Тоғли Қорабоғда отишма, боши танасидан жудо этилган ўқитувчини қўллаб намойиш, беларусларни ўқ таҳдиди ҳам қўрқита олмади - видео, Tog’li Qorabog’, O’zbekiston, Rossiya, Turkiya, yangiliklar

Тоғли Қорабоғда отишма, боши танасидан жудо этилган ўқитувчини қўллаб намойиш, беларусларни ўқ таҳдиди ҳам қўрқита олмади - Франция, Беларусда минглаб одам намойишга чиқди. Озарбайжон ва Арманистон яна бир сулҳни бузди.

Тоғли Қорабоғ: Арманлар Ганжада уруш жинояти қилдими? BBC News Uzbek Yangiliklar

Тоғли Қорабоғда жанглар ҳануз тинмаётир. Ҳар икки рақиб томонга кўра, отишмалар, бугун, душанба куни ҳам давом этган.

Озарбайжон ва Арманистон шу шанба, 17 октябрь куни яна бир сулҳ борасида келишиб олишган. Бу сулҳнинг ҳам инсонпарварлик мақсадларини кўзда тутиши айтилган.

Битим маҳаллий вақт билан ярим тунда кучга кириши керак бўлган. Аммо рақиб томонлар шу заҳоти бир-бирларини уни бузишда айблаб чиқишган. Жанг ва отишмалар яна бошланиб кетган.

Хабарларга кўра, уч ҳафталик жанглар ортидан, Озарбайжон жанг жабҳасининг жанубий йўналиши бўйича олдинга силжишга муваффақ бўлган.

Ўтган 26 йил давомида арманлар назорати остида бўлган Жабройил, Гадрут ва Фузулий туманларини марказини қайта қўлга олган.

Арманистон томонига кўра, кеча, якшанба куни яна 40 ҳарбийсини бой берган. Ҳарбий талафотлари сони жами 673 кишига етган.

Озарбайжон фақат жанглар тугаши ортидан эълон қилишини айтиб, бу борадаги рақамларини эълон қилмай келмоқда.

Ҳар икки томондан ўнлаб оддий фуқаронинг қурбон бўлгани ва яраланганига оид баёнотлар, хабар бор.

Аммо талафотларга оид рақамларни мустақил манбалардан текшириш ва тасдиқлаш ҳали-ҳануз имконсизлигича қолаётир.

Арманистон Бош вазири итальян нашрига берган суҳбатида Туркия ва Озарбайжонни яна бир бор арманларни қатлоим қилишда айблаган.

Никол Пашинян халқаро ҳамжамиятни расман тан олинмаган Тоғли Қорабоғ республикасини эътироф этишга чақирган.

Боши танасидан жудо этилган ўқитувчи

Самюэль Патини қўллаб, кеча, якшанба куни бутун Франция бўйлаб минглаб одамлар намойишга чиқишган.

Ўқувчиларига Муҳаммад пайғамбар(с.а.в.) ҳажв қилинган карикатурани кўрсатиши ортидан, унинг боши танасидан жудо қилингани хабар берилган.

Намойишчилар, "Мен ўқитувчиман", "Биз Франциямиз", деган шиорларни кўтариб олишган.

Москвада туғилгани айтилаётган 18 ёшли ҳужумчи Париж яқинидаги мактаб атрофида полиция томонидан отиб ўлдирилган.

Хабарларга кўра, ҳужум билан алоқадорликда ҳибсга олинганлар сони 11 кишига чиққан. Аммо ҳибслар борасида бундан ортиқ маълумот берилмаган.

Франция президенти ҳодисани "исломий террорчилик ҳужуми"га қиёс берган, ўқитувчи "фикр эркинлигидан сабоқ бергани учун" ўлдирилганини айтган.

Франциядаги ҳужумни қоралаб чиққан Чеченистон президенти Рамзан Қодиров эса, диндорларни қутқуга солмасликка ҳам чақирган.

Сўнгги қотиллик Ислом дини пайғамбари ҳажв қилинган карикатураларни чоп қилгани Charlie Hebdo журналига қарши 2015 йилги ҳужум билан боғлиқ маҳкама иши давом этаётган бир манзарада кузатилган.

Беларусларни ўқ ҳам қўрқита олмади

Кеча, якшанба куни Беларусда яна минглаб киши намойишга чиқди, "Партизанлар марши" акцияси бўлиб ўтди.

Намойишчилар бу гал Минскда иш ташлаганларни қўллаб, кўчаларга чиқишди.

Хабарларга кўра, камида 15 минг киши намойиш ўтказган, уларнинг икки юзга яқини қўлга олинган.

Айрим хабарларда намойишчилар сони ўттиз мингга яқин экани ҳам айтилган.

Сўнгги акция расмийларнинг ҳарбийлар намойишчиларга қарши ўт очишга масъуллангани ҳақидаги хабарлар фонида бўлиб ўтган.

Кўрилишича, бу ҳам минглаб одамларни ўз норозиликларини ифода этишдан қўрқита олмаган.

Худди шу манзарада Беларусь мухолифати лидерлари - Светлана Тихановская, Мария Колесникова ва Вероника Цепкалолар номзоди Нобель Тинчлик мукофотига илгари сурилган.

Бундай ташаббус билан Насроний-демократик партиядан бўлган норвегиялик депутат Гейр Тоскедал чиққан.

Хабарларга кўра, махсус техника билан дастакланган милиция ходимлари аввалига йўлларни тўсишган, кейин намойишчиларни ҳибсга олишни бошлашган.

Оммавий норозилик намойишлари Беларусда, қарийб икки ойдирки, давом этиб келади.

Бунга 9 август кунги зиддиятли президент сайлови сабаб бўлган.

Сайловда амалдаги президент Александр Лукашенконинг 80.1% билан ғалаба қозонгани эълон қилинган.

Мухолифат буни тан олмаган, натижалар Лукашенко фойдасига сохталаштирилганини айтган.

Орада Александр Лукашенко ими-жимида ўтган инаугурация маросими ортидан, олтинчи бор президентлик ваколати ижросига киришган.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek