora gama UStiin dhiyaate kana ilaalchisee Pirezidaantiin Yukireen Voldoomiir Zeleniskiin US waliin hojjachuuf qophii ta'uu beeksise.

16. 21 Sadaasa 2025Ashamaa! Tamsaasa keenya kallattii eegalleera.

    Odeeffannoowwan biyya keessafi idiladdunyaa waktaawaa ta'an isin biraan geenya.

    Toora marsariitii, facebook, Youtube fi WhatsApp keenyas hordofaa!

    Dhiyaadhaa!