Ìjọba Naijiria fún àwọn àjèjì tó gba ọ̀nà èrú wọlé ní gbèdéke ọgbọ̀njọ́ láti ṣàtúnṣe físà wọn

Bi awọn ọmọ Naijiria ṣe jẹ ajoji ni awọn ilẹ ibo miran ti wọn japa lọ, bẹẹ ni awọn ajeji to ti orilẹede miran wa si Naijiria naa wa nibi pẹlu.

Labẹ ofin, ẹtọ ni fun awọn ajeji to n gbe Naijiria lati ni iwe iwọle-jade ti a mọ si fisa, ṣugbọn awọn mii ko ni.

Ọtọ ni awọn ti wọn ni iwe naa ṣugbọn ti ọjọ ti lọ lorii rẹ, ti wọn ko si sọ ọ di tuntun bo ṣe yẹ.

Nitori iru awọn eeyan mejeeji yii ni ijọba Naijiria ṣe kede ṣaaju, pe ki wọn ṣe atunṣe to yẹ ko too di oṣu Karun-un ọdun yii.

Lẹyin oṣu mẹrin ti wọn ti kede eyi ni wọn tun ṣẹṣẹ kede gbedeke tuntun bayii.

Gẹgẹ bi ileeṣẹ Nigeria Immigration Service, (NIS) to n ri si iwọle-jade lorilẹede yii ṣe kede bayii, anfaani tun ti wa fun awọn ajeji lati ṣe atunṣe iwe wọn titi di ọgbọnjọ oṣu Kẹsan-an ọdun 2025.

Ki ni yoo ṣẹlẹ lẹyin eyi? Minisita Eto abẹle, Olubunmi Tunji-Ojo, ṣalaye pe ijọba yoo bẹrẹ si fi ọwọ ofin mu ajeji ti iwe rẹ ko ba kunju oṣuwọn, bẹrẹ lati ọjọ akọkọ ninu oṣu Kẹwaa ọdun 2025.

Àwọn wo ni ọ̀rọ̀ yìí kàn?

Gẹgẹ bi ikede naa ṣe wi, anfaani gbedeke ọgbọnjọ oṣu Kẹsan-an yoo wa fun:

Bo tilẹ jẹ pe awọn iwe iwọle-jade kan ko ri jẹ ninu anfaani gbedeke oṣu kan yii, ileeṣẹ NIS sọ pe kawọn ẹni tiru ẹ ba kan naa ri i pe wọn ṣe isọdọtun iwe wọn tọjọ ba ti lọ lorii rẹ, ko ma baa di pe awọn n fi ọwọ ofin mu wọn.

Awọn fisa ti ọ̀rọ̀ yìí kò kàn:

Accredited Diplomat Visa (Fisa fun awọn aṣoju ijọba)

Employment (Expatriate) Visa (Fisa fun awọn ajoji to fẹ ẹ ṣiṣẹ)

Employment Visa – Expatriate (Free Zone) (Awọn ajoji to fẹ da iṣẹ silẹ)

Employment – Expatriate (Government Official) Visa (Awọn oṣiṣẹ ilu)

Employment (INGO) Visa

Employment (Cleric) Visa (Awọn ojiṣẹ Ọlọrun)

Student Visa (Awọn akẹkọọ)

Academic Exchange Programme (AEP) Visa

Bí wọn yóò ṣe ṣe é

Awọn ajeji tọrọ yii kan yoo ni lati lọ si oju opo NIS ko too di ọgbọnjọ oṣu yii, bi wọn ko ba tete ṣe bẹẹ, wọn yoo koju ofin.

Wọn yoo ni lati fi orukọ silẹ lati oju opo email wọn, nibi ti wọn yoo ṣalaye nipa ara wọn si, ti wọn yoo sọ nipa iwe irinna wọn ati idi ti wọn fi fẹẹ jẹ anfaani gbedeke yii.

Lẹyin eyi ni wọn yoo ṣafihan awọn iwe idanimọ wọn, titi kan ẹda fisa to ti lejọ naa.

Bakan naa ni wọn yoo sọ boya wọn ṣi fẹẹ maa gbe ni Naijiria lọna to ba ofin mu, tabi wọn fẹẹ kuro nilẹ yii funra wọn.

Bi wọn ba fi esi wọn naa ranṣẹ tan, wọn yoo ri idahun pe esi naa ti de ibi to yẹ ko balẹ si.

Ajeji naa yoo si le maa ri ibi to de duro nigbakugba to ba kan si oju opo naa lati mọ bo ṣe n lọ.

Ṣugbọn a ko mọ bi eto yii ṣe maa n pẹ to ko too pari.

Kí ló dé tí ìjọba fi sún gbèdéke náà síwájú?

Alaye ijọba Naijiria nipa gbedeke ti wọn fi ọjọ kun naa ni pe yoo jẹ ko han kedere pe ẹka irinna orilẹede yii ṣee fi ọkan tan.

Wọn ni yoo jẹ ko han pe akoyawọ wa, o si ṣee gbagbọ.

Yoo tun ran ijọba lọwọ lati ni akọsilẹ gidi nipa awọn ajeji to n gbe nilẹ yii, eyi yoo wulo lẹka aabo.

Lẹyin gbedeke yii, awọn ti iwe wọn ko ba tun kaju ẹ le di ẹni ti wọn n le jade ni Naijiria, nigbakigba ti ọwọ awọn agbofinro ba tẹ wọn.

Wọn si le fi ofin de wọn lati ma wọ Naijiria mọ laye.

Awọn ileeṣẹ ti awọn ajeji to n ṣiṣẹ pẹlu wọn ko ni iwe igbeluu pipe le ni lati san owo itanran, wọn si le le oṣiṣẹ naa pada si ilu rẹ, tabi ki ọrọ naa da iṣẹ paapaa duro nileeṣẹ bẹẹ.

Eyi kọ ni igba akọkọ ti ijọba Naijiria yoo fi anfaani gbedeke tuntun fun awọn ajeji to gba ọna eru wọ ilu yii, ti wọn ni ki wọn lọọ ṣe atunṣe iwe wọn bo ṣe yẹ.

Ni oṣu Keje ọdun 2019, nigba ijọba Oloogbe Muhammadu Buhari, o kede isunsiwaju oṣu mẹfa fun awọn ajeji to feru wọle si Naijiria lati lọọ tun iwe wọn ṣe.

Koda, ko nawo wọn lowo nigba naa, bẹẹ ni ko si itanran kankan fun wọn.