Эрон: Эрларини ўлдирган аёллар қатл қилинди, жиноятнинг асл сабаби нима? Янгиликлар, дунё

Инсон ҳуқуқларини ҳимоя қилувчи ташкилотнинг айтишича, Эрон ҳукумати чоршанба куни эрларини ўлдиргани учун 3 аёлни қатл қилган. Уларнинг орасида 15 ёшида келин бўлган аёл ҳам бор.

Эрон Инсон ҳуқуқлари гуруҳига кўра, улар ўтган ҳафта қатл қилинган 32 кишининг ичида бўлган.

Уларнинг орасида 15 ёшида турмушга чиқиб, кейинчалик эрини ўлдирганликда айбланган келинчак ҳам бор.

Расмийлар қатллар сонини ўтган йилга нисбатан бу йил икки баробар кўпайтириб, фаол равишда ўлим жазоси қўллаётгани айтилади.

Ҳисоботда айтилишича, Эрон бошқа давлатлар билан солиштирилганда аёлларни кўпроқ қатл қилган. Уларнинг аксарияти эрини ўлдиришда айбдор деб топилган.

Эрон Инсон ҳуқуқларини ҳимоя қилиш гуруҳининг айтишича, 15 ёшида турмушга чиққан Соҳейла Ободи 10 йилдан сўнг эрини ўлдирганликда айбдор деб топилиб чоршанба куни қатл қилинган.

Маҳкама ҳукмида айтишича, қотилликка "оилавий келишмовчилик" сабаб бўлган.

Гуруҳнинг айтишича, чоршанба куни яна икки аёл ҳам эрини ўлдирганликда айбдор деб топилиб қатл қилинган.

Фаолларга кўра, кўплаб жиноят ишларига маиший зўравонлик сабаб бўлган, бироқ Эрон судлари кўпинча бу ҳолатларни инобатга олмайди.

Қатл қилинганларнинг аниқ рақами йўқ, чунки Эрон ҳукумати амалга оширилган ҳар бир ўлим жазоси ҳақида маълумот бермайди.

Апрел ойида икки гуруҳ томонидан ўтказилган тадқиқотга кўра, Эронда амалга оширилган қатлларнинг атига 16.5 % ҳақида маълумот берилган.

Хабарларга кўра, бу йил қатллар сони кўпайган.

Amnesty International инсон ҳуқуқлари ташкилоти Эронни сўнгги ойларда қатллар сонини кўпайтирганликда айблаган. Ташкилотга кўра, 2022 йилнинг ярмига келиб, ўтган йил билан солиштирилганда икки баробар кўп, яъни 250 киши қатл қилинган.

"Давлат машинаси мамлакат бўйлаб яшаш ҳуқуқиқа дахл қилиб катта сонда қатл амалиётларини олиб бормоқда", дейи ташкилотнинг минтақа бўйича масъули Даяна Элтаҳави

Ҳуқуқбонларга кўра, уларнинг айримлари бир тўп қилиб ўлдирилган. 15 июн куни бир қамоқхонада 10 дан ортиқ одам қатл қилинган, 6 июн куни яна шунча одамга нисбатан ўлим жазоси ижро этилган.

Статистикада этник озчиликлар ҳам кўрсатилган.

Эрон аҳолисининг 5% ни ташкил қилса-да, бу йил қатл қилинган ҳар тўрт одамнинг бирини Балучи миллати вакиллари ташкил қилган, дейилади Amnesty International ҳисоботида.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek