Янгиликлар. Туркия зилзиласи: Ҳозир мингдан ошиқ кишига 6 та ҳожатхона тўғри келмоқда, вабо ва ичтерламадан қўрқувлар кучайган... Yangiliklar Turkiya Dunyo

Туркиянинг зилзила сатҳларида янги хавотирлар бўй кўрсатмоқда. Одамлар қўрқувда...

Алоқадор мавзулар:

Устма-уст қақшатқич зилзила Туркиянинг 10 миллиондан ортиқ одам яшаган ҳудудларини ўз забтига олган.

Туркия жануби ва жануби-шарқидаги жами 10 вилоятдаги ўн минглаб турар-жой ва бинони вайрон қилган.

Табиий офатдан ўн кунча ўтиб ҳам, чодирлардан бошпана топиб турганларнинг сони оз эмас.

Дейлик, биргина Қаҳрамонмарашдаги маҳаллий стадиондагиларининг ўзи мингдан ошиши айтилади.

Масъуллар бу ерда зилзила жабрдийдалари учун чодирлардан вақтинчалик шаҳарча тиклашган.

Қаҳрамонмараш Туркиядаги сўнгги зилзилалардан бирининг маркази бўлади.

Ҳозир масъуллар ва қутқарувчиларнинг эътибори омон қолганларга қандай ёрдам бериш масаласига қаратилган.

Аммо табиий офат сабаб, шаҳар инфратузилмасининг катта қисми вайрон бўлган.

Ҳозирги асосий вазифа эса, у ерда турли ўта юқумли хасталиклар тарқалиб кетишининг олдини олиш.

21 ёшли талаби Муҳаммад Эминнинг айтишича, 6 февраль кунги зилзиладан буён ювинишмаган, "бунинг ҳеч бир имкони бўлмаган".

Қаҳрамонмарашдаги маҳаллий стадиондан бошпана топиб турган мингдан зиёд кишига эса, бор-йўғи 6 та ҳожатхона тўғри келади.

Жаҳон Соғлиқни сақлаш ташкилотининг Туркиядаги вакили Ботир Бердиқличевнинг огоҳлантиришича, зилзилалардан зарарланган ҳудудлардаги сув тақчиллиги касаллик тарқалиш хавфини кучайтиради.

Туркиянинг даҳшатли зилзилалардан қаттиқ жабр кўрган жанубий Искандарун шаҳридагилар ҳам ҳозир жиддий хавотирда.

"Биз вабо ва тиф (ичтерлама) тарқалса керак, деб ўйлаяпмиз. Бунинг олдини олиш учун зудлик билан бутун ахлат, чиқинди йўқ қилиниши, тозалаш ва зарарсизлантириш (кальцификация) ишлари олиб борилиши керак. Аммо ҳозир бунинг иложи йўқ. Биз имкон қадар ҳаракат қилаяпмиз", - дейди маҳаллий фармацевт Жин Озсайгили.

Туркияда қутқарув-кўмак ишлари кечаю кундуз олиб борилмоқда, уларга чорак миллиондан зиёд одам жалб қилинган.

Зилзила жабрдийдаларига бирламчи тиббий ёрдам кўрсатиш учун Ўзбекистон ҳам Туркияда ўзининг дала госпиталини тиклаган.

Сурияда эса, узоқ йиллик фуқаролар уруши туфайли вазият янада мураккаб.

Орада жабрланган ҳудудларга ёрдам етказиш уринишлари бир неча бор муваффақиятсизликка учраган.

Чунки ёрдам етказиш мумкин бўлган йўл у ердаги турли рақиб гуруҳлар тўқнашиб турган чизиқдан ўтади.

Сурияда зилзила қулатган минглаб турар-жой ва бинолар вайроналари остида қолаётганлар сони ҳозир ҳам катта кўпчиликни ташкил этиши айтилади.

У ердаги даҳшатли зилзилалардан жабр кўрган миллионлаб одамнинг аксарияти табиий офатга қадар ҳам фавқулодда инсонпарварлик ёрдамига эҳтиёжманд бўлган.

BBC.COM/UZBEK билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek