Илм-фанда илк марта инсон миясида яшаётган қурт чиқариб олинди Yangiliklar Dunyo
Сурат манбаси, ANU
Дунёда биринчи марта, олимлар австралиялик аёлнинг миясида 8 сантиметрлик қурт тирик топилганини айтишди.
"Торга ўхшаш тузилма" ўтган йили Канберрада жарроҳлик амалиёти вақтида беморнинг шикастланган олд мия қисмидан тортиб олинган.
"Буни биз, албатта, кутмагандик. Ҳамма ҳайратда қолди", дейди жарроҳликни ўтказган доктор Хари Прия Банди.
64 ёшли аёл бир неча ой давомида ошқозон оғриғи, йўтал ва тунда терлаш каби аломатларни бошдан кечирган, бу эса унутувчанлик ва депрессияга етаклаган.
У 2021 йил январ ойи охирида касалхонага ётқизилган ва кейинроқ рентгенда "миянинг ўнг олд қисмидаги атипик жароҳат" аниқланган.
Аммо унинг аҳволи сабабини фақат 2022 йил июнида биопсия олаётган доктор Бандининг пичоғи аниқлади.
Қизил паразит унинг миясида икки ойгача яшаб келган бўлиши мумкин, дейди шифокорлар.
Янги Жанубий Уелс штатининг кўл ҳудудида яшаган аёлнинг аҳволи энди яхшиланмоқда.
Унинг иши инсон миясига личинкалар кириб бориши ва ривожланишининг биринчи ҳодисаси ҳисобланади, дейди тадқиқотчилар бу ҳақда хабар берган "Ривожланаётган юқумли касалликлар" журналида.
"Мен уни тортиб олдим ... ва у бемалол ҳаракат қиларди"
Чувалчангни топган нейрохирургнинг айтишича, у рентгентда ғалати кўринган мия қисмига текканидагина уни сезган.
Сурат манбаси, ANU
«Эй худо, дедим, бу кулгили туюлади, бунданда ғайритабиий нарсани кўриб бўлмайди", дейди доктор Банди.
"Ва кейин мен ҳақиқатан ҳам ниманидир ҳис қилдим ва пинцетимни олиб уни чиқариб олдим ва ларзага келдим: "Вой! Бу нима? У қимирлаяпти!»
"Ҳамма ҳайратда қолди. Биз топган гижжа эса миядан ташқарида бемалол ҳаракатланар эди", дейди у.
Кейин у юқумли касалликлар бўйича мутахассис, ҳамкасби Санжая Сенанаяке билан нима қилиш кераклиги ҳақида маслаҳатлашган.
Доктор Сенанаяке: "Ўша операция хонасида [жарроҳ] аномалияни аниқлаш учун пинцетни олиб, 8 см узунликдаги жонли оч қизил рангдаги қуртни чиқарганида ҳамманинг юраги чиқиб кетган.»
"Бу одамда илгари ҳеч қачон ҳужжатланмаган янги инфекция."
Тадқиқотчилар бу ҳолат касалликлар ва инфекцияларнинг ҳайвонлардан одамларга ўтиш хавфи ортиб бораётганига ишора эканини айтишяпти.
Ophidascaris robertsi думалоқ қурти гилам питонлари, яъни Австралиянинг катта қисмида учрайдиган заҳарсиз илонларда кенг тарқалган.
Олимларнинг таъкидлашича, аёлга думалоқ қурт у ўзи яшайдиган жой яқинидаги кўл бўйида, Варригал кўкатларининг бир турини йиғиб олаётган вақтида ўтган. Бу ҳудудда гилам питонлари ҳам яшайди.
"Бу шунчаки одамзот популяцияси ўсиб бораётгани ва биз ҳайвонларга яқинлашиб уларнинг яшаш жойларига тажовуз қилаётганимиздан дарак беради. Бу ёввойи кўршапалаклардан уй чўчқаларига ўтиб кетган Нипа вируси бўладими, ёки кўршапалаклардан эҳтимолки бошқа жонзотга ва кейин инсонга ўтган Sars ё Mers коронавирусими, биз буни қайта-қайта кўряпмиз», - дейди Доктор Сенанаяке.
https://t.me/bbcuzbek
BBC.COM/UZBEK
Telegramda bog'lanish raqami +44 7858860002
