Оғзи бор, кети йўқ махлуқ одамзоднинг аждоди бўлганми? Одамзод ва Дунё Dunyo Yangiliklar Markaziy Osiyo

Олимлар ярим миллиард йиллик кети йўқ - орқа чиқарув тешигисиз махлуқнинг сирини ва ниҳоят очишди.

Алоқадор мавзулар:

Кетсиз жонивор...

Бу қадимий жонзот Saccorhytus coronarius, деб номланади.

Унинг тиканлари, оғзи бор, аммо кети йўқ.

Қопга ўхшаш ушбу денгиз ҳайвонининг қолдиқлари 2017 йилда топилган.

У одамларнинг энг қадимги аждодлари бўлиши мумкин, дея тахмин қилинган.

Лотин тилида Saccorhytos coronarius, дея номланган.

Бу қадимий жонзот аввал deuterostomes лар - оғзидан аввал кети (ануси) шаклланувчи жонзотлар рўйхатига киритилган.

Мазкур гуруҳдагилар умуртқали ҳайвонлар, жумладан, одамларнинг ҳам ибтидоий аждодлари саналишади.

Янги тадқиқот эса, бу митти жонзот бутунлай бошқа ҳайвонлар гуруҳига киритилиши кераклигини кўрсатмоқда.

Эволюцион чалкашлик

Тадқиқотни Хитой ва британиялик тадқиқотчилар олиб боришган.

Улар бу жонзот қолдиқларини муфассал рентгенологик таҳлилдан ўтказишган.

Олимлар ана шу таҳлиллари ортидан Саккорит ўргимчак ва ҳашаротларнинг аждодлари, деб кўрилувчи ecdysozoans лар гуруҳига тааллуқли, деган хулосага келишган.

Мазкур эволюцион чалкашликка жонзот орқа чиқарув тешигининг йўқлиги ҳам асос берган.

Сабаблар

Саккоритни батафсил ўрганган тадқиқотчи Эмили Карлайл BBC Radio 4 нинг Science дастурига худди шу нуқтаи назарни изҳор этган.

Бунинг сабабини изоҳлашда "қизиқ фаразлар"дан бири ўлароқ бу гуруҳдаги барча жонзотнинг ануссиз экани, Саккоритнинг улардан кейин пайдо бўлганини тилга олган.

"У ўз эволюцияси пайтида кетини йўқотган"лигини тахмин этган.

Олимага кўра, бу қадимий жонзот "бир жойда ўтирволиб, ҳамма нарса учун битта тешикка қаноат қила олган бўлиши мумкин".

Бироқ Кембрий дарахтида Саккорит ўрнини ўзгартиришнинг асосий сабаби бошқа.

Яъни, дастлабки текширувлар чоғида унинг оғзини ўраб турган тешиклар deuterostomes ларнинг ибтидоий хусусияти бўлган жабра ғоваклари, дея талқин этилган.

Олимлар 1 мм лик бу жонзотни кучли рентген нурлари ёрмида ўта синчковлик билан текширишганида эса, улар Саккорит синган тиканларининг асоси бўлиб чиққан.

Ҳаёт дарахти...

Ушбу қолдиқларни ўрганаётган олимлар ҳар бир жонзотни оила дарахтига ўхшаш ҳаёт дарахтига жойлаштириб чиқишмоқда.

Бу уларнинг қаердан келиб чиққанлиги ва қандай шаклланганлигини тасаввур қилишга имкон беради.

"Саккорит уммонларда - тиканлари уни бир жойда ушлаб турадиган чўкиндиларда яшаган бўлиши мумкин", - дейди Бристон университетидан тадқиқотчи Эмили Карлайл.

"Бизнингча, у ҳозир ҳам тирик бўлган айрим мавжудотларнинг баъзиларига ўхшаб кетувчи, лекин умуман бошқача қиёфадаги жуда кўп жонзотлар билан бирга ўша ерда бўларди".

Кембрий даври қолдиқларини ўз ичига олган ушбу жинслар ҳануз тадқиқ қилинаётир.

Олиманинг айтишича, улар мавжуд бўлган муҳит ҳақида ҳали кўп нарсани ўрганишлари лозим.

"Палеонтолигияни қанча кўп ўргансам, билимим шунчалик камлик қилаётганини сезаман. Бу жонзот ва у яшаган муҳит ҳақида ҳам худди шундай деган бўлардим. Биз ҳозирча фақат бунинг сиртида юрибмиз", - дея эътироф этган у.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: @bbcuzbek