Ўзбекистон: Болаларни порахўрлик ўлдирдими? Янгиликлар O'zbekiston Dunyo Yangiliklar

Таркиби заҳарланган болалар дорисини тарқатган инсонлар Ўзбекистон маҳаллий расмийларига 33 минг доллар пора берган, дея даъво қилди Ўзбекистон давлат прокурорлари, деб хабар тарқатди Reuters ахборот агентлиги.

Ушбу айблов 16 август куни Жиноят ишлари бўйича Тошкент шаҳар судида кечаётган 65 боланинг ўлими билан боғлиқ маҳкамада қоралов томонидан янгради.

Алоқадор мавзулар:

11 августда бошланган судда Ҳиндистоннинг Marion Biotech хусусий фармацевтика компаниясининг "Док-1 Макс" йўтал сиропи ичирилган болалар ўлимлари иши кўриб чиқилмоқда, маҳкамага 21 инсон тортилган.

Айбланаётганларнинг 20 нафари Ўзбекистон, бир нафари Ҳиндистон фуқароси.

Маҳкама жараёнини кузатаётган мухбирларнинг хабар қилишларича, давлат қораловчиси илгари сурган айбловга кўра, "Quramax Medical" МЧЖ директори Р.С.П Ўзбекистон Фармацевтика агентлигининг Дори воситалари тиббий буюмлар ва тиббий техника экспертизаси ва стандартлаштириш давлат маркази ходимларига 33000 доллар пора берган, мақсад Ҳиндистондаги "Marion Biotech" PVТ. Ltd корхонасида инспекцион текширув ўтказилишини тўхтатиш бўлган.

Айбловга кўра, "Quramax Medical" "Marion"нинг "Кураракс 200", "Кураракс 400" дори воситасини ҳам Ўзбекистонда сотишни режалаштирган, бу дори воситаларини Ўзбекистон давлат марказидан рўйхатдан ўтказиш учун ариза берган.

Лекин, айблов томонига, "Кураракс 200", "Кураракс 400"ни рўйхатдан ўтказиш учун зарур бўлган ҳужжатлар худди "Док-1 Макс" сиропи ҳужжатлари сингари ишончсиз, нотўлиқ ва нотариал тасдиқланмаган бўлган.

Ўзбекистон расмийлари "Кураракс 200", "Кураракс 400" аризасини рад этганлари ва Ҳиндистондаги фармацевтика ширкатида текширув ўтказиш лозим деган қарор чиқарганлари ортидан ушбу текширувга йўл қўймаслик мақсадида пора таклиф қилингани иддао қилинди.

Суднинг очиқ, деб эълон қилинган мажлисини кузатаётган мухбирларга кўра, "Quramax Medical" МЧЖнинг ҳиндистонлик директори Р.С.П ўзига қўйилаётган айбловларни рад этган, лекин воситачи одамга пул берганини тан олган.

16 ва 17 август кунлари айбланувчиларнинг айрим адвокатлари судга раислик қилувчидан айбсизлик презумпцияси важидан суд мажлисидан журналистларни чиқариб юборишни, суд мажлиси жонли эфирини тўхтатишни талаб қилган.

Суд раиси адвокатларнинг талабини қондиргани айтилмоқда.

Август бошида Ўзбекистон Олий Суди йўтал сиропларини ичиб ҳаётдан кўз юмган болалар ўлимлари бўйича қўзғатилган жиноят иши тергови ниҳоясига етгани ва иш судга оширилганини хабар қилди.

Тергов давомида Ҳиндистонда тайёрланган "Док 1 Макс" сиропи Ўзбекистонда 65 бола ўлимига сабабчи бўлгани аниқлангани билдирилади.

Шу йил январида Ўзбекистон расмийлари Ҳиндистоннинг Marion Biotech компаниясининг дорилари 20 болани ўлдиргани бўйича жиноят иши очилганини хабар қилган эдилар.

Ҳиндистон фармацевтика ширкатларининг сифатсиз дорилари ўтган йили Гамбия, Ҳиндистон ва Ўзбекистонда кўп болалар умрига зомин бўлди.

Жаҳон Соғликни сақлаш ташкилоти Ҳиндистон дори воситаларини болаларга бермаслик ҳақида огоҳлантирди, дори таркибига этиленгликоль моддасини меъёридан ортиқ қўшган фармацевтика компанияларининг фаолияти тақиқланди, Ҳиндистон ҳукумати экспорт қилинадиган дори-дармонлар текшируви бундан кейин кучайтирилади деб хабар қилди.

Ёш болалар ўлимига сабаб бўлган дори воқеаси ортидан Ўзбекистонда ўтган текширувлар ортидан одамлар истеъмол қилиб келган яна бир неча турдаги дори воситаларини сифатсиз, деб топилган ва савдодан олиб ташланган.

Ўзбекистон дунёдаги коррупция кўрсаткичида ҳар доим энг абгор давлатларидан бири саналиб келган.

Ўзбекистоннинг жорий раҳбарияти ҳам мамлакатда коррупция ва порахўрлик чуқур илдиз отганини бир неча бор таъкидлашган.

https://t.me/bbcuzbek

BBC.COM/UZBEK

Telegramda bog'lanish raqami +44 7858860002