Янгилик: Туркияда яна зилзила, қурбонлар, яраланганлар бор, Эрдоған Ўзбеклар зич яшовчи Ҳатайга борди, Блинкен ҳам вилоятни кўрди, Ҳатайда қутқарув тугамайди, ўзбекистонликлар зилзиладан қўрқмайдими?

Туркиянинг даҳшатли зилзилалар сатҳида бугун нималар бўлмоқда? Сўнгги тафсилотлар.

Алоқадор мавзулар:

Туркияда яна зилзила

Шу соатларда олинган хабар: Туркия жанубида яна зилзила юз берган.

Бу гал зилзила маркази Туркиянинг Ўзбеклар зич яшовчи Ҳатай вилояти бўлган.

Ҳатай Туркия жануби ва жануби-шарқини ўз забтига олган 6 феврал кунги даҳшатли зилзилалардан ҳам қаттиқ жабр кўрган.

Бугунги зилзила кучи 6,4 магнитудага тенг экани айтилмоқда. Унинг ортидан яна 5.8 магнитудали зилзила юз берганига оид хабарлар ҳам бор.

Ҳатай шаҳри мэри баъзи бинолар вайрон бўлгани, вайроналар остида қолганлар борлигини айтган.

Ҳатайнинг Самандағ ва Дефне туманларида ҳам вайронагарчиликлар борлигига оид хабарлар олинмоқда.

Туркия вице-президенти Фуат Октай янги зилзилалар натижасида 8 кишининг яраланганини маълум қилди.

Уларнинг шифохоналарда даволанаётганини билдирди.

Туркия Ички ишлар вазири Сойлунинг ҳозиргина маълум қилишича, Ҳатайдаги зилзилаларда 3 киши ҳалок бўлган, 200 дан ортиғи жароҳатланган.

Дефне ҳокими Иброҳим Гўзелнинг айтишича, зилзила натижасида туманларида электр энергияси узилган.

Туркияга қўшни Сурияда фаолият олиб бораётган "Оқ каскалилар" инсонпарварлик гуруҳи ҳам аҳолининг яралангани ҳақида хабар берган.

Ер силкинишлари қўшни давлатлар, жумладан, Сурия, Миср ва Ливанда ҳам сезилгани айтилмоқда.

AFAD денгиз сатҳининг 50 см гача кўтарилиши хавфидан эҳтиёт чораси сифатида фуқароларни қирғоқ чизиғидан узоқда бўлишлари муҳимлигини таъкидлаган.

Айрим хабарларга кўра, агентлик кейинроқ бу твитини ўчирган.

Зилзила Ҳатайга Президент Эрдоған ташрифи ортидан кузатилган.

Президент Режеп Таййип Эрдоған бугун, душанба куни Ҳатайга борган.

Ҳатайда сўзларкан, ҳалокатли табиий офатдан зарар кўрган барча шаҳарларни уйлари, иш жойлари, саноатлари, қишлоқ хўжалиги, тарихий ва маданий қадриятлари билан тўлиғича қайта тиклашларини айтганди.

Истисно

Туркия ҳалокатли табиий офатдан қаттиқ жабр кўрган 10 вилоятидан саккизтасида қидирув-қутқарув ишларини тўхтатди.

Аммо ўн мингдан зиёд этник Ўзбеклар зич яшовчи Ҳатай ва яна Қаҳрамонмараш бундан мустасно эканини айтди.

Ҳатайдаги қутқарув-қидирув ишларини икки юзга яқин ўзбекистонлик қутқарувчилар ҳам олиб боришмоқда.

Агар, сўнгги расмий маълумотларга таянилса, улар шу пайтгача ўнлаб инсонни вайроналар остидан тирик қутқариб олишган.

Ўзбекистон Мудофаа вазирлигининг худди шу вилоятда очган кўчма госпитали эса, 2 мингдан зиёд жабрдийдага ёрдам кўрсатган.

Туркия дунёнинг ўзбекистонликлар энг кўп давлатларидан бири ҳам бўлади.

Туркияда турли иш, юмуш ва таҳсилда банд ўзбекистонликларнинг сони минглаб.

Қўллов

НАТО Бош котибидан кейин кеча, якшанба куни Туркияга АҚШ Давлат котиби ҳам ташриф буюрган.

Энтони Блинкен аллақачон зилзиладан жабр кўрган Туркияга $100 миллион АҚШ доллари миқдорида инсонпарварлик кўмаги ваъда қилгани айтилмоқда.

Бу унинг АҚШ Давлат котиби лавозимини эгаллаши ортидан Туркияга илк ташрифидир.

Хабарларга кўра, Энтони Блинкеннинг сафари зилзиладан аввалга режаланган бўлган, аммо АҚШ Давлат котиби ҳозир ташриф буюриш билан Туркияни қўлламоқчи бўлган.

Унинг айтишича, ваъда қилган ёрдамлари Туркияга "тезда етиб келади".

"Афсуски, бу ёрдам қидирув-қутқарув эмас, кўпроқ қайта тиклаш ишларини назарда тутади. Бу узоқ муддатли кўмак", - деб айтган Энтони Блинкен.

АҚШ Давлат котиби бугун, душанба куни Туркия президенти билан учрашишдан аввал айнан Ҳатайга борган ва у ердаги қидирув, қутқарув, кўмак ишлари билан яқиндан танишган.

Ҳатайдаги Ўзбеклар қишлоғида ҳам соғ қолган уй ва иншоотларнинг сони бармоқ билан санарли.

Қишлоқдагилардан бирининг бизга айтишича, маҳаллий қабристонда қатор, қатор янги қабрлар пайдо бўлган, биргина ўзи "саксонга яқин янги қабрни санаган".

Ҳатай, Ўзбекистон ва ўзбеклар

Шу кунларда Ўзбекистон Ташқи ишлар вазири вазифасини бажарувчиси Бахтиёр Саидов ҳам Туркияга борган.

Туркия Ташқи ишлар вазири билан Ғозиантепда учрашиб, кейин айнан Ҳатайни бориб кўрган, ўзбеклар билан учрашган, ҳалокатли зилзиладан жабр кўрган одамлар билан суҳбатлашган.

У ердаги қутқарувчилар ва Мудофаа вазирлигининг кўчма госпитали фаолияти билан ҳам танишган.

Бахтиёр Саидов, "маҳаллий аҳолини қўллаб-қувватлаш учун дунёнинг барча бурчакларидан бу ерга келган барча ватандошлардан миннатдор" эканликларини айтган.

"Ушбу табиий офат оқибатлари қалбларини чуқур яралагани, бу оғир пайтларда ўзларининг Туркия билан биргаликлари"ни таъкидлаган.

Туркиядаги ҳалокатли зилзилаларда тўрт нафар Ўзбекистон фуқаросининг ҳам қурбон бўлгани расман тасдиқланган.

Орада бир қанчасининг тирик қутқарилгани, улардан айримларининг касалхонага ётқизилгани ҳам хабар берилган, аммо бедарак кетгани айтилган жами ўндан ортиқ ўзбекистонликдан қолганларининг тақдирига ҳалича ойдинлик киритилмаган.

Шу кунларда Ўзбекистон ўз фуқароларини зилзила сатҳидан самолётларда ортга қайтараётганига оид хабарларнинг сони ҳам ортган.

Анқарадаги Ўзбекистон Элчихонаси қошида ташкил этилган "Тезкор Гуруҳ Штаби"нинг маълум қилишича, 17 февраль кунига қадар зилзила ҳудудида бўлган жами етмишга яқин ўзбекистонлик билан алоқага чиқишган.

Штабнинг маълум қилишича, улардан 20 нафари Ўзбекистонга қайтиш истагини билдиришган.

Қолганлари эса, "эҳтимолий ҳодисалардан огоҳлантирилганликларига қарамай, Туркияда қолиб, ишлашга қарорлари қатъий" эканини айтишган.

"Дардингиз - дардимиздир"

6 февраль кунги устма-уст зилзилалар Туркия жануби ва жануби-шарқида ўн минглаб одамни ўлдирган, ўн минглабини шикастлаган ва ўн минглаб турар-жой, биноларни вайрон қилган.

Туркия президенти Режеп Таййип Эрдоған буни ўзлари учун "аср фалокати", деб атаган.

Туркия баробарида Сурияни ҳам ўз забтига олган зилзилалар қурбонларининг сони ҳозирга келиб жами 44 минг кишидан ортган.

Дараги чиқмаган инсонларнинг сони эса, ҳануз кўп, уларнинг орасида айрим ўзбекистонликлар ҳам бор.

Зилзиладан жабр кўрган ҳар икки давлат ҳам ҳозирча бедарак кетганлар сонига аниқлик киритишмаган.

Қутқарувчилар зилзиладан икки ҳафтача ўтиб ҳам, яъни ўтган жума куни уч кишини вайроналар остидан тирик олиб чиқишга муваффақ бўлишган.

Вайроналар остида қолган катта сондаги одамни қутқариш учун юздан ортиқ давлат ўз кўмак қўлини чўзган, Ўзбекистон биринчилардан бўлиб бу ишга қўл урган мамлакатлардан бири экани кўрилган.

Ўзбекистон томонининг ҳар томонлама кўмаги аллақачон Туркия тарафининг расмий ва ошкора эътирофларига ҳам сабаб бўлиб улгурган.

Ўзбекистонлик кўнгиллилар гуруҳи Туркиянинг зилзиладан жабр кўрган қатор минтақаларида ўз ҳисобларидан иссиқ овқат пишириб, тарқатишни ҳам йўлга қўйишган.

Ўзбекистон шу қисқа вақтнинг ўзида Туркияга бир неча юз тонна инсонпарварлик ёрдами юборишга ҳам улгурган.

BBC.COM/UZBEK билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek