Коронавирус: Россия октябрда оммавий эмлашни бошламоқчи Koronavirus

A scientist prepares samples during development of a vaccine against the coronavirus at a laboratory of Biocad in Saint Petersburg, Russia June 11, 2020 — Сурат тагсўзи, Жаҳонда 100 дан ортиқ коронавирус вакцинаси устида изланишлар олиб борилаяпти

2 август 2020

Россия расмийларига кўра, коронавирус вакцинасининг клиник синови ниҳоясига етган ва мамлакатда октябр ойидан оммавий эмлаш бошланади.

Россия Соғлиқни сақлаш вазири Михаил Мурашко сўзларига кўра, биринчи бўлиб шифокорлар ва ўқитувчилар оммавий эмланади.

Reuters ахборот агентлигига ўз номи ошкор этилишини истамаган Россия мулозими айтишича, вакцина шу ой тегишли орган томонидан маъқулланади.

Аммо дунёдаги айрим экспертлар Россия вакцинани жорий этишда шошма-шошарликка йўл қўяётгани эҳтимолидан хавотир билдирмоқдалар.

АҚШдаги инфекцион хасталиклар бўйича кўзга кўринган эксперт доктор Антони Фаучи, Россия билан Хитой кўпчиликка қўллашдан олдин вакцинани "чиндан ҳам синовдан ўтказганлар" деб умид қиламиз, деб айтган.

Доктор Фаучи сўзларига кўра, АҚШ шу йил охирига бориб "хавфсиз ва самарали" вакцинага эга бўлади.

"Мен вакцина ишлаб чиқишда биздан олдинда бораётганлар борлигига ва вакцинага эга бўлишда биз бошқа бир мамлакатга муҳтож бўлишимизга ишонмайман", деб айтган доктор Антони Фаучи АҚШ парламенти аъзолари билан мулоқотда.

Дунё бўйлаб кўп сондаги эҳтимолий коронавирус вакцинаси устида изланишлар олиб борилмоқда ва айни пайтда шулар орасидан 20 таси клиник синовдан ўтказилмоқда.

Skip Энг кўп ўқилган and continue reading

Энг кўп ўқилган

End of Энг кўп ўқилган

Россиянинг Интерфакс ахборот агентлигининг Соғлиқни сақлаш вазири Михаил Мурашкодан иқтибос келтиришича, Москвадаги Н.Ф. Гамалея номидаги Эпидемиология ва микробиология миллий тадқиқот марказида вакцина клиник тестдан ўтган ва вакцинани рўйхатдан ўтказиш билан боғлиқ ҳужжат ишлари олиб борилмоқда.

"Биз оммавий эмлашни октябрга режалаяпмиз. Илк вакцина оладиганлар ўқитучилар ва шифокорлар бўлади", деб айтган Россия тиббиёт вазири.

Бундан олдинроқ россиялик олимлар Гамалея марказида аденовирусга асосланган вакцинани яратиш ишлари якунига етгани ва натижалар муваффақиятли чиққани ҳақида эълон қилган эдилар.

A news conference at the Science and Practice Center for Interventional Cardioangiology in Moscow, Russia, 15 July 2020 — Сурат тагсўзи, 15 июл куни Россия олимлари Гамалея тадқиқот марказидаги вакцина устидаги изланишлар ниҳяосига етгани ҳақида маълум қилдилар

Ўтган ой Буюк Британия, АҚШ ва Канада хавфсизлик хизматлари россиялик хакерлар гуруҳи Covid-19 вакцинаси устида изланиш олиб бораётган бир неча ташкилотларга ҳужум уюштиргани ва уларнинг мақсади маълумот ўғирлаш бўлганини аниқлаганлари ҳақида хабар тарқатди.

Британиядаги National Cyber Security Centre (NCSC) Миллий Кибер хавфсизлик маркази айтишича, APT29, Dukes ёки Cozy Bear деб номланган хакерлар гуруҳи ортида Россия жосуслик хизматлари турганига 95 фоиз ишончи комил.

Россиянинг Британиядаги элчиси Андрей Келин Би-би-си билан суҳбатда бу айбловни рад этган, "бундан маъни йўқ", деб айтган.

Британининг Оксфорд Университети ихтиро қилган вакцина инсон иммунитет тизимини хасталикка қарши қўзғатишга қодир эканлигиги исботланди ва бу вакцинани AstraZeneca ширкати ишлаб чиқарадиган бўлди.

Британия бу вакцинанинг 100 миллион дозасини сотиб олиш бўйича шартнома имзолади.