АҚШ: Россия Украина жангида беш ой ичида 20 минг аскаридан айрилди Rossiya Yangiliklar Dunyo Янгиликлар

АҚШ ҳисоб-китобларига кўра, декабр ойидан бери Украинадаги жангларда 20 мингдан ортиқ Россия аскари ҳалок бўлган.

Яна 80 минг киши яраланган, деди янги махфий маълумотларга таяниб гапирган Миллий хавфсизлик кенгаши матбуот котиби Жон Кирби.

Ҳалок бўлганларнинг ярми шарқий Бахмут шаҳрига ҳужум қилган "Вагнер" гуруҳининг ёлланма аскарлари бўлишган.

Россия ушбу шаҳарни ўтган йилдан бери шафқатсиз ҳужумлар билан олишга ҳаракат қилмоқда.

Ҳозирда Бахмутнинг катта қисми россияликлар қўлида, бироқ Украина қўшинлари шаҳарнинг ғарбида кичик бир ҳудудни ҳамон назорат қилмоқда.

Шиддатли жанг ҳар икки томон учун ҳам катта рамзий аҳамиятга эга. Украина расмийлари бу жангдан Россия қўшинларини имкон қадар кўпроқ ўлдириш ва уларнинг захираларини йўқ қилиш учун фойдаланаётганликларини айтишган.

"Россиянинг асосан Бахмут орқали Донбас [минтақасига] ҳужум қилишга уриниши муваффақиятсизликка учради", деди жаноб Кирби журналистларга. "Россия ҳеч қандай реал стратегик ва муҳим ҳудудни эгаллаб ололмади."

"Бизнинг ҳисобимизча, Россия томонидан 100 000 дан ортиқ одам қурбон бўлган, жумладан, 20 000 дан ортиғи жангда ҳалок бўлган", — дея қўшимча қилди у.

АҚШ маълумотларига кўра, Бахмутдаги йўқотишлар декабр ойи бошидан бери саналган.

"Хулоса шуки, Россиянинг ҳужум ҳаракатлари бир неча ой давом этган жанглар ва фавқулодда йўқотишлардан сўнг тескари натижа берди", деди жаноб Кирби.

Унинг қўшимча қилишича, у украиналик қурбонлар борасида ҳисоб-китобни бермайди, чунки "улар бу ерда қурбонлар. Россия эса босқинчи".

Би-Би-Си берилган рақамларни мустақил равишда тасдиқлай олмайди. Москва АҚШ рақамлари ҳақида изоҳ бермади.

Қурбонлар кимлар?

Бахмут урушгача 73 минг аҳоли яшаган, стратегик аҳамияти ҳам кўп муҳим бўлмаган шаҳар.

Лекин Кремлга ўзининг ҳарбий ютуғини кўрсатишни истаётган Россия ҳарбийлари ўтган йил ёзидан буён Бахмутга ҳужум қилиб келади.

Бу ерда имкони борича кўп Россия аскарини йўқ қилиб, силласини қуритмоқчи бўлаётганини айтаётган Украина қуролли кучлари эса Бахмутни қаттиқ мудофаа қилаяпти.

"Россиянинг Бахмут орқали Донбассга ҳужуми барпбод бўлди, Россия бирор бир салмоқли ҳақиқий стратегик ва муҳим ҳудудни қўлига ололмади", деди Жон Кирби.

Ўлганларнинг деярли ярми Вагнерчилар, уларнинг аксари маҳкумлар.

Бахмутда Россия минглаб аскарини йўқотаётгани анчадан бери хабар қилинади.

Вагнер асосчиси Евгений Пригожин ҳам ўзларининг катта йўқотишлар бераётганларини тан олган.

Уруш шароитида ҳақиқий талофатларни аниқлаш имкони йўқ.

Яқинда сизиб чиққан АҚШ жосуслик ҳужжатларида 1 мартгача Россиянинг ўлган ҳарбийлари сони 35 000 билан 43 500 ўртасида деб кўрилган.

ВВСнинг Рус хизмати 2022 йил 24 февралидан буён Украинада ҳалок бўлгани тасдиқланган россияликларнинг рўйхатини тузиб келади.

Шу йилнинг 28 апрелигача 21700 ҳалок бўлганларнинг исм-шарифини аниқлашнинг имкони бўлган, шундан 2200 нафари кўнгилли, 1312 нафари Вагнерчилар бўлган.

https://t.me/bbcuzbek

BBC.COM/UZBEK

Telegramda bog'lanish raqami +44 7858860002