Коронавирус, “Pfizer” раҳбари: Одамлар Ковидга қарши ҳар йили эмланиши керак Koronavirus

"Pfizer" раҳбари Доктор Алберт Бурланинг Би-би-сига айтишича, одамлар кўп йиллар давомида Ковидга қарши ҳар йили вакцина олишлари керак бўлади.

Ҳозир Буюк Британия "Pfizer" ва "Moderna" вакциналарининг қўшимча 114 миллион дозасини сотиб олди, улар кейинги икки йил ичида етказилади.

Бир йил олдин Буюк Британия "Pfizer-BioNTech" вакцинасини маъқуллаган биринчи давлат бўлган эди.

Коронавирус: Омикрон нима? Мамлакатлар чегараларини ёпаяпти

"Pfizer" бош директори Би-би-си билан биринчи марта Жанубий Африкада топилган Омикрон вариантидан олдин ва Буюк Британия ҳукумати 2022 ва 2023 йиллар учун 54 миллион қўшимча "Pfizer-BioNTech" ва 60 миллион доза "Moderna" сотиб олиш бўйича шартнома имзолагани эълон қилинишидан олдин суҳбатлашган эди.

Соғлиқни сақлаш вазирлигининг таъкидлашича, келишувлар Омикрон билан курашиш учун ўзгартирилган вакциналарни ҳам ўз ичига олади.

Доктор Бурланинг сўзларига кўра, "Pfizer" аллақачон Жанубий Африкада аниқланган Бета ва Ҳиндистонда биринчи марта аниқланган Дельтага жавобан янгиланган вакциналар ишлаб чиқарган.

Энди компания Омикрон вариантига жавобан янгиланган вакцина устида ишламоқда, у 100 кун ичида тайёр бўлиши мумкин.

Унинг сўзларига кўра, вакциналар пандемия даврида миллионлаб одамларнинг ҳаётини сақлаб қолишга ёрдам берди ва уларсиз "жамиятимиз хавф остида қолади".

Йил охиригача "Pfizer" ўзининг рибонуклеин кислота (мРНК) вакцинасининг уч миллиард дозасини етказиб беришни режалаштирмоқда, улардан тўрт миллиарди кейинги йилга мўлжалланган.

Доктор Бурланинг сўзларига кўра, одамларни ҳимоя қилиш учун глобал пойга бўлди, аммо 2022 йилда мамлакатларда "қанча керак бўлса, шунча доза" бўлади.

Вакцина нархлари

Бир қатор глобал соғлиқни сақлаш хайрия ташкилотлари "Pfizer", "BioNTech" ва "Moderna" пандемиядан топаётган пулларни ноҳалол деб ҳисоблайди.

"Pfizer" бу йил Ковид вакцинасини сотишдан камида 35 миллиард доллар олади ва унинг акциялари нархи кескин ошди.

Аммо дунёдаги кўпчилик одамлар камида битта Ковид вакцинаси олган бўлса-да, Африканинг баъзи қисмларида бу 20 та одамдан биттадан ҳам кам.

Доктор Бурла "миллионлаб одамларнинг ҳаёти охир-оқибат сақлаб қолинганини" айтиб, фойда олишни узрли ҳисобланишини билдирди.

У давом этди: "Биз жаҳон иқтисодиёти учун триллионлаб доллар тежадик.

Бу кейинги пандемия олдидан инновациялар учун кучли рағбатдир.

Аммо одамлар ҳаётни сақлайдиган ва пулни тежайдиган воситаларни яратиш учун ўйинга киришса, молиявий мукофотлар ҳам бўлишини кўрмоқда."

У миш-мишларни инкор этиб, бу бой мамлакатларнинг харажати эканлигини, аммо даромади паст бўлган мамлакатларга вакцина фойда олмай сотилганини айтди. Аммо Буюк Британия каби бой давлатлар аввалроқ буюртма берган ва вакциналар етарли бўлмаган эди.

-70 С да сақланиши керак бўлган "Pfizer" вакцинасини соғлиқни сақлаш хизматлари чекланган мамлакатларда ишлатиш қийин бўлган.

Аммо бир ой ёки ундан кўпроқ вақт ичида "Pfizer" уч ойгача музлатгичда сақланиши мумкин бўлган вакцинанинг янги формуласини чиқаришини айтди.

Доктор Бурланинг айтишича, бу Африка мамлакатлари учун катта ўзгаришдир.

"Pfizer", шунингдек, вирусга қарши "Paxlovid" таблеткасини ишлаб чиқди. У синовларда касалхонага тушиш ва ўлимни деярли 90 фоизга камайтирди.

Тез орада у АҚШда маъқулланади ва Буюк Британия ҳукумати 250 000 бемор учун етарли миқдорда сотиб олишга рози бўлди.

"Оғир симптомлар"

"Pfizer", шунингдек, беш ёшгача бўлган болаларда Ковид вакцинасини синовдан ўтказмоқда.

Октябрь ойида эса АҚШнинг Озиқ-овқат ва дори-дармон маъмурияти (FDA) 5-11 ёшдаги болалар учун "Pfizer" вакцинасини тасдиқлади.

Бу ёш гуруҳини Буюк Британия ва Европада иммунизация қилиш жуда яхши иш бўларди, дейди доктор Бурла.

"Ковид мактабларда гуллаб-яшнамоқда", дейди у.

"Бу таълим тизими учун жуда ташвишли ва оғир аломатларга эга бўлган болалар бор.

Шундай экан, уларни эмлаш шубҳасиз фойдалидир."

"Pfizer" ва "Moderna" мРНК вакциналари ҳозир Буюк Британияда ишлаб чиқилган "Oxford-AstraZeneca" вакцинасидан ўзиб кетди".

"Тўғри йўл"

Доктор Бурла эса эмлашни истамаганларга қатъий маслаҳат берди.

"Шунчаки қўрққанлар учун қўрқувдан кучлироқ бўлган ягона туйғу севгидир, - деди у. -Шунинг учун мен ҳар доим бошқа вакцина олиш қарори нафақат сизнинг соғлиғингизга таъсир қилади, балки бошқа одамларнинг соғлиғига ва айниқса сиз энг яхши кўрган одамларнинг соғлиғига таъсир қилади. Мен доим шу аргументни келтираман.

Шундай экан, қўрқувни енгиш учун жасорат топинг ва тўғри йўл тутинг."

Яқинда у АҚШ ФҚБ томонидан фирибгарликда айбланиб ҳибсга олингани ва унинг рафиқаси "Pfizer" вакцинасининг ножўя таъсири натижасида вафот этгани ҳақидаги ғалати ёлғон хабарлар нишонига айланди - ҳар иккаласи ҳам ҳақиқатга тўғри келмайди.

"ФҚБ мени ҳибсга олгани ҳақидаги биринчи хабардан кулгим қистади", деди у.

"Хотинимнинг вафот этгани ҳақидаги иккинчи хабарни, унинг сурати билан эшитганимда, ростдан ҳам [жаҳлим чиқди].

Фарзандларим ҳақида қайғуриб, уларга қўнғироқ қилмоқчи бўлдим, лекин ўғлим билан боғлана олмадим.

Биз бошдан кечиришимиз керак бўлган нарса одамлар эълон қилган бемаъни гаплар туфайли йўқотиладиган ҳаётлар билан солиштирганда ҳеч нарса эмас. Одамлар ҳақиқатан ҳам менинг хотиним эмлаш туфайли вафот этган деб ўйлашди... унинг аҳволи эса жуда яхши, ажойиб."

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek