Видео: Россия кучдан бошқасини тушунмайдими, нега айрим украиналиклар музокарага рози эмас?
Айрим жойларда вақтинчалик оташкесим эълон қилингач Украина шаҳарларида қолиб кетган тинч аҳоли хавфсиз жойларга чиқарилмоқда. Оддий украиналиклар Россия кучдан бошқа нарсани тушунмайди, демоқда.
Украина расмийлари Суми вилоятидан 5 минг кишини эвакуация қилганини айтмоқда. Бироқ Чернихив ва Мариуполда бу каби амалиётлар мувафаққиятли чиқмаган.
Украина томонининг айтишича, Россия чиқиш йўлларига бомба ёғдиришда давом этмоқда. Киевнинг шимоли ва шимолий ғарбида жанглар жавом этмоқда.
Тинч аҳолининг Киев яқинидаги жанглардан қочиш учун саноқли куни қолган бўлиши мумкин.
Ирпиндан пойтахтга қараб чиқаверишда ва уруш жабҳасининг бу томонида олдинда бўладиган катта тўқнашув аломатларини кўриш мумкин
Уруш бошлангандан бери улар ярадорларни Россия кучлари турган жойдан атига 3 чақирим узоқликдаги шифохонада даволашмоқда.
Бу одамлар русларнинг илк ҳужумини қайтарган.
Айни мақолада Google YouTube томонидан тақдим қилинган контент мавжуд. Биз бу контент юкланмасидан аввал сизнинг розилигингизни сўраймиз, чунки улар куки ва бошқа технологиялардан фойдаланган бўлиши мумкин. Сиз Google YouTube ҳаволасида кукиларга доир ва шахсий маълумотларга оид қоидалар ҳақида аввал ўқиб, кейин қабул қилишга рози бўлишингиз мумкин. Кўриш учун “қабул қилиш ва давом этиш”ни танланг.
Охири YouTube пост
"Икки оёқда тик тура оламан. Улар мени даволашди ва жангга тайёрман", - дейди украиналик бу одам.
Касалхона бош шифокори бу айни учинчи жаҳон уруши эканлигини айтади.
" Россияликлар кучдан бошқасини тушунмайди. Сени ўлдиришга келган одам билан музокара қилиб бўлмайди", дейди Бош шифокор Валерий Зукин.
Улар эрта тонгдан касалхонани тарк этишга тайёрланишмоқда. Бош шифокор кемам чўкяпти, мен уни энг охирида тарк этаман, дейди.
"Бу ерда сизни улар бундан ҳам бадтарига тайёргарлик кўряпти, деган ҳис қамраб олади. Улар тиббий асбоб-ускуналарни йиғиштиришмоқда, беморлар олиб чиқилмоқда ва унча узоқ бўлмаган жойда россияликлар турибди. Бу ерда ҳозирча тўхтаб турган Россия ҳужуми яна жонланиб, улар пойтахтга қараб юриши мумкин, деган қўрқув бор", дейди воқеа жойидан Би-би-си мухбири Эереми Бовен.
Бироқ бу ерларда украиналиклар ҳамон россияликларни тўхтатиб турибди.
Урушдан олдинги ҳаётни эслатувчи манзара. Бу ерда оила таом пиширган.
Қаровсиз ва бомба тушган уйларда дайдиб юрган итлар эса энди ҳеч қачон қайтмаслиги мумкин бўлган соҳибларини кутмоқда.
Ирпиндан Киевга қайтиш йўли бўш ва асабий эди. Украин аскарлари ўрмонга беркинган, кутишмоқда.
Пойтахтга қайтишда 13 кеча-кундуз бомбалар ёмғири остида қолган уруш чизиғидаги қишлоғини ташлаб келаётган эр-хотин Би-би-си машинасига чиқди.
"Жуда ҳам чиройли жойлар эди. Энди бўлса на уй, на кўча ва на қишлоқ қолди", дейди аёл.
Украин аскарлари муҳим чорраҳалардаги тўхташ постларини мустаҳкамлашмоқда.
Уларнинг қўмондони Драган кетма-кет буйруқ бериб, тезкорлиги билан ажралиб туради. Улар бирор фурсатни қўлдан бой беришмайди. Бу ерда босимни ҳис қилиш мумкин.
"Душман гуруҳларини йўқ қилиш учун турибмиз. Босқинчилар юртимизга кириб, биз томон ҳаракатланишмоқда", дейди у.
Киевда эса назорат-ўтиш нуқталари кўпроқ баррикадаларга ўхшайди
Улар ҳар бир кунни кейинги кунга тайёргарлик билан ўтказишмоқда.
Тинч аҳоли қурол ишлатишни ўрганмоқда. Машғулотлар тугаб, қуролларни топширишади. Ҳозирча улар уруш чизиғидаги аскарлар эмас.
"Ўтган вақт давомида фақат тайёр бўлишни ўргандик, деб ўйлайман. Буларнинг ҳаммаси тугаганидан сўнг қўрқишимиз мумкин. Аммо ҳозир биз шунчаки қўлимиздан келадиган ўз ишимизни қилишимиз керак", дейди Мария Петренко.
Мен бу ерда учратган ҳар бир киши қаршилик кўрсатишга тайёрлигини айтмоқда. Ҳозирча россияликлар секин ҳаракатланишмоқда. Пойтахтдаги нафасни ростлаш фурсати узоқ давом этмаслиги мумкин.
Telegram каналимиз: https://t.me/bbcuzbek
BBCUZBEK.COM билан Telegram орқали +44 7858860002 номери билан боғланинг.
