Ўзбекистон: Толибон расмий Тошкент учоқларни қайтариб бермаётганини айтди ва Самарқанддаги тоннелдан нега сув сизди? – Янгиликлар, O'zbekiston, yangiliklar

Толибон учоқларни қайтариб олиш йўлида музокаралар бошлаган;

Намойишлар бўлган Ақтауга авиапарвозлар бекор қилинди;

Самарқанддаги тоннелдан нега сув сизганига изоҳ берилди;

Бухорода илк ИЕС ишга туширилди;

Алоқадор мавзулар:

Учоқ музокаралари

Толибон Ўзбекистон ва Тожикистонда қолаётган учоқларни ортга қайтариш учун музокаралар бошлаган.

ToloNews'нинг хабар беришича, Толибон муваққат ҳукумати воизи ўринбосари Инамулло Самангоний бу борада юқори даражали музокаралар олиб борилаётгани ҳақида гапирган.

Самангоний собиқ Афғон ҳукумати учувчилари ўтган август ойида 40 дан ортиқ учоқда тилга олинган икки қўшни давлатга қочиб ўтганини билдирган.

Бир вақтнинг ўзида Толибон муваққат ҳукумати Мудофаа вазирлиги сўзчиси Иноятулло Хоразмий учоқларни қайтариш юзасидан Ўзбекистон ва Тожикистон ҳукуматларига кўп бор мурожаат қилингани, аммо шу вақтга қадар бундан бирор ижобий натижа чиқмаганини тилга олган.

Толибон муваққат ҳукумати раҳбари ўринбосари Абдул Ғани Бародар Ахунд ўтган йилнинг ноябрь ойида Ўзбекистонни афғон учувчилари олиб кетган самолёт ва вертолётларни қайтаришга чақиргани хабар қилинган эди.

Ўзбекистон Бош прокуратураси август ойи ўртасида расмий Кобул қулаши арафасида Толибондан қочган афғон ҳарбийлари 22 та ҳарбий самолёт ва 24 та вертолётда мамлакат ҳудудини ноқонуний кесиб ўтгани, учоқларда 585 нафар қуролланган ҳарбий бўлганини маълум қилган эди. Аммо маълумотлар тўлиқ ўрганилмагани важи билан, кейинроқ, бу хабар ўчириб ташланган.

Халқаро нашрлар бир ойга яқин Термиз яқинидаги жамлоқда сақланган афғон учувчилари ва уларнинг оилалари сентябрь ойи ўртасига келиб, БАА ва Қатарга кўчирилганини ёзганлар.

Бироқ улар қочиб келган ўнлаб учоқларнинг тақдири ҳануз номаълумлигича қолмоқда.

Ақтауга бекор қилинган парвозлар

Ўзбекистондан Қозоғистоннинг Ақтау шаҳрига мунтазам парвозлар бекор қилинган.

Uzbekistan Airways'нинг маълум қилишича, бунга Ақтау халқаро аэропорти халқаро парвозларни қабул қилишни ва амалга оширишни ёпганлиги сабаб бўлган.

Хабарда шаҳарга авиақатновлар қачон тикланиши тўғрисида маълумот кейинроқ тақдим этилиши билдирилган.

Компания йўловчилар 5 январь кунига Ақтауга бекор бўлган парвозлар авиачипталарининг тўлиқ қийматини чипта сотиб олинган жойда қайтариб олишлари ёки бошқа санага бепул қайта бронлаш ҳуқуқига эга эканликларини маълум қилган.

Маълумот ўрнида - суюлтирилган газ нархи икки бараварга оширилиши ортидан 2 январь куни Жанаўзен шаҳрида бошланган норозилик намойишлари Қозоғистоннинг бошқа ҳудудлари, жумладан, Ақтауга ҳам ёйилган эди.

Қурилиши тугалланмаган тоннель

Самарқандда эндигина фойдаланишга топширилган автомобиль-трамвай тоннель деворларидан нега сув сизиб чиққанлигига расмий изоҳ берилди.

Маълум қилинишича, тоннель ҳали қурилиш ишлари тўлиқ битирилмасдан туриб очиб юборилган.

Ижтимоий тармоқда 31 декабрь куни фойдаланишга топширилган шаҳар марказидаги янги тоннель деворларидан ёмғир ёғиши ортидан сув отилиб чиқаётгани тасвирланган видео тарқалган.

Фаоллар ушбу туннелга давлат бюджетидан 143 миллиард сўм сарфлангани, унинг қурилиши бирор тендерсиз Ўзбекистон темир йўллари "Кўприкқурилиш" трести УКга топширилганига эътибор қаратганлар.

Кескин танқидлар ортидан "Кўприкқурилиш" трести УК 4 январь куни расмий муносабат билан чиққан.

Муносабатда тоннель қурилишида лойиҳага кўра асосий қурилиш-монтаж ишлари якунлангани, аммо қурилиши тўлиқ битмаган йўл ўтказгич "байрам тадбирлари даврида тирбандликнинг олдини олиш ва транспорт воситалари ҳаракатланишига қулайлик яратиш мақсадида" очиб юборилгани айтилади.

"Тоннель қисмининг деворларидан сув ўтиш ҳолати ҳали қурилиш ишлари давом эттирилаётган сув қочириш-ирригация тизимидаги лотокларга ҳар хил турдаги тиқилишлар оқибатида юзага келган", ҳолат сабаби изоҳланади муносабатда.

Расмийлар тоннель деворлари орасига сув кириши жиддий муаммо туғдирмаслиги ҳамда ёмғир сувларини қочириш ишлари тез кунларда якунига етказилишини қўшимча қилганлар.

Бухорода ИEС ишга тушди

Бухоро туманида қуввати 270 МВт бўлган иссиқлик электр станцияси ишга туширилган.

Энергетика вазирлигининг маълум қилишича, илк қурилмаси 31 декабрь куни ишга туширилган газ-поршенли ИEС Туркиянинг Aksa Enerji компанияси томонидан қуриб битказилган.

Станция яқин кунлар ичида мамлакат ягона электр тармоғига қувват узатишни бошлаши хабар қилинган.

Маълум қилинишича, ушбу станция Бухоро вилоятидаги биринчи ИEС ҳисобланади ва у йилига 2,2 миллиард киловатт-соат электр энергияси ишлаб чиқаради.

"Лойиҳа қурилмаларининг фойдали иш коэффициентининг юқорилиги ҳисобига йиллик 260 миллион метр куб табиий газ тежалади. Тежалган табиий газга қўшимча 900 миллион киловатт-соат электр энергияси ишлаб чиқариш имкони яратилади, бунинг натижасида (ушбу 900 миллион киловатт-соат электр энергияси билан) 450 минг хонадон электр энергияси билан таъминланади", дейилади Энергетика вазирлиги хабарида.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek