Яхши хабар: Асалари заҳри бир соатда саратон тўқимасини йўқ қилди
Сурат манбаси, Getty Images
Австралиялик олимларининг айтишича, асаларидан олинган заҳар лаборатория шароитида кўкрак саратони ҳужайраларини йўқ қилган.
Заҳар ва унинг таркибидаги мелиттин моддаси даволаш ўта қийин бўлган икки хил саратон - учлик манфий ва HER2 оқсили бўлган саратон ҳужайраларига қарши қўллаб кўрилган.
Айни тажриба келажакда кўкрак саратонига қарши асалари заҳрини даво сифатида қўллаш эҳтимолини ўртага чиқаради.
Асалари заҳри саратон тўқимасини қандай йўқ қилган? Видео:
Айни мақолада Google YouTube томонидан тақдим қилинган контент мавжуд. Биз бу контент юкланмасидан аввал сизнинг розилигингизни сўраймиз, чунки улар куки ва бошқа технологиялардан фойдаланган бўлиши мумкин. Сиз Google YouTube ҳаволасида кукиларга доир ва шахсий маълумотларга оид қоидалар ҳақида аввал ўқиб, кейин қабул қилишга рози бўлишингиз мумкин. Кўриш учун “қабул қилиш ва давом этиш”ни танланг.
Охири YouTube пост
Кашфиёт "ҳаяжонли" дея таърифланган, аммо олимлар ҳали яна синовлар ўтказилиши кераклигини айтишмоқда.
Кўкрак саратони дунё бўйлаб аёллар чалинадиган энг кенг тарқалган саратон тури ҳисобланади.
Кўкрак саратони 12 аломати бор. Сиз уларни биласизми?
Лаборатория шароитида саратон ҳужайраларига қарши курашадиган минглаб кимёвий бирикмалар бўлса ҳам, олимлар инсонни даволашда уларнинг жуда оз қисми қўллаб кўрилиши мумкинлигини таъкидлашади.
Асалари заҳари меланома каби бошқа тур саратонларга қарши яхши ишлаши аввал тасдиқланган.
Ғарбий Австралиядаги Тиббий тадқиқотлар Ҳарри Перкинс институти ўтказган тадқиқот Nature Precision Oncology журналида нашр қилинди.
Тадқиқотчилар нимани топди?
Сурат манбаси, HARRY PERKINS INSTITUTE
Тадқиқотда 300 асалари ва тоғ тукли арисидан олинган заҳар синаб кўрилган.
Асаларидан олинган экстракт "жуда кучли" бўлиб чиқди, дейди тадқиқот етакчиси 25 ёшли олима Киара Даффи.
Заҳарнинг бир концентрацияси бир соатда бошқа ҳужайраларга зарар бермаган ҳолда саратон ҳужайраларини ўлдириши аниқланди. Аммо дозанинг оширилишига мос тарзда заҳарлилик даражаси ҳам ошиб борган.
Тадқиқотчилар мелиттин бирикмасининг ўзи саратон ҳужайраларининг кўпайиши олдини олишга самарали таъсир қилишини аниқлаган.
Мелиттин асалари заҳарида табиий мавжуд бўлади. Аммо уни сунъий йўл билан ҳам олиш мумкин.
Учлик манфий кўкрак саратони ўта агрессив саратон турларидан бири бўлиб, жарроҳлик, радиотерапия ва кимётерапия билан даволаб келинади. Кўкрак саратонларининг 10 15 фоизи айни шу тур саратон ҳиссасига тўғри келади.
Сўнгги тажриба ортидан бир савол ўртага чиқмоқда:
Заҳар келажакда кўкрак саратонини даволаш учун ишлатиладими?
Чоршанба куни Ғарбий Австралиянинг бош олими бу тадқиқотни "ўта ҳаяжонли" дея таърифлади.
"Муҳими, бу тадқиқот мелиттин қандай қилиб кўкрак саратони ҳужайраларининг кўпайишини тўхтатиш учун уларнинг сигнал йўлларини блоклашини тасдиқлади" - дейди проф. Питер Клинкен.
"Шунингдек, бу тадқиқот табиий бирикмалар инсондаги касалликларни даволашини кўрсатувчи яна бир ажойиб мисол бўлди".
Аммо тадқиқотчилар заҳар саратонга қарши дори сифатида амалда ишлашини кўриш учун яна кўп иш қилиниши кераклигини айтмоқда.
Бунга бошқа саратон тадқиқотчилари ҳам қўшилади.
"Ҳали эрта" - дейди Сиднейдаги Тиббий тадқиқотлар Гарван институтидан профессор Алекс Суэрбрик.
"Аксар бирикмалар кўкрак саратони ҳужайраларини лабораторияда ёки сичқонларда ўлдираверади. Бироқ бу кашфиётлардан клиник амалиётларда ниманидир ўзгартиришга етиб боргунча анча йўл босиш керак".
BBCUZBEK.COM билан Telegram орқали +44 7858860002 номери билан боғланинг.
Telegram каналимиз: https://t.me/bbcuzbek
