Дунё, янгиликлар: Эрдўғон Истанбулда қайта сайловни ҳимоя қилди - мухолифат ғазабда

Истанбулда ўтказилган маҳаллий сайлов натижалари бекор қилинди

Туркия Марказий Сайлов Комиссияси март ойида Истанбул ҳокимлиги учун ўтказилган сайлов натижаларини бекор қилди. Сайловда мухолифатдаги Жумҳурият Халқ Партияси (CHP) вакили Акрам Имомўғли кичик фарқ билан ғалаба қозонганди.

Навбатдаги сайлов 23 июнга белгиланган. МСКнинг мазкур қарори ортидан юзлаб истанбулликлар норозилик намойиши бошлаб юборган.

Апрель ойида жаноб Имомўғлининг Истанбул мерига айлангани расман тан олинган эди.

Дунё ва мусулмонлар: Рамазон шукуҳи суратларда

Шереметьево авиаҳалокати ҳақида нималар маълум?

Сурия судлари филм ёрдамида дамашқликларни ажрашишдан сақлаб қолмоқчи

Қудратдаги Адолат ва Тараққиёт партиясининг иддао қилишича, март ойида ўтган сайловда коррупция ва қонун бузилиш ҳолатлари қайд этилган.

Ўзининг баёнотида жаноб Имомўғли МСКни президент Эрдўғон партиясига ён босишда айблаган ва ўз тарафдорларини ғалабани қайта қўлга киритмагунга қадар бўш келмасликка чақирган.

Шунингдек, Европа Парламенти сайловни қайта ўтказиш Туркиядаги демократияга бўлган ишончга нуқта қўйишини таъкидлаган.

31 март куни ўтказилган маҳаллий сайловнинг умумий натижаларига кўра, Ражаб Тоййиб Эрдўғоннинг Адолат ва Тараққиёт партияси ғалаба қозонган бўлса-да, Анқара, Измир ва Истанбул каби йирик ҳамда муҳим шаҳарларни қўлдан бой берган эди.

Би-би-сининг Туркиядаги мухбири Марк Лоуэн «Истанбулда ким ғолиб чиқса, ўша Туркияда ғолиб чиққан бўлади,» дея қайта-қайта такрорлаб келган президент Эрдўғон мамлакатнинг ушбу иқтисодий марказини қайта қўлга киритишга жиддий бел боғлаганини айтади.

Бундан ташқари, жаноб Лоуэннинг фикрича, Акрам Имомўғли аллақачон одамлар назарига тушиб улгурган ва июнга белгиланган сайловда унинг қайта ғалаба қозониш эҳтимоли юқоридир.

Мянмарда ҳибс этилган Reuters журналистлари озодликка чиқди

Роҳинга халқига қарши уюштирилган қирғинни ёритгани учун Мянма р(собиқ Бирма)да қамоққа ташланган Reuters агентлигининг икки журналисти озод этилди.

33 яшар Ва Лон ва 29 ёшли Кяв Со Оо Мянма қамоқхонасида 500 кундан зиёдроқ ўтиришга мажбур бўлган. Ўтган йилнинг сентябрь ойида улар етти йилга озодликдан маҳрум этилган эди.

Мянма фуқароси бўлган икки журналист 2017 йил сентябрь ойида Рахине шимолида мамлакат қуролли кучлари томонидан 10 нафар Роҳинга элатига мансуб эркакнинг ўлдирилиши тўғрисида маълумот йиғиши ортидан ҳибсга олинган.

Аввалига Роҳинга эркакларининг ўлдирилганини рад этган Мянма ҳукумати, кейинроқ, буни тан олган ва айбдор ҳарбийлар сўзсиз жазога тортилишини билдирган.

Reuters бош муҳаррири Стивен Адлер ўз мухбирларининг эркин матбуот тимсолига айланганини таъкидлаб, уларнинг озод этилишини олқишлаган.

Германияда мажбурий ҳарбий хизматни қайтаришмоқчи

Германиядаги Христиан Социал Иттифоқи (ХСИ) партияси мамлакатда мажбурий муддатли ҳарбий хизматни қайта жорий этишни таклиф қилмоқда.

Бироқ таклиф қилинган янги турдаги чақириқ бошқача ном билан аталган: давлат стажировкаси. Бундай чақириқ давомида ёшлар ҳарбий ёки фуқаролик хизматидан бирини ўташи мумкин.

Германияда мажбурий ҳарбий чақириқ 2011 йилда ўша пайтдаги мудофаа вазири Карл-Теодор су Гуттенберг ташаббуси билан бекор қилинган эди.

Эндиликда, ХСИнинг таъкидлашича, мажбурий ҳарбий ёки фуқаролик хизматини ўташ ёшларнинг ватан олдидаги бурчини тўлиқроқ англашга ёрдам беради. Бироқ партия илгари сурган ушбу режада мажбурий хизматнинг қачондан жорий этилиши ёки унинг қанча муддат давом этиши тилга олинмаган.

Кузатувларга кўра, охирги йилларда Европа мамлакатларида мажбурий ҳарбий хизматни қайтадан жорий этиш ғояси урфга кирмоқда.

Масалан, 2018 йилдан бошлаб Швецияда 18 ёшга тўлган йигит ва қизлар бир йилга армияга жўнатила бошланган. Бу мамлакатда ҳарбий чақириқ 2010 йилда бекор қилинган эди.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek