Латвиядаги ноқонуний пул ўтказмаларига Ўзбекистон ҳам алоқадорми?

Латвия молиявий идоралари "Телиасонера" мобил алоқа ширкатининг Ўзбекистондаги лицензия учун Латвия банки орқали ўтказган пуллари юзасидан текширув бошлаган.

Швед телеком ширкати 2007 йилда амалга оширган транcакция Швециянинг ўзида жиноий текширув ва ширкат раҳбарининг истеъфосига сабаб бўлган.

Швециялик прокурорлар - "Телиасонера" "Такилант" ширкатидан сотиб олган лицензия учун тўланган юз миллионлаб доллар маблағлар Президент Каримов оиласи чўнтагига кетган бўлиши мумкин, деган фаразларни текширишмоқда.

Латвия ўзининг собиқ совет давлатлари учун молиявий оффшор ҳудудга айлангани ҳақидаги даъволарни рад этади.

Мавзуни ўрганаётган журналист Шоҳида Ёқубнинг айтишича, ҳозирда бошланган текширувлар Латвиядаги ўзбек пулларининг миқдорига аниқлик киритиши мумкин.