Яна бир яхши хабар: Россия вакцинаси ҳозирча Ковидга қарши дунёдаги энг кучлиси бўлиб чиқди, Rossiya koronavirus, Covid-19, O'zbekiston, dunyo, yangiliklar

Яхши хабар: Россия вакцинаси ҳозирча Ковидга қарши дунёдаги энг кучлиси бўлиб чиқди - Pfizer ва BioNTech никини ортда қолдирди. Россия вакцинаси сизни Ковиддан 92 фоиз ҳимоя қилади. Ўзбекистон ҳозирча 5 минг доза Россия вакцинасини харид қилиш режасида эканини айтганди.

Қолган аксарият Марказий Осиё давлатлари эса, Россия вакцинасига биринчилардан бўлиб қизиқиш билдиришган.

Қозоғистон расмий Москва билан Россия вакцинаси хариди борасида расман бир тўхтамга келган биринчи минтақа давлати бўлган.

Барча синовлари тугаши ортидан, Россия Қозоғистонга 2 миллион дозадан ортиқ вакцина етказиб бериши маълум бўлган.

Орада Беларусь Россия вакцинасини олажак биринчи собиқ Шўро давлати бўлиши ҳам англашилган.

Лукашенко бу ҳақда Россия президенти Владимир Путин ўзига ваъда берганини айтиб чиққанди.

Президент Шавкат Мирзиёев 4 август куни бу ишни Бош вазир ўринбосари Беҳзод Мусаевга топширган, унга бир ҳафта муддат берган.

Ана шу муҳлат ичида етакчи олимлар ва тажрибали шифокорлар билан маслаҳатлашган ҳолда, вакцинани харид қилиш ва мамлакат аҳолиси вакцинациясини амалга оширишнинг пухта йўлларини ишлаб чиқишни буюрган.

Аммо ўшанда Ўзбекистон вакцинани кимдан харид қилиши масаласи ноаён қолган.

Ўзбекистон раҳбари Россиядан ташқари, АҚШ, Британия ва Хитойдан ном тутганди.

Масъуллар Ўзбекистон Россиядан қанча доза вакцина сўрагани саволига шу йил сентябрь ойи охирида расман ойдинлик киритишган.

Бундан аввал тарқалган хабарларга раддия беришган, Россия билан Ўзбекистонга 35 миллион доза вакцина юбориш масаласида ҳеч бир келишув бўлмаганини айтишганди.

Ўзбекистон минтақанинг аҳолиси энг катта давлати бўлади.

Аҳолисининг сони ҳозир расман 34 миллион кишидан ортади.

Россия вакцинаси

Россия вакцинаси дунёдаги расман қайддан ўтган биринчи вакцина бўлади.

Уни шу йил август ойида шахсан Россия президентининг ўзи тақдим этган.

Президент Путинга кўра, у коронавирусга қарши лозим даражада қаршилик кўрсата олган.

Вакцина барча текширувлардан ўтган, аллақачон ўзининг қизларидан бири ҳам эмланган.

Россия вакцинасининг инсонлардаги синови икки ойга ҳам етмаган.

Бу эса, дунёдаги кўплаб экспертларнинг жиддий хавотирларига сабаб бўлган.

Экспертлар синовларнинг тўлиқ натижаси ноаён қолар экан, Россия вакцинасига ишониш қийин эканини айтишган.

Россия президентининг ўз вакциналари барча синовлардан ўтганига оид сўзлари ҳам уларни бунинг тескарисига ишонтира олмаган.

Ўша пайтда Жаҳон Соғлиқни сақлаш ташкилотининг рўйхатида бўлган ва учинчи босқичгача етиб борган олтита вакцина орасида Россияники кўрилмаган.

Аммо шу йил сентябрь ойи охирида пойтахт Москвадан Спутник V нинг учинчи босқич синовлари бошланганига оид хабарлар олинганди.

Учинчи босқич синови вакцинанинг ўн минглаб одамда синаб кўрилишини англатади.

Россияники энг кучлиси

Хабарларга кўра, учинчи босқич синовларининг дастлабки натижалари худди шу нарсага далолат қилмоқда.

Россия вакцинаси одамларнинг Ковиддан 92 фоиз ҳимоя қила олишини кўрсатмоқда.

Бу маълумотлар Спутник V вакцинаси синалган 16 минг кўнгиллининг 20 тасида қайд этилган Ковид-19 ҳолатига асосланади.

Россия вакцинасининг энг кучлиси экани билан боғлиқ сўнгги янгилик яна олимларнинг қарама-қарши муносабатларига сабаб бўлган.

Бирлари бу хабарни хуш қаршилашган, бошқалари эса, жуда эрта хулоса чиқарилганини айтишган.

Куни-кеча Америка ва Германиянинг Pfizer ва BioNTech ширкатлари бутун дунёда катта гап бўлган шов-шувли янгилик билан чиқишган.

Ўзлари яратган вакцина инсонларни Ковиддан 90 фоиз ҳимоя қила олишини айтишган.

Бу - инсоният ва илм-фан учун буюк кун эканини таъкидлашган.

Уларнинг хулосалари 43500 минг кишида ўтказилган учинчи босқич синовлари ортидан янграганди.

Россия вакцинаси эса, камроқ одамда синалган ва келтириб чиқарган Ковид-19 ҳолати ҳам оз бўлган.

Аммо, шунга қарамай, дастлабки синов натижалари умидбахш, дейди Би-би-сининг Саломатлик масалалари бўйича мухбири Филиппа Роксби.

Спутник V Россиянинг Москвадаги Эпидемиология ва Микробиология Миллий Тадқиқот маркази томонидан яратилган.

Унинг учинчи босқич синовлари Беларусь, Бирлашган Араб Амирликлари, Венесуэла ва Ҳиндистонда олиб борилмоқда.

Россиялик тадқиқотчиларга кўра, биринчи эмлашдан 21 кун ўтиб, бирор бир кўнгиллида нохуш аломатлар кузатилмаган. Кўнгиллиларнинг синов жараёнида икки бор эмланиши кўзда тутилган.

Би-би-си мухбирининг айтишича, худди Pfizer/BioNTech мисолида бўлгани каби, бу ҳозирча дастлабки натижалар.

Маълумотлар ҳануз тўпланмоқда ва ҳалича муфассал тўлиқ натижалар чоп қилинмаган.

Ҳар икки вакцина мисолида ҳам очиқ қолаётган саволлар бор, дейлик, улар коронавирусга энг мойил кексаларни қанчалик ҳимоя қила олади ва таъсири қанчалик узоққа чўзилади, дейди мухбиримиз.

Дунёда устида дастлабки ишлар олиб борилаётган вакциналарнинг сони юздан ортади.

Ўзбекистон ва Россия

Масъуллар Ўзбекистон Россиядан қанча доза вакцина сўрагани саволига шу йил сентябрь ойи охирида расман ойдинлик киритишган.

Бундан аввал тарқалган хабарларга раддия беришган, Россия билан Ўзбекистонга 35 миллион доза вакцина юбориш масаласида ҳеч бир келишув бўлмаганини айтишган.

Ўзбекистонлик мутасаддилар бу каби хабарлар ҳақиқатдан йироқ эканини таъкидлашган.

Санитария эпидемиологик осойишталик агентлиги Ўта юқумли касалликлар лабораторияси бўлим мудири Иброҳим Маматқулов мазкур масалага АОКА да бўлиб ўтган бугунги брифинг чоғида тўхталган.

У Ўзбекистон Россия вакцинасидан бор-йўғи 5 минг доза сўраганини айтган.

Россия вакцинасини сотиб олиш бўйича икки ўртада мутахассислар ва ҳукуматлар даражасида музокаралар давом этаётгани худди ўша ой бошида маълум бўлган.

Ўзбекистон Соғлиқни сақлаш вазирининг биринчи ўринбосари, санитария-эпидемиологик осойишталик агентлиги директори Баҳодир Юсупалиев Россиянинг "Комерсантъ" нашрига берган суҳбатида бу ҳақда тўхталиб ўтган.

"Ўзбекистон, бу хусусда, балки, икки ҳафталардан кейин қандайдир тўхтамга келиши мумкин"лигини айтган.

"Ўзбекистон ҳукумати жорий пайтда вакцина олиш учун пул ажратиш масаласини кўриб чиқаётгани"ни ҳам қўшимча қилган.

Баҳодир Юсупалиев ўша суҳбатида "Ўзбекистон аҳолиси учун ўз вақтида вакцинани қўлга киритиш учун тайёр эканликлари, бунда вакцинанинг хавфсизлиги ва таъсирчанлиги ўзлари учун катта аҳамият касб этиши"ни таъкидлаб ўтганди.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek