Украина: Ўлсак ўламиз, аммо ортга чекинолмаймиз - Видео Ukraina Rossiya

Украина жанубидаги Николаев шаҳри атрофи қаттиқ бомбардимонлар остида қолган.

Россия Украинага қарши урушини бошлаганида ҳам шимол, ҳам шарқ ва ҳам жанубдан ҳужум бошлаган, пойтахт Киевни "уч кунда қўлга киритиш" режаси чиппакка чиққанидан кейин мақсади "Донбассни озод этиш" эканини эълон қилди.

Украина уруши: Донбассдаги уруш жабҳасида

Апрель ойининг ўрталаридан бор қўшин ва кучларини жамлаган Россия Украинанинг Донецк ва Луганск вилоятлари, ўзларини мустақил Донецк Халқ республикаси ва Луганск Халқ республикаси деб эълон қилган вилоятларнинг маъмурий чегараларини ўз назоратига олиш мақсадидаги ҳужумларини бошлади.

Россия ҳарбий раҳбарларидан Украинанинг бутун Қора денгиз соҳилини қўлга олиб, Молдованинг Россия назоратида қолган Приднестровьеси билан қўшиб олиш ғояси ҳам эълон қилинди.

Шу сабаб ҳам Мариуполь қамали, уруш бошланганидан буён тўхтовсиз ҳужумларга тутилаётган Николаев шаҳри атрофидаги ҳарбий ҳаракатлар Россиянинг Украина жанубини эгаллаб олиш ҳаракатлари деб кўрилмоқда.

Россия Николаев шаҳрини Украина урушини бошлаганидан буён қўлга киритиш, сўнг Одесса шаҳри томон юришни мақсад қилган, бироқ Николаев атрофида қақшатқич қаршиликка дуч келган.

Николаев шаҳри атрофидаги қишлоқларда Украина ҳарбийлари окоплар қазиб мудофааларини мустаҳкамламоқдалар.

Оддий инсонлар эса ҳар куни бомбардимонлар остида ҳаёт кечираяптилар.

Би-би-си мухбири Абдужалил Абдурасулов Россия қўшинлари мавқесидан 4-5 километр узоқликдаги қишлоқлардан бирида бўлди.

Украин аскарлари сўнгги қонимиз қолгунча жанг қиламиз, чунки орқамизда чекинадиган жойнинг ўзи йўқ, дейишади.

"Бизнинг қаршимизда ягона танлов қолган холос - ўз еримизни озод қилиш. Ортга чекинолмаймиз - фақат олға кетишдан ўзга йўлимиз йўқ. Тиз чўкиб яшагандан тик туриб ўлган афзал", деди Украина аскари Олег.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek