Украина уруши - Зеленский: Энди танкларни тезроқ етказиб беринг - Видео Ukraina Dunyo Yangiliklar

Президент Зеленский Ғарб танкларини Украина қуролли кучларига тезроқ етказиб беришга чақирди, Россия буни Ғарбнинг урушга қўшилгани белгиси деди.

Россия босқинини бошлаганидан кейин ҳар тун украиналикларга видео мурожаат қиладиган Президент Зеленскийн АҚШ ва Германия раҳбариятининг ниҳоят Абрамс ва Леопард танкларини Украинага беришга қарор қилганларини олқишлади, уларга ўз миннатдорлигини билдирди.

Фақат бу танкларни энди Украинага тезроқ етказиб беришга чақирди.

Алоқадор мавзулар:

Зеленский ва Украина раҳбарлари эндиги вазифа Ғарб иттифоқчиларидан узоқ масофага отадиган ракеталар ва самолётларни қўлга киритиш эканини айтмоқдалар.

Россия Украинага бостириб кирганидан кейин қурол-яроғ ёрдами Кремль томонидан ҳарбий можаронинг кенгайиши деб талқин қилинишидан чўчиган Ғарб анча эҳтиёткорлик қилди.

Узоқ вақт давомида HIMARS ракета тизимлари Украинага берилмади.

Берилганида ҳам Украина бу ракеталардан Россия ҳудудини нишонга олмаслиги учун фақат яқин масофага отадиганлари берилди.

Россия 2022 йил октябридан Украина энергетика тизимини вайрон этиш ҳужумларини бошлаганидан кейин Патриот ҳаво ҳужумидан мудофаа тизимларини беришга розилик берилди.

Ўтган йил сентябридан буён Россия босиб олган ҳудудларининг анча қисмини қайта ўз назоратига киритишга муваффақ бўлган Украина қайта ҳужумга ўтмаяпти, муваффақиятли қарши ҳужум учун камида 300 танкка муҳтожлигини айтиб келади.

25 январь куни АҚШ 31 та Abrams танкини беришга қарор қилганини хабар берди.

Германия ҳукумати Leopard 2 танкларидан 14 та ваъда қилди.

Польша ҳукумати ўз ихтиёрида бўлган Германияда ишлаб чиқарилган Leopard 2 танкларини Украинага беришга қарор қилганига анча бўлган, фақат Германия ҳукуматининг розилигини кутаётган эди.

Украина Польшадан ҳам 14 Леопард олади деб кутилмоқда.

Буюк Британия иттифоқчи мамлакатлар орасида танк беришга рози бўлган дастлабки мамлакат бўлган, ўзининг 14 Challenger 2 танкини Украинага юборишга қарор қилган.

Украинага бошқа мамлакатлар ҳам зирҳли техника билан ёрдам бериш истакларини изҳор этдилар.

Бундан кейин Украина раҳбарияти 200-300 километр узоқликдаги нишонни уроладиган ракета тизимлари ва ҳарбий самолётларни ҳам қўлга киритишга умид қилмоқда.

Politico нашрининг ўз манбаларига таяниб хабар беришича, НАТО аъзолари ўртасида реактив қирувчи самолётларини Украинага бериш мавзуси муҳокамаси бошланган.

26 январь куни Украинага танк бериш қарорини Россия президенти матбуот котиби Дмитрий Песков қоралади.

Танк етказиб бериш Ғарб мамлакатларини конфликт иштирокчиларига айлантиради, деди Песков.

"Европа пойтахтлари ва Вашингтондан доим Украинага турли қуролллар, шу жумладан, танкларни етказиб бериш бу мамлакатларнинг ёки иттифоқнинг Украинада бораётган жанговар ҳаракатларга аралашганини англатмайди, деган баёнотлар янграйди. Биз бунга мутлақо қўшилмаймиз. Иттифоқ ва мен тилга олган пойтахтлар қилаётган ишлар Москвада томонидан бевосита тўқнашувга аралашиш деб кўрилади. Биз бу нарсанинг ортиб бораётганини кўраяпмиз", деди Кремль матбоут котиби Дмитрий Песков.

Бундан кейин Ғарб берган танкларда Украина ҳарбийларини ўргатиш талаб қилинади.

Германия ўз танклари Украинага март ойи охири, апрель ойи бошларида етказиб берилиши мумкинлигини билдирди.

Ғарб танклари хабари, афтидан, Россияни ғазаблантирди, охирги кунларда пасайган ёппасига ракета ҳужумлари 26 январь тонгида кучайгани кузатилди.

Шу куни бутун Украина ҳудудида ҳаво тревогалари янгради.

Россия Украинага дронлар ва ракеталардан ҳужумлар уюштирди.

Украина ҳарбийларига кўра, отилган 55 қанотли ракетадан 47 тасини уриб туширишга муваффақ бўлганлар.

Шундан 20 таси пойтахт Киевни нишонга олган.

Киев шаҳри ҳокимлиги бир инсон ҳалок бўлгани, икки киши жароҳатланганини хабар қилди.

Ғарб жосуслик хизматларига кўра, Россия ўтган йили кузида Беларусь ҳудудида ҳарбий тайёргарликни бошлаган сафарбар этилган россияликлардан дивизия тузишга муваффақ бўлган, лекин улар эски ҳарбий қурол ва техника билан таъминланганлар.

Россия тез орада мобилизация қилинган янги аскарларини жанг майдонига ташлайди деб кутилаяпти, аммо улардан наф кам, деб ҳисоблайди Британия Мудофаа вазирлиги разведкаси.

Telegram каналимиз: https://t.me/bbcuzbek

BBC.COM/UZBEK билан Telegram орқали +44 7858860002 номери билан боғланинг.