АҚШ разведкаси: Путиннинг хасталиги борасида маълумот йўқ - Украина,Россия, Уруш

АҚШ Марказий разведка бошқармаси раҳбари Путиннинг тетикмаслиги ёки соғлиғи ёмонлиги борасида ҳеч қандай маълумот йўқлигини айтди.

Алоқадор мавзулар:

Бу йил 70 ёшни қаршилайдиган Владимир Путиннинг касалликдан, катта эҳтимол билан саратондан азият чекаётгани ҳақида матбуотда миш-мишлар урчиганди.

Бироқ Марказий Разведка бошқармаси раҳбари Виллиам Бёрнснинг айтишича, буларни тасдиқлайдиган далил йўқ. У Путин жуда ҳам соғлом кўринади, деб ҳазиллашган.

Унинг гаплари АҚШ Украинага яна узоққа отувчи қуроллар беришини эълон қилган бир вақтда янгради.

Олдинроқ Россия Ташқи ишлар вазири Сергей Лавров Россиянинг Украинадаги эътибори энди фақат шарқ билан чекланиб қолмаслигини ва Москва мақсадларининг ўзгаришига Ғарб Украинага оғир қуроллар етказиб бериши таъсир қилганини айтганди.

Қаттиқ назоратга ишонувчи

"Президент Путиннинг соғлиғи борасида жуда ҳам кўп миш-мишлар юради ва биз унинг буткул соғлом эканлигини айтишимиз мумкин", деган Бёрнс журналистлар қаршисида.

Йиғилганларнинг кулгусига жавобан у бу расмий разведка ҳисоботи эмаслигини қўшимча қилган.

Москвада элчи бўлиб ишлаган Бёрнснинг айтишича, у Россия раҳбарини 20 йилдан ортиқ кузатган ва у билан юзма-юз келган.

Марказий разведка бошқармаси раҳбарига кўра, Путин назорат ўрнатиш, қўрқитиш билан мақсадга етишиш мумкинлигига ишонади. Сўнгги ўн йилда унинг маслаҳатчилари доираси қисқараркан, бу характери янада кескинлашган.

"У пешанасига Россия раҳбари сифатида Россиянинг буюклигини тиклаш қисмати ёзилганига ишонади. У бунга эришишнинг калити Россияга қўшни давлатларда таъсир доирасини кенгайтиришда, деб ўйлайди ва буни Украинада назорат ўрнатмасдан амалга оширолмайди".

Бёрнс АҚШ разведкаси Россиянинг бостириб кириш режалари ҳақида маълумот тўплаганидан сўнг ўтган йилнинг ноябр ойида уруш бошлангудай бўлса, унинг жиддий оқибатлари ҳақида огоҳлантириш учун Москвага борганди.

Бироқ разведка раҳбари қайтиб кетаётганида келганидан ҳам бадтар хавотирга тушганини айтади.

"Россия Президентининг режаси ўта хато тахминлар ва айниқса Украинага нисбатан ва қаршилик кўрсатиш иродаси борасида иллюзияларга асосланганди. Путин ўзи айтаётган гапларга ростдан ишонади. Мен унинг тор доираларда Украина ҳақиқий давлат эмас, деган гапларини йиллар давомида ўз қулоғим билан эшитганман. Нима деймиз, ҳақиқий давлатлар жавоб беради ва буни Украина амалда кўрсатяпти", дейди Бёрнс.

АҚШ Россиянинг Украинада шу вақтга қадар 15 минг аскари ўлдирилган ва 45 мингги яраланган, деб ҳисоблашини билдирди.

Унинг қўшимча қилишича, айни дамда Россия кучларининг Донбассда жамланиши аччиқ дарслардан чиқарилган хулосадир.

Россия шу йилнинг феврал ойида шарқдаги Донбасс минтақасида русий забон аҳоли геноцидга учраяпти ва уларни озод қилиш керак деган ёлғон даъволар билан Украинага бостириб кирди.

5 ойлик уруш давомида Россия мамлакат шарқи ва жанубидаги ҳудудларни босиб олди, бироқ асосий нишони бўлмиш Киевни ололмади. Шундан сўнг асосий мақсади Донбассни озод қилиш эканлигини айтди.

АҚШ Россияни Украина ерларини қўшиб олишни мақсад қилганликда айблайди.

Чоршанба куни Россия Ташқи ишлар вазири АҚШ узоқ масофага етиб борувчи қуролларни етказиб бериши Москванинг Украинадаги ҳарбий йўналишини ўзгартириши мумкинлигига шаъма қилди.

Лавровнинг очиқ огоҳлантиришига қарамасдан АҚШ чоршанба куни Украинага узоқ масофага етиб борувчи қурол-яроғ беришда давом этишини айтди.

АҚШ Мудофаа вазири Ллойд Аустин Украина яна 4 дона замонавий Himars ракета тизимини олишини ва уларнинг умумий сони 16 тага етишини маълум қилди.

Айни дамда Украинанинг биринчи хоними Олена Зеленская АҚШ Конгрессига мурожаат қилиб, яна кўпроқ ҳаво ҳужумидан мудофаа тизими беришни ва Украинада террорни тўхтатишда ёрдам беришни сўради.

Унинг таъкидлашича, ушбу қуроллар биргаликда эришилажак буюк ғалабани таъминлайди.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek