Witches Conference: Àjọ PFN kéde àdúrà ọjọ́ méjì láti tako àpérò àwọn àjẹ́

Ajọ awọn kristẹni, PFN ti tako apero agbarijọpọ awọn ajẹ ti yoo waye lọsẹ yii ni fasiti ijọba apapọ to wa niluu Nsukka nipinlẹ Enugu.

Ajọ PFN sọ pe ewu nla wa nibẹ ti awọn ajẹ ba ṣe bẹẹ ṣe apero wọn gẹgẹ bi wọn ṣe n gbero.

''A ko le fọwọ leran ki a jẹki ohun ti ko f'ogo fun Ọlọrun, to si tun le ṣakoba fun ọjọ iwaju ṣẹlẹ nipinlẹ Enugu,'' alaga ajọ PFN Bisọbu Godwin Madu, lo woye bẹẹ.

Alaga ajọ PFN rọ alakoso fasiti ti wọn ti fẹ ṣe apero naa, Ọjọgbọn Charles Igwe wi pe ko ma ṣe gba wọn laye, bi ko ba fẹ ri ibinu Ọlọrun.

Biṣọbu Godwin ṣalaye pe ajọ PFN ti kede ọjọ meji bayii fun akanṣe adura lati rii pe apero naa ko waye.

O fikun ọrọ rẹ pe oriṣiiriṣii iṣẹlẹ ti ko fi ogo Ọlọrun han lo ti n ṣẹlẹ lorilẹede Naijiria tẹlẹ, nitorinaa awọn onigbagbọ gbọdọ gbadura lati tako apero ọhun.

Alaga PFN sọ pe ''ọwọ Ọlọrun ni ipinlẹ Enugu wa, nitorinaa a ko ni gba ko di ipinlẹ tawọn ajẹ yoo jẹ gaba le lori.''

Biṣọbu Godwin ni gbogbo awọn onigbagbọ gbọdọ ke pe Ọlọrun ninu adura bayii pe ko wa ja ni Naijiria nitori orukọ rẹ.