Ўзбекистон: Дўппи кийган президент, миллиард сўмлик байроқ ва эҳсон қутисидаги $50 минг – янгиликлар - O‘zbekiston dunyo yangiliklar

Президент Шавкат Мирзиёев оммага илк бор миллий дўппида кўриниш берди. "Корзинка"даги эҳсон қутисида $50 минг доллар топилди. Эмлашнинг иккинчи босқичи ва янги антирекордлар - bbcuzbek.com дайжести.

Президент Шавкат Мирзиёев оммага илк бор миллий дўппида кўриниш берган.

Давлат раҳбари Туркманистонда ўзбек дўпписини кийганча, Қуръон тиловат қилган.

29 апрель куни президент Мирзиёев қўшни давлатга амалий ташриф билан борган.

У ерда мамлакат президенти Гурбангули Бердимуҳаммедов билан икки томонлама ва минтақавий кун тартибининг долзарб масалаларини муҳокама қилган.

Мирзиёев 18 апрель куни отаси Маликгули Бердимуҳаммедовдан айрилган Туркманистон президентига ўзбек халқи ва шахсан ўзи номидан ҳамдардлик билдирган.

Президентлар биргаликда мамлакатнинг биринчи раҳбари Сапармурат Ниёзов мақбарасини зиёрат қилганлар.

Шу ерда ўтганлар ҳақига тиловат қилинган.

Шундан сўнг Мирзиёев Маликгули Бердимуҳаммедов хотирасига бағишланган ифторда иштирок этган.

Ифтор чоғида Ўзбекистон президенти икки халқ қадимдан бир-бирига елкадош бўлиб келаётганини тилга олган.

Ўзбекона дўппида кўриниш берган президент Мирзиёевнинг сурати ижтимоий тармоқ бўйлаб зумда тарқаган.

Аксар фойдаланувчилар президентга дўппи ярашганини таъкидлаганлар.

1,3 миллиард сўмлик байроқ

«Қашқадарё» газетасининг хабар беришича, бундай улкан байроқни қуришга Қарши шаҳар ободонлаштириш бошқармаси буюртма берган.

Газета очиқ маълумотларга таяниб, байроқнинг биргина устунини тиклашга 1 миллиард 350 миллион сўм сарфланаётгани ҳақида ёзган.

Ушбу хабарга муносабат билдирган депутат Дониёр Ғаниев Фарғонада ўрнатилган 64 метрлик байроқнинг нархи «100 миллион сўмга ҳам бормагани» ҳақида ёзган.

Эҳсон қутисидаги $50 минг

«Корзинка» супермаркетлар тармоғи шўбаларига ўрнатилган эҳсон қутиларининг биридан $50 минг топилган.

Тармоқ раҳбари Зафар Ҳошимов пуллар номаълум саховатпеша томонидан ўндан ортиқ конвертда ташлаб кетилгани ҳақида хабар берган.

Ҳошимов супермаркетлардаги қутиларга тушган барча маблағлар саратонга чалинган болаларга ёрдам берувчи «Эзгу амал» хайрия жамғармасига йўналтирилишини маълум қилган.

«Оғир касалга чалинган болакайларга Рамазон ойининг табаррук кунларида шундай гўзал эҳсон қилган номаълум инсон амали эзгулик, олижаноблик ва муқаддас Рамазон ойи хислатларига бўлган ишончимизни янада орттирди», ёзган «Корзинка» раҳбари.

Эмлашнинг иккинчи босқичи

1 майдан Ўзбекистонда коронавирусга қарши оммавий вакцинациянинг иккинчи босқичи бошланади.

Бу ҳақда Инновацион ривожланиш вазирлиги хабар қилмоқда.

Режага кўра, бу босқичда журналист ва блогерлар, жамоат транспорти ходимлари, хорижда ўқийдиган талабалар ва меҳнат муҳожирлари эмланади.

29 апрель ҳолатига кўра, мамлакат бўйлаб коронавирусга қарши эмланганлар сони 718 минг нафардан ошган.

Янги антирекордлар

29 апрель куни мамлакатда кундалик касалланишлар сони йил бошидан бери илк бор 400 нафарлик маррадан ўтган.

Шу куни 402 нафар коронавирус бемори аниқланган.

Шифохоналарда даволанаётганлар сони эса 3,000 нафардан ошиб кетган.

Яна икки бемор вафот этган.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek