You’re viewing a text-only version of this website that uses less data. View the main version of the website including all images and videos.
Коронавирус - Сигир сийдиги ичиш ё таппига ювиниш давоми?
Ҳиндистонда бир миллиард 300 миллиондан ортиқ уйда ўтириш буйруғини олишган. Ҳиндистоннинг айрим ҳиндулари сигир сийдиги ва тапписи коронавирусга қарши даво бўлишини айтмоқдалар. Мамлакат бўйлаб сигир пешобини ичиш маросимлари ўтказилмоқда. Сигир сийдиги ва тезаги ростдан ҳам коронавирусдан ҳимоя қиладими?
Ҳар бир мамлакатда одамлар коронавирусдан ҳимояланиш учун турли анъанавий даволарга ўзларини уришмоқда.
Ўзбеклар исириқ тутатса, италянлар хом саримсоқ емоқда.
Аммо ҳеч ким Ҳиндистондаги ақидапараст ҳиндулар олдига тушолмади.
Мол пешоби ва тезаги
Ҳиндистонда асрлар оша сигирни муқаддас санаб, жониворнинг пешобини минг бир дардга даво деб билишади.
Иқтидордаги миллатчи ҳиндулар партияси ёки БЖП сиёсатчиси Суман Ҳариприя эса сигирнинг пешоби ва тапписи коронавирусни даволайди, деб чиқди.
"Сигир тезагининг фойдали жиҳатлари кўп. Менимча,таппи коронавирусни ҳам ўлдиради. Сигир пешоби ҳам фойдали бўлиши мумкин"" - деди БЖП вакили Суман Ҳариприя.
Ҳинду миллатчи гуруҳлари эса коронавирусга кураш доирасида пойтахт Деҳли бўйлаб сигир пешобини ичиш маросимларини ўтказа бошлашди.
Сигир пешоби бактерияларни ўлдирувчи ёки вирусларга қарши иш берувчи хусусиятга эгами, деган масалада илгари ҳам илмий тадқиқотлар ўтказилган.
"Сигир сийдиги вирусни ўлдириш хусусиятига эга эмас, тиббий жиҳатдан бу иддао асоссиз" - деб айтди Ҳиндистон Вирусология Жамиятидан Шайлендра Саксена.
"Таппига келсак, у ҳатто хавфли ҳам. Тезак таркибида коронавирус бўлиши ва унинг нусхаси одамларга ҳам ўтиши мумкин".
Ҳиндистонда радикал ҳиндулар сигир тезаги ва пешобининг фойдасига қаттиқ ишонадилар.
Cowpathy номи остида 2018 йилдан бери таппидан тайёрланган совун ва дистиллаган сигир пешобидан қилинган қўл тозаловчи воситалар ҳам ишлаб чиқилади.
Маҳсулотлар онлайн усулида сотилади.
Аммо коронавирус пандемияси бошланганидан бери уларга талаб ошиб кетган.
Шу боис ҳозир таппидан қилинган совун ва пешобдан тайёрланган алкоголсиз тозаловчи восита ҳар бир харидорга ўлчаб, чекланган миқдорда сотилмоқда.
ЖССТ (Жаҳон Соғлиқни сақлаш ташкилоти) эса қўлларни тозалаш учун алкоголли тозалаш воситаларини ишлатиш муҳимлигини таъкидлайди.
Ҳатто уй шароитида ароқдан қилинган воситалар ҳам иш бермайди. Чунки ундаги алкоголь миқдори 40%, холос. Қўл тозаловчи воситалардаги алкоголь миқдори ўртача 60-70% бўлади.
