Франция: Ниццадаги ҳужумчи яқинда Тунисдан Европага келган – видео, дунё, янгиликлар, O'zbekiston, Turkiya, Islom dini, dunyo, yangiliklar

Франция: Ниццадаги ҳужумчи яқинда Тунисдан Европага келган - Ницца бош черковида уч инсонни пичоқлаб ўлдирган тунислик яқинда Европага келган, демоқдалар Франция расмийлари:

Ҳужумчининг 21 яшар Тунис фуқароси экани айтилмоқда, черковдаги ҳужумдан кейин полиция уни отиб яралаган, ҳозир шифохонада аҳволи оғир, дейилмоқда.

Ёнидан Италия Қизил Хоч ташкилоти томонидан берилган ҳужжат топилган.

Тунислик Италиянинг Лампедуза оролига 20 сентябрда келган, 9 октябрда мигрантларни вақтинча ушлаб туриш марказига юборилгани айтилмоқда.

Франция Президенти Макрон сўзларига кўра, мамлакати яна террорчилик ҳужумига дуч келган.

Франция ўз қадриятларидан воз кечмайди, деб айтган Ниццадаги ҳодиса жойига борган Президент Макрон.

Франция президенти хавфсизлик чораларини кучайтирган, черковларни қўриқлашга ҳарбийларни ҳам сафарбар қилган.

Франциядаги исломий террорчи ҳужуми деб кўрилаётган охирги уч ҳужумни Франциянинг ўзида туғилмаган мусулмонлар содир этгани айтилмоқда.

25 сентябр куни Париждаги Шарли Эбдо сатирик журнали таҳририятининг собиқ биноси олдида икки кишини пичоқлаган асосий гумондорнинг покистонлик экани хабар қилинди.

16 октябр куни Париж яқинида тарих ўқитувчиси Сэмюэл Патининг боши танасидан жудо қилинган, ўқитувчининг ўқувчиларига Ислом Пайғамбарига карикатураларни кўрсатгани норозиликларга сабаб бўлган эди.

Француз ўқитувчисининг қотили 18 яшар чечен Абдулло Анзоров деб айтилди.

29 октябр 2020

Францияда яна ҳужум, қурбонлар бор - ҳужум шу соатларда Ниццада юз берган. Масъуллар уни теракт, дейишмоқда. Ҳужумчи бир неча кишини яралашга ҳам муваффақ бўлган.

Гумондор ҳужумдан саноқли дақиқалар ўтиб ушланган.

Ниццадаги ҳужум Нотр-Дам ибодатхонаси қоқ марказида амалга оширилган.

Ҳужумчи пичоқ ёрдамида уч кишини ўлдирган, яна бир неча нафарини яралаган.

Хабарларга кўра, черковга ибодат қилиш учун келган бир кекса қурбоннинг "деярли боши танасидан жудо этилган". Ўлдирилганларнинг яна бири ибодатхона қоровули бўлган.

Ницца мэри Кристиан Эстроси "Исломо-фашизм" ҳақида гапирган ва гумондор "тинимсиз" Аллоҳу Акбар, деб такрорлаган"ини айтган.

Франциянинг миллий аксилтеррор прокуратураси қотиллик бўйича суриштирув ишларини бошлаган.

Қурбонлар ва жабрланганларнинг ким эканликлари тафсилотлари ҳозирча маълум эмас.

Франция Ички ишлар вазири шаҳарда ҳали-ҳануз полиция амалиёти давом этаётганлигини айтган.

Авиньон яқинида полицияга тўппонча билан таҳдид қилган бошқа бир эркак эса, отиб ўлдирилган.

Жиддадаги Франция консуллиги қўриқчисига ҳам ҳужум қилинган. Гумондор ҳибсга олинган ва қўриқчи касалхонага олиб кетилган.

Аҳолиси 340 минг кишилик Ницца, асрларки, сайёҳларнинг энг ёқтирган манзилларидан бири бўлиб келади.

Ҳужум пойтахт Париж яқинида франциялик ўқитувчининг боши танасидан жуда этилиши ҳодисасидан қарийб икки ҳафта ўтиб кузатилган.

Ўқитувчининг ўлимига унинг ўз ўқувчиларига Муҳаммад пайғамбар (с.а.в.) ҳажв қилинган карикатурани кўрсатгани сабаб бўлгани айтилганди.

Ниццадаги ҳужумчи шахси ва уни бунга ундаган омиллар сабаби маълум эмас.

Аммо сўнгги ҳафталарда Франция президентининг карикатурларни ҳимоя қилган ва Ислом динига оид чиқишлари мамлакат ичкариси ва ташқарисида ҳам кўпчилик мусулмонларнинг бирдек норозиликларига сабаб бўлиб келаётганди.

Айни шу чиқишлари юзасидан шу кунларда Франция ва Туркия президентлари ўртасида даҳанаки жанг ҳам қизиган.

Туркия илова дунёнинг қатор давлатларида Франция маҳсулотларини бойкот қилишга оид даъватлар ҳам кучайган.

Charlie Hebdo нинг Туркия президенти карикатурасини чоп қилиб чиққани эса, икки ўртадаги тангликни янада кучайтирган.

Сатирик журнал Муҳаммад пайғамбар (с.а.в.) карикатуралари сабаб, 2015 йилда ҳалокатли террорчилик ҳужуми нишонига айланган.

2 сентябрь куни Францияда илк ҳужум билан боғлиқ суд иши бошланган.

Charlie Hebdo ўтган ой Ислом дини пайғамбари ҳажв қилинган карикатураларни қайта босишга қарор қилган.

"2015 йилги террорчилик ҳужумлари билан боғлиқ маҳкама жараёни бошланажак бир ҳафтада карикатураларни қайта чоп этишни ўзлари учун муҳим, деб топишган".

Хабарларга кўра, маҳкама тинглови 10 ноябрга қадар давом этади.

2015 йилги ҳужум бутун Францияни зил титратган, "Мен - Шарли" ҳаракатига ҳам туртки берган.

Миллионлаб кишилар юришга чиқишган, уларга бошқа давлат фуқаролари ҳам қўшилишган.

Ислом дини пайғамбари ҳажв қилинган бу карикатуралар ҳамиша мусулмонларнинг кескин, қаҳрнок муносабатларига сабаб бўлиб келган.

Улар биринчи бор Данияда босилган. Шарли Эбдода 2006 йилда бўй кўрсатган.

Бу воқеаларга мустақил Ўзбекистоннинг биринчи президенти Ислом Каримов ҳам ўзининг эътиборини қаратган.

Олий Мажлис Сенатининг 2015 йил 22 январь кунги мажлисида кутилмаганда Париждаги воқеаларга муносабат билдирган.

"Франциядаги бу намойишларни оладиган бўлсак, бу каби ўйинларнинг барчаси хўжакўрсинга, ҳаммаси ўзига сохта обрў топиш учун бўлаяпти," деган.

Каримов, "Диний масалани ўртага қўйиш, диний масалани сиёсийлаштириш, дин ҳисобидан обрў топишга уриниш бу - бирорта динга ёқмаслиги"ни айтганди.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek