Ўзбекистон: UzAuto Motors 'чин қалб'дан узр сўради, Оқдарёда портлаш ва депутат – 'мактаб боласи эмас' – янгиликлар Rossiya O‘zbekiston migrant dunyo yangiliklar

Жиззахлик депутатлар вилоят ҳокимига савол бермасликдан огоҳлантирилди;

Коррупцияга қарши курашда қўл келаётган сайт устидан арз қилинди;

UzAuto Motors 4 та автомобиль учун аризаларни вақтинча тўхтатди;

Оқдарёдаги газ портлашида 10 киши жароҳат олди;

Кучли ёмғир Наманган кўчаларини сувга тўлдирди;

Алоқадор мавзулар:

Оқ кўйлак, темний галстук ва депутатлик значоги

Жиззахда халқ депутатлари йиғилишга телефон олиб келмаслик ва вилоят ҳокимига савол бермасликдан огоҳлантирилди.

Тармоқда Жиззах вилоят Кенгаши котибияти мудирининг вилоятдаги маҳаллий кенгашлар котибиятларига йўллаган хати тарқалган.

Хатда 20 декабрь кунга белгиланган вилоят ҳокими Эргаш Солиевнинг мурожаати бўйича Халқ депутатлари вилоят Кенгаши сессиясида қатнашувчи халқ вакилларига қўйилган талаблар тўғрисида сўз боради.

Талаблар қаторида депутатлар расмий форма (оқ кўйлак, қора костюм-шим, темний галстук, депутатлик значоги ва гувоҳнома - расмий хатдан айнан келтирилди)да бўлиши шартлиги кўрсатилган.

Шунингдек, халқ вакиллари сессияга телефон билан қўйилмаслик ва йиғилиш бўлиб ўтаётган жараёнда саволлар бермасликдан огоҳлантирилган.

Ушбу ҳолатга муносабат билдирган Қонунчилик палатаси депутати Расул Кушербаев халқ вакили бўлмиш депутатларга нисбатан бундай талаблар "Конституцияга амал қилинмайдиган, мустақил автократлашиб бораётган ҳудудда содир бўлиши мумкин"лиги ҳақида ёзган.

Шунингдек, у "депутатда мол-мулкига ҳам дахлсизлик ҳуқуқи мавжудлиги сабаб" сессияга шахсий телефон билан киришга қўйилган чекловни "ғайриқонуний" деб атаган.

Кушербаев йиғилишга расмий формада келиш талабини ҳам танқидга тутган.

"Сессияга "расмий кийимда" келишлари керак, дейилган жойи тушунарсиз. Чунки ўзим ҳам "расмий кийим" нима эканлигини билмайман. Қонунчиликда бунинг тушунчаси йўқ афсуски: европача костюмми, қора кўйлакми ёки миллий чопонми ҳалиям номаълум.

Майли, ҳаммани омадини берсин ишқилиб. Фақат бир нарсани эсдан чиқармаслик керак: депутат мактаб боласи эмас, у минглаб одамлар томонидан сайланган, мустақил шахс. Оқ кўйлакда кел, телефонни ўчириб кел, саволсиз кел, каби гаплар мактаб боласига айтилади", ёзган у.

Танқидлар ортидан муносабат билан чиққан Жиззах вилоят Кенгаши котибияти депутатлик одоби ва талабларидан келиб чиққан ҳолда йиғинга расмий кийимда келиш сўралгани ҳамда сессия жонли эфирга узатилиши боис йиғилишга халақит бермаслик мақсадида телефонларни овозсиз режимга ўтказиш тавсия этилганини билдирган.

Расмий муносабатда сессиядан сўнг ўтказиладиган матбуот анжуманига депутатлар ҳам таклиф этилгани ва савол-жавоблар ўтказилиши белгилангани қўшимча қилинган.

"Коррупцияга қарши курашга қарши кураш"

Юридик шахслар тўғрисидаги очиқ маълумотларни ўз ичига олган orginfo.uz сайтига нисбатан маъмурий иш қўзғатилган.

Аризачи бўлмиш Давлат статистика қўмитаси маҳаллий нашрларга сайт фаолияти қўмита бериб келаётган маълумотларга нисбатан ишончсизлик кайфияти уйғотиши мумкинлигини билдирган.

Йил бошида фаолият бошлаган orginfo.uz сайти юридик шахслар, аффилланган шахслар, таъсисчиларга тегишли бошқа компаниялар тўғрисидаги маълумотларни тезкор аниқлаш имконини берганидан коррупцион схемалар борасида суриштирувлар олиб бораётган журналист-блогерлар ва фаолларга қўл келиб келаётган эди.

Ҳуқуқшунос-блогер Хушнудбек Худойбердиев сайт бу маълумотларни Давлат статистика қўмитасининг очиқ ва расмий маълумотлар базасидан олиши, қўмита сайтининг ўзидан маълумот қидириш қийин ва ноқулайлиги ҳақида ёзган.

Давлат статистика қўмитаси маҳаллий нашрларга қўмита ва сайт асосчиси бўлмиш Бобурмирзо Ҳамроқулов ўртасида orginfo.uz сайтига маълумотларни жойлаш бўйича келишув бўлмагани, сайтда маълумотлар ўз вақтида янгиланмаганидан қўмита манба сифатида кўрсатилиб, келтирилган маълумотлар, баъзида, расмий манбага мувофиқ келмай қолганини таъкидлаган.

Ҳуқуқшунос Худойбердиев "Статистика қўмитасининг бу иши Ўзбекистон жамиятида коррупцияга қарши курашаётганлар, очиқлик ва шаффофлик асосида давлат мулкини талон-тарож қилаётганларни фош қилаётганларга қарши кураш бўлгани"ни билдирган.

Ўтган ҳафта ҳолатга муносабат билдирган Давлат статистика қўмитаси фақатгина сайтнинг расмий маълумотларга тўғри келмайдиган ахборотларда қўмита номининг манба сифатида келтирилишига эътироз билдиргани ва веб-сайтнинг ёпилиши тарафдори эмаслигини маълум қилган.

Қийин пайтдаги мурожаат

UzAuto Motors компанияси 1 февралга қадар тўртта энг оммабоп автомобиль моделлари учун аризалар қабул қилишни тўхтатаётганини эълон қилган.

"Қийин бир пайтда" харидорларга мурожаат қилаётганини билдирган компания бу қарор сабабини дунё автомобиль саноатини "давомли инқирозга олиб келган" бутловчи қисмларни етказиб бериш билан боғлиқ муаммолар орқали изоҳлаган.

"UzAuto Motors жамоаси октябрь, ноябрь ҳамда декабрь ойларида сифатни йўқотмаган ҳолда шартнома мажбуриятларини бажариш учун барча имкониятларини ишга солди. Аммо компания ҳар сафар вазиятни ўнглаб, аввалроқ етказиб берилмаган автомобилларни ишлаб чиқариш ҳамда доимий иш ритмига қайтаётганида, етказиб берувчилар томонидан йўлга қўйилган навбатдаги носозлик ҳаммамизни орқага ташлади", дейилади компания мурожаатида.

Компания келаси йил февралига қадар Nexia, Spark, Cobalt, Lacetti каби энг харидоргир моделлар учун аризалар қабул қилишни вақтинча тўхтатиб, эндиги эътиборни олдиндан буюртма берилган автомобилларни ишлаб чиқаришга қаратишдан бошқа танлови йўқлигини маълум қилган.

Компания вақтинча "янги автомобиль учун буюртма беролмайдиган потенциал харидорлардан чин қалбдан узр сўраши"ни қўшимча қилган.

Самарқандда чақнаган газ

Оқдарё туманидаги ошхонада газ портлаши юз бериб, 10 нафар инсон жароҳат олган.

ФВВ 19 декабрь кунги ҳодисани чақнаш дея тасвирлаб, воқеа жойида иккита пропан газ балони бўлганини хабар қилган.

Вазирлик ошхона шифтининг 40 кв.метр қисми ва жиҳозлар ёнгани, ёнғин ярим соат ичида ўчирилганини қўшимча қилган.

Шунингдек, тан жароҳати олган инсонлар туман шифохонасига ётқизилган.

7 декабрь куни Деновдаги савдо марказида ҳам газ билан боғлиқ ўхшаш ҳолат юз бериб, 2 инсон ҳалок бўлган эди.

Ўшанда жамоатчилик марказни бутунлай яроқсиз ҳолатга келтирган ва атрофдаги ўнлаб биноларга жиддий шикаст етказган газ портлаши расмийлар томонидан "чақнаш" дея аталганини савол остига олган эди.

Сув босган Наманган

Тармоқда кучли ёмғирдан сўнг Наманган шаҳар кўчаларини сув босгани тасвирлаган видеолар тарқалган.

Видеоларга берилган изоҳларда 20 декабрга ўтар кечаси кузатилган ёмғир ортидан эрта тонгда шаҳардаги Лола бозори ва Наманган Давлат университети атрофидаги кўчалар сув остида қолгани айтилади.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek