Британия Украинага қурол юборди, Европа уруш бўлишидан хавотирдами? - Россия

Россия қарийб 100 минг аскарини чегарага олиб келгач, Британия Украинага ўзини ҳимоя қилиш учун танкларга қарши қисқа масофага учувчи ракеталар етказиб беришни бошлади. Европадагилар урушдан хавотирланмоқда.

Британия Мудофаа вазири Украина аскарларини ҳарбий тайёргарликдан ўтказиш учун кичик гуруҳда ҳарбийлар ҳам юборилишини маълум қилган.

Айни дамда Европа иттифоқи масъуллари уруш хавфидан хавотирга тушаётганини яширмаяпти.

Би-би-сининг Европа бўйича муҳаррири Катя Адлер Россия Украина чегарасига йирик миқдорда ҳарбийларни олиб келганидан сўнг Европа Иттифоқи мулозимларининг кайфиятини билишга ҳаракат қилган.

Улардан бири "Европа собиқ Югославия парчаланиб кетгандан сўнг илк марта урушга ўта яқин турибди", деган:

Брюсселда кайфият беқарор. Европа сўнгги 10 йилликда хавфсизлик борасида энг оғир инқирозни бошидан кечириши мумкин деган қўрқув бор.

Аммо ушбу қўрқув Россия ва Украина ўртасида узоқ уруш эҳтимоли устига эътиборни жамламаган.

Бу ердаги жуда озчилик Москвада бунинг учун ҳарбий салоҳият, маблағ ва мамлакат ичида дастак борлигига ишонади.

Тўғри, Европа Иттифоқи Кремлни қўшни Украинада ҳарбий амалиётлар бошлаган тақдирда "жиддий оқибатлар"дан огоҳлантирмоқда.

Германиянинг янги Ташқи ишлар вазири Анналена Баербок душанба куни Киев ва Москвага бориб айнан шу ҳақда гапирди.

Ўтган дам олиш кунлари Швеция юзлаб аскарларини Болтиқ денгизида жойлашган, ўзининг стратегик аҳамиятга эга Готланд оролига ташлади. Ундан бир неча кун олдин Дания минтақада ўз позицияларини мустаҳкамлади.

Тарангликнинг ортиб бориши Финляндия ва Швецияда НАТОга қўшилиш керакми деган баҳсларни жонлантирди.

Ғарб - Вашингтон, НАТО, Британия ва Европа иттифоқини нафақат Украина туфайли ҳарбий ҳаракатлар безовта қилмоқда, балки улар Москва Европани бўлиб юбориши ва беқарорлаштиришга ҳаракат қилишидан ҳамда минтақадаги кучлар мувозанатини Россия фойдасига буриб юборишидан кўпроқ хавотирланмоқда.

Полша Бош вазири Матеуш Моравецкий ўтган йили менга Ғарб геосиёсий уйқудан уйғониши кераклигини айтганди.

Европа иттифоқининг бошқа давлатлари улар аллақачон тургани ва аччиқ қаҳва ҳидини сезаётганини айтишлари мумкин эди.

Бироқ ҳар доим бўлганидек, гап ташқи сиёсат борасида бўлса, Европа Иттифоқининг раҳбарлари қайси йўлдан кетиш борасида бир фикрга келолмайди.

Москва Украина чегарасига катта миқдорда аскарларини олиб келиб қўйган бўлса-да, ҳарбий жиҳатдан бостириб кириш режаси борлигини инкор қилмоқда.

Бироқ у НАТОга хавфсизлик борасида бир қатор талабларини юборди. Россия ҳарбий альянсни "минтақа хавфсизлигига путур етказаётганликда" айблаган.

Владимир Путин бошқа талаблар билан бирга НАТО Украина ва қолган собиқ совет ўлкаларининг ташкилотга аъзо бўлиб киришини тақиқлаши кераклигини таъкидламоқда.

НАТО буни қатъиян рад қилди. Ўтган ҳафта Россия ва Ғарб альянси ўртасида бўлиб ўтган 3 саммитда ўзаро тил топишнинг имкони бўлмади.

Владимир Путин нимани режалагани номаълум. Аммо Ғарб Кремл Украина чегарасидаги ўта очиқ ҳаракатларига катта маблағ сарфлагани ва у ердан ҳеч нарса қилмасдан қайтишига ишонмайди.

Байден маъмурияти Москванинг кейинги ҳаракатларидан келиб чиқиб Европа Иттифоқи санкциялар жорий қилишини сабрсизлик билан кутяпти.

Бу Украинага бостириб кириш, кибер ҳужумлар, дезинформация кампанияси ёки гибрид ҳужумлар бўлиши мумкин.

Европа Иттифоқидаги некбинлар иттифоқ эҳтимолий санкцияларни 24 январ, ташқи ишлар вазирларининг навбатдаги учрашувигача келишиб олишига умид қилмоқда. Аммо бунга кафолат йўқ.

Бир қатор ЕИ давлатлари эҳтимолий санкцияларнинг ўз иқтисодларига салбий таъсири борасида бош қотиришмоқда.

Брюссел одатда юкни тақсимлашни муҳокама қилади, аммо келишув натижалари ҳаммага ҳам ёқмаслиги мумкин.

ЕИ давлатларида Россиядан газ етказиб бериш борасида ҳам хавотирлар бор.

Айниқса, бу қишда европаликлар учун газнинг нархи анча баланд бўлди. Вашингтон энергия таъминоти борасидаги муаммоларни юмшатиш учун бир неча йўлларни кўриб чиқаётганини айтмоқда.

Америка ЕИ аъзо давлатлар ташқи сиёсатдаги қарорни яширин ва бир овоздан маъқуллаши кераклигини билган ҳолда уни тезроқ санкциялар қабул қилишга ундамоқда.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek