Украина. Янгиликлар. Воқеа сатҳидан: Путиннинг ўзи қўлига қурол олди Putin Rossiya Ukraina Yangiliklar

Путин бир ой деганда яна Россия қўшинлари билан бирга кўриниш берди. Аммо бу гал қўлига қурол олди, отди. Унинг мерганлиги Украина урушига роппа-роса 8 ой тўлиши арафасига тўғри келди.

Унинг қандай ўт очгани Россиянинг давлат телевизион каналлари орқали кўрсатилди.

Алоқадор мавзулар:

Мерганлик

Путин Рязандаги полигонга Россия Мудофаа вазири билан бирга ташриф буюрди.

Полигонда сафарбар этилганларнинг урушишга қанчалик тайёр эканликлари билан қизиқди.

Россия президенти худди шу манзарада ўзининг мерганлик маҳоратини ҳам намойиш қилди.

Бу жараённи унинг шундоққина ёнгинасида Сергей Шойгунинг шахсан ўзи кузатиб турди.

Путин ўзининг Украина уруши учун қисман сафарбарлигини шу йилнинг 21 сентябрь куни эълон қилган.

Аммо унинг дастлабки ваъдасига зид бу қарори Россияда норозилик ва эътирозлар билан қарши олинди.

Саноқли ҳафталарнинг ўзидаёқ мобилизация ёшидаги юз минглаб россиялик мамлакатни тарк этди.

Уларнинг имкон қадар тезликда Россиядан чиқиб кетишга бўлган уриниши чегараларда инсоний инқироз ҳолатини пайдо қилиш даражасига ҳам етди.

Қисман сафарбарликка оид қарор, бошқа томондан, энди Украина урушининг янада кучайишига оид жиддий хавотирларни ҳам уйғотди.

Сафарбарлик ва қурбонлар

Путин ўтган ҳафта Қозоғистон пойтахтида экан, қисман сафарбарликнинг шу ой охирига қолмай тугашини эълон қилди.

Украина уруши учун яна сафарбарлик эълон қилиниши ёки қилинмаслиги саволига жавобни эса, мавҳум қолдирди.

Путиннинг Остонада келтирган сўнгги рақамларига таянилса, шу пайтгача 222 мингдан зиёд одам урушга сафарбар этилган.

Улардан эллик мингга яқини аллақачон ҳарбий бўлинмаларга бориб қўшилган.

Аммо Россия президенти янги сафарбар этилганлардан қанчаси ҳалок бўлганига оид рақамларни очиқламаган.

Путин сафарбар этилганларнинг бундан ўнлаб йиллар олдинги ҳарбий тажрибасини назарда тутиб, жангга шай бўлишлари учун саноқли ҳафталарнинг ўзи кифоя қилишини айтган.

Сўнгги кунларда айнан тажрибасизлиги боис Украина урушида қурбон бўлаётган россияликларга оид хабарларнинг сони эса, ортган.

Яна тўрт украин вилоятининг халқаро қонунларга зид аннексияси Россия ва Украина ўртасидаги сулҳ истиқболини буткул йўққа чиқарган.

Кучайиб бораётган эскалация дунёда бу яқин ўн йилликларда кузатилмаган ядровий уруш хавфини ҳам пайдо қилган.

Путин сўнгги бор Украина ва Ғарбга пўписа қилган қуроли эса, ядровийси бўлган.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek