НАТО Украинани иттифоққа ҳали қўшмоқчи эмас, аммо қандай ёрдам бермоқчи? Янгиликлар Dunyo Yangiliklar

Вилнюсдаги НАТО саммитининг иккинчи кунида Украина Президенти Володимир Зеленский бир неча давлатлар раҳбарлари билан учрашди.

11 июль куни Президент Зеленский кескин баёнот эълон қилди, НАТОни қатъиятсизликда айблади.

У Украинани НАТОга аниқ қачон қўшилиши борасида муддат белгиланманини "абсурд" деб атади.

"Украинанага таклиф ёки аъзолик бўйича аниқ муддат белгиланмагани мисли кўрилмаган ва абсурд амал", деб ёзди у Твиттердаги саҳифасида.

"Афтидан Украинани НАТОга таклиф қилиш ёки аъзоликка қабул қилишга тайёр эмаслар."

Алоқадор мавзулар:

"Украинанага таклиф ёки аъзолик бўйича аниқ муддат белгиланмагани мисли кўрилмаган ва абсурд амал. Афтидан Украинани НАТОга таклиф қилиш ёки аъзоликка қабул қилишга тайёр эмаслар", деб ёзди у Твиттердаги саҳифасида.

НАТО Бош котиби Йенс Столтенберг журналистлар билан мулоқот пайти ундан, ҳарбий иттифоққа қўшилиши учун Украина нима қилиши керак, деб беш марта сўрадилар.

Столтенберг айтишича, Украинадан аъзолик ҳаракатлари бўйича режа талаб қилинмайди.

"Қачон иттифоқчилар келишсалар ва шартлар бажарилса, биз Украинага НАТОга кириши учун таклиф берамиз", - деди НАТО Бош котиби Столтенберг.

Бош котиб сўзларига кўра, Киевнинг ҳарбий алянсга кириш жараёни икки босқичдан эмас, бир босқичдан иборат бўлади.

НАТО-Украина кенгаши тузилади, унда Киев ва иттифоқ аъзолари "тенг" кўрилади.

Саммитда Франция Украинага узоқ масофага отиладиган SCALP ракеталарини беришга қарор қилгани хабар қилинди.

SCALP ва Британиянинг Storm Shadow ракетаси деярли бир хил, уларни Британия ва Франция ширкатлари биргаликда ишлаб чиққанлар.

250 км узоқликдаги нишонни уришга қодир Storm Shadow ракеталарини Украина қуролли кучлари аллақачон ишлатяпти.

Германия 25 Леопард танки, зирҳли машиналар, артиллерия снарядлари ва Patriot тизимини бериши ҳақида эълон қилди.

Саммитнинг иккинчи куни Президент Зеленский Канада Бош вазири Жастин Трюдо, Германия канцлери Олаф Шольц, Британия Бош вазири Риши Сунак, Австралия Бош вазири Энтони Албаниз, Нидерлания Бош вазири Марк Рютте, Франция Президенти Макрон, АҚШ Президенти Байден билан музокаралар ўтказган, давлат раҳбарлари Украинага қўшимча ёрдамлар ҳақида ваъда қилишган.

Хусусан, Австралия 30 та Бушмастер бронемашиналарини, Норвегия 1000 та микродрон, NASAMS ракета тизимига элементлар ваъда қилишган, Нидерландия Украина учувчиларини F-16 Америка самолётларида парвоз қилишни ўргатишни август ойида бошлашини билдирган.

Шу куни йирик еттилик раҳбарлари Украинага ҳарбий кўмак ва хавфсизлик кафолатлари декларациясини имзоладилар.

Декларацияда айтилишича, G7 мамлакатлари Украинанинг ўзини мудофаа қилишга қодир бўлиши ва хавфсизлигини таъминлаш мажбуриятини олганлар.

Президент Зеленский ушбу декларацияни Украинанинг "муҳим ғалабаси" деб атади.

НАТО саммити доирасида илк бор янги ташкил қилинган НАТО-Украина Кенгашининг биринчи йиғилиши бўлиб ўтган.

Саммит якунида Президент Зеленский ва НАТО Бош котиби Йенс Столтенберг матбуот анжумани ўтказишган, унда Столтенберг "Украина НАТОга ҳар қачонгидан ҳам кўра кўпроқ яқинлашди" деб айтди.

https://t.me/bbcuzbek

BBC.COM/UZBEK

Telegramda bog'lanish raqami +44 7858860002