Африка жанубида Ковид-19нинг янги тури аниқлангани хавотирлар уйғотмоқда
Сурат манбаси, Getty Images
Африканинг жанубида аниқланган янги Ковид-19 штамми "жиддий хавотир"га сабаб бўлаётгани ортидан, бир қатор Африка давлатлари Британияда қизил рўйхатга киритилди. Қизил рўйхат Британия ва ушбу давлатлар орасида сафарни кескин чеклайди.
Хавотирларга кўра, вируснинг бу тури аввалгиларидан ҳам юқумлироқ, вакциналар эса унга нисбатан самарасизроқ бўлиши мумкин.
Аммо, олимларга кўра, бунга тўлиқ ишонч ҳосил қилиш учун бир неча ҳафта керак.
Ҳозирча Африкада бу штамм кичик бир гуруҳ одамларда аниқланган, холос.
Жаҳон соғлиқни сақлаш ташкилоти жума куни бу борада фавқулодда мажлис ўтказиши кутилмоқда.
Сурат манбаси, Getty Images
Сафар қилишга бу қадар тезликда янги ва қатъий чекловлар жорий этилгани вируснинг янги тури қанчалик жиддий қабул қилинаётганини кўрсатди. Буюк Британияга Жанубий Африкадан кунига беш юздан етти юзгача саёҳатчи келади.
Аксар ҳолатлар айнан Африкада аниқланган ва бу вариант инфекциянинг янги тўлқинини келтириб чиқариши мумкин.
"Бу Делта вариантидан кўра юқимлироқ бўлиши ва ҳозир бизда мавжуд вакциналар унга қарши камроқ самара бериши мумкин. Шуни аниқ айтишимиз керакки, Буюк Британияда ҳозирча ушбу янги вариантни аниқлаганимиз йўқ. Лекин ҳозиргача эришган ютуқларимизни муҳофаза қилиш учун чоралар кўришимиз кераклигини ҳар доим аниқ равшан айтиб келганмиз", - деди Британия Соғлиқни сақлаш вазири Сажид Жавид.
Янги штамм расман уч кун олдин аниқланган. Таҳлиллар бунинг Делтадан икки марта кўп мутация бўлганини кўрсатган.
Унинг инсон ҳужайрасига кирувчи оқсили тожида 30та ўзгариш бор.
"Биз бу вариант ҳақида билганимизга бор йўғи бир неча кун бўлди. Ҳозирча мутация анчайин тез бўлаётганга ўхшайди. Дастлабки далиллар вакциналар самарасиз бўлиши мумкинлигини кўрсатади. Бу вируснинг мутацияларга юз тутаётгани боис бўлиши мумкин. Аммо, ҳозир унинг қанчалар оғир бўлиши борасида далиллар йўқ. Биз жуда кўп нарса ноаниқ бўлган бир вазиятда ишлаяпмиз", - дейди эпидемиолог Майк Тилдесли.
Айни сифатлар вируснинг асл Ухан туридан кескин фарқ қилишини кўрсатади. Вакциналар барчаси ана шу асл тур асосида ишлаб чиқарилди. Аммо, энг муҳими, янги турлар янада оғирроқ касалликка олиб келиши ёки вакциналар иш бермаслигига оид ҳали ҳеч қандай далил йўқ.
Бу пандемиянинг яна бир ҳал қилувчи нуқтаси бўладими ёки ёлғон эрта ишорами эканини гапиришга ҳали эрта. Лаборатория таҳллилари учун яна икки-уч ҳафта керак бўлади.
BBCUZBEK.COM билан Telegram орқали +44 7858860002 номери билан боғланинг.
Telegram каналимиз: https://t.me/bbcuzbek
