Ўзбекистон: Пойтахтдаги чанг бўронлари, харидори чиқмаган Гулноранинг дачаси ва Ўзбекистон Тожикистон билан нимани келишди? Янгиликлар O‘zbekiston mintaqa dunyo yangiliklar

Чангга ботаётган пойтахт

Мамлакат ва пойтахт Тошкентда кузатилаётган чанг бўронларига жадал бораётган қурилишлар сабаб бўлмоқда.

Ўзгидромет экспертлари Тошкент шаҳрида сўнгги вақтларда тез-тез содир бўлаётган чанг тўзонли ҳодисалар сабабини шундай изоҳлаган.

Ўтган май ойида Тошкент дохил Ўзбекистоннинг қатор ҳудудларида бир неча бор кучли чанг бўронлари бўлган.

Чанг бўронлари пайти пойтахт кўчаларида кўриш имконияти чекланиб қолаётгани кўзга ташланган.

Ўзгидрометнинг билдиришича, қурилишлар сабаб бўлаётган катта миқдордаги қум ва чанг кучсиз шамол эсган вақтда ҳам ҳавога кўтарилиши мумкин.

Марказ, шунингдек, 24 майдан 29 майга қадар Тошкент шаҳри ҳавосининг чанг билан ифлосланиши 2.7 марта ортганини билдирган.

Шу кунларда мамлакатнинг айрим минтақаларида яна шамол ва чангли бўрон бўлиши эҳтимоли назардан соқит қилинмаган.

Ўзбекистон Фавқулодда вазиятлар вазирлигининг билдиришича, куни-кеча эсган кучли шамол аллақачон Жиззах ва Навоийдаги уйларга зарар етказишга улгурган.

Харидорсиз "Сижжак"

Шу йилнинг март ойида оммавий савдога қўйилган муқаддам Гулнора Каримовага тегишли бўлган "Сижжак" дам олиш масканига ҳозиргача харидор топилмаган.

30 март куни ДХХнинг собиқ марказий биноси, "Малика" бозори ва "Сижжак" дохил ўнга яқин йирик давлат активлари оммавий савдога чиқарилган эди.

21 май куни Давлат активларини бошқариш агентлиги "Сижжак" ва "Белдерсой" дам олиш масканларидан ташқари қолган 6 йирик активни сотиб олиш бўйича жами 16 та таклиф келиб тушганини хабар қилган.

Ҳозирча харидори чиқмаган активларни сотиб олиш бўйича таклифларни қабул қилиш муддати 1 июлга қадар узайтирилгани маълум этилган.

Гулнора Каримова мулкининг очиқ ва шаффоф сотилиши айтилган.

Расмийлар сотувдан тушган пулнинг тўғри маҳаллий бюджетга боришини таъкидлашган.

Аммо Сижжакнинг бошланғич нархи номаълум қолганди.

Сижжак дам олиш маскани 2000-йиллар ўртасида қурилган. Ҳозирда қаттиқ қўриқланувчи бу маскан меҳмонхона, майхона, дискотека, кинотеатр, очиқ ва ёпиқ бассейн, мажлислар зали ва дам олиш хоналаридан иборат. Хоналар эса қимматбаҳо мебеллар билан жиҳозланган.

2019 йилда ҳашаматли Сижжак оромгоҳи ўша вақтлар президент Шавкат Мирзиёевнинг куёви Отабек Умаров раҳбарлик қилган Триатлон федерациясига берилиши тўғрисида хабарлар чиққан. Бироқ кейинроқ ҳукумат бу масканни сотишга қарор қилган.

Президент отаси вафоти ортидан, Гулнора Каримова Ўзбекистонда давлат мол-мулкини ўзлаштириш, солиқ тўлашдан бош тортиш ва бошқа қатор иқтисодий-молиявий жиноятларда айбдор, деб топилган.

2017 йил декабрида эса, унинг 10 йилга озодликдан маҳрум этилгани расман эълон қилинган ва ҳозир қамоқда қолмоқда.

Тожикистон билан келишув

Тошкент ва Душанбе бўлажак тожик зобитларини Ўзбекистон ҳарбий олийгоҳларида ўқитишга келишиб олди.

Бу ҳақда Тожикистон Мудофаа вазирлигидаги манбасига таянган ҳолда Asia-Plus нашри хабар берган.

Хабарда ҳозирда томонлар Ўзбекистон ҳарбий олийгоҳларида қўшни мамлакат фуқаролари учун қанча жой ажратилиши, бўлажак тожик зобитлари Ўзбекистонда қандай мутахассисликлар бўйича таҳсил олиш юзасидан келишувлар давом этаётгани билдирилган.

Asia-Plus нашрининг таъкидлашича, икки қўшни мамлакатнинг мустақиллик йиллари давомида ўхшаш келишув илк бор кузатилмоқда.

Ўзбекистоннинг ташқи сиёсатидаги энг асосий ютуқларидан бири - сўнгги 4 йил ичида минтақа мамлакатларининг ишончли ҳамкорлигини тиклашга муваффақ бўлгани, деб айтилади.

Ислом Каримовнинг кутилмаган вафоти ортидан қудратга келган президент Шавкат Мирзиёев ўтган тўрт йилнинг ичида ўзининг янгича минтақавий сиёсати билан халқаро миқёсда эътирофларга сабаб бўлган.

Ўзбекистонни ташқи дунёга очиш, минтақавий интеграцияни кучайтириш саъй-ҳаракатида экани кўрилган.

Ўзбекистонда Ислом Каримов бошқаруви билан кечган чорак асрдан ортиқроқ вақт давомида минтақада шаклланган ва айримлари уруш эҳтимоли билан огоҳлантириш даражасига ўсиб етган сув, чегара, энергетика, йўл ва виза муаммолари деярли тўлиғича ўзининг ечимини топгани юқори минбарлардан баён этиб бўлинган.

Аммо бу каби саъй-ҳаракатлар Россия ва Хитой минтақада ўзларининг геосиёсий ва геоиқтисодий манфаатларини жадаллик билан парваришлаш, бирлари ўз сиёсий, бошқалари эса, ўз иқтисодий таъсирини кучайтириш пайида бўлган бир пайтга тўғри келган.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek