Ўзбекистон, санъат: Қўшиқчи Лоланинг янги клипи - Юзимиз, бугунимиз, исён

Ўзбекистон ва четда Лола тахаллуси билан танилган қўшиқчи Лола Йўлдошева "Севгингни менга айт 2" деб номланган видео клипини оммага тақдим этди.

Инстаграмдаги саҳифасида янги ижоди маҳсули ҳақида эълон қилар экан, у рус тилида "Бу менинг қилаётган ишимга муҳаббатим чин изҳори" деб ёзди.

YouTube да эълон қилинганидан саккиз соат ўтиб қарийб 41000 марта томоша қилинган клипга таниқли журналист ва блогер Шаҳноза Соатова шоу-бизнеснинг уйғониши деб таъриф берди:

"Санъатга, шоу бизнесга ижтимоий мавзулар ЁРИБ кириб келяпти. Лола, баракалла! Журналистика уйғонди, кино уйғонди, шоу-бизнес ҳам мана уйғоняпти, сен қачон уйғонасан, адабиёт?!"

Бир ойча олдин Лоланинг "Севгингни менга айт" видео клипи эълон қилинган, унда Лола бугунги жамият қусурларини кўрсатмоқчи бўлгани ҳақида блогер Нурбек Алимов ёзган эди.

"Севгингни менга айт"нинг биринчисида Нурбек Алимовга "кўринган" нарсалар йўқ эди, менимча; янги клипни эса Лола айнан Нурбек Алимовнинг ўша мақоласи асосида олгандек кўринди менга. Юзимиз. Бугунимиз. Исён бу. Маъноси салбий бўлиб қолган "ўзбекчилик" аталмиш ўзига хосликка, "ўзбекона юзхотир", салкам қўрқоқликка айланиб қолган "андиша", тутуриқсиз тақиқларга қарши бир исён", дея фикр билдирди блогер Муҳрим.

"Лоланинг жасоратига қойил қолмай иложимиз йўқ. Олдин унга ҳам шунчаки "поп-қўғирчоқлар" категория призмаси орқали қарайдиган халқ унга нисбатан бошқача кўз билан қарай бошлади. Лоланинг мақсади жамиятда ҳамма қонунда тақиқланмаган хоҳлаган ишини қилишга, хоҳлаган кийимини кийишга, имиджини ўзи белгилашга ва мустақил эркин танлов ҳуқуқига эга эканликларини кўрсатиш бўлди", деб ёзди блогер Нурбек Алимов.

"Ватанимиздаги цензура ва гўёки миллий қадриятларимизни асраб-авайлаш ортига беркиниш аслида устунлик қилиш ва одамларни бошқаришдек носоғлом истакдир. Нимани кийишимиз керак, қандай яшашимиз керак, нимани тинглашимиз ва нимани гапириш кераклигини бизга мажбуран уқтиришга ҳаракат қилиш истаги мана шундан келиб чиқади", деб ёзди ижтимоий фаол ва Smartgov Consulting бюроси ижрочи директори Азиза Умарова ўзининг Фейсбукдаги саҳифасида.

Қўшиқчи Лоланинг кийиниши Ўзбек расмийларининг норозиликларига сабаб бўлган, 2015 йили концерт қўйишга рухсат берадиган лицензиясидан маҳрум ҳам этилган эди.

Лола жамиятдаги ижтимоий-сиёсий мавзуларга ўз нуқтаи-назарини ифода этишдан чўчимайдиган ижодкор сифатида ҳам танилган.

Унинг табиатни асраш, хотин-қизлар ҳуқуқларини ҳимоя қилиш мавзуларига бағишланган фикрлари Инстаграм фолловерлари томонидан яхши кутиб олинган.

Расмий Инстаграм саҳифасида Лоланинг аёл киши эркакка қарам бўлмаслиги кераклиги ҳақидаги фикрлари қарийб 32000 кишига маъқул келганини кўриш мумкин.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek